¹ Tangwa Yesu a katugile gu mulundu, athu a vula a mu hatele. ² Muthu mu moshi ya hute we jile mu malu a yesu wa zwelele egi: " Fumu gula wa tshigina ngu belule." ³ Yesu wa sununile koko wa mu kwatele nu gu zwela egi: " Nga tshigina, beluga." Kaka hene henyanyi, wa belugile ⁴ Yesu wa mu lezele egi: " Keba gaye ha gu konda gu leza ata muthu. Inda udi monese gwa nganga-nzambi, u hane makapho wanyi Moyize a mi lezele ha gu hana mukunda nu gu leza athu egi wa beluga. ⁵ Tangwa Yesu a ngidile mu dimbo dia Kapernaum, fumu mu moshi wa masuta we jile mu mu mona. ⁶ Wa yandigile gu mu bondila egi: " Fumu, muthu wami wa gisalo udi wa swama ha gitanda monzo nu gimbefu gia gikhandambwa udi nu gukata gwa vula." ⁷ Yesu wa mu lezele egi: " Ngu mu za mu inzo yaye ha gu mu belula." ⁸ Uvi fumu wa masuta wa mu vutudile egi: " Fumu, nga jiyile go gu guyamba mu inzo yami, uvi zwela kaka ndinga imoshi nganyi muthu wami wa gisalo a beluge. ⁹ Mukunda n'eme nji nga muthu wa gisalo nga nu lemvuga gwa mafumu ami, n'eme ngu di nu masuta ako nga nu tuma nu gu a leza egi: " Eye inda hanyi, gwa muko " Iza ", mwene nu guza. Gwa muthu muko ngu mu leji egi " kita ngagi, mwene nu gu kita." ¹⁰ Gu nyima ya gu hata ndaga jene, Yesu wa yitugile, wa lezele athu wanyi a mu hatele egi: Ngu mu mi leza mu masonga egi, khanji ngu monega go muthu wa lukwikilu lwa phila yiyi gu Izalayele. ¹¹ Ngu mu mi leza egi, a vula mba eza gu khanda ya mazogelo a tangwa ako gu ma totelo a tangwa mba eza mu di tumbiga ha mesa nu Abrahami, Izaki nu yakhobo mu Gifumu gia gosa. ¹² Uvi wanyi a hageye ha gu khala mu Gifumu, Nzambi mba udi mu a bishila honze mu phipha, gunu athu a nu dila nu gudi sumana mazo." ¹³ Yesu wa lezele fumu wa masuta yonu egi: "inda! mu phila wa kwikila, ndaga wa khala mu kamba i mu salama mu phila wa tshigina." Muthu wa gisalo wa belugile kaka mu tangwa diene dinyi. ¹⁴ Tangwa Yesu a kumile mu inzo ya Phetelo, wa sangele bokilo wa Phetelo wa swama mukunda nu misongo. ¹⁵ Yesu wa mu kwatele gu koko ebuna wa belugile. Wa zugile, wa yandigile gu mu salesa gu tu isalo. ¹⁶ Mu gingweze, athu ejile mu batela Yesu athu a vula a khalele nu pheve jia bola, wa yandigile gu kaya pheve jene jia bola kaka gu ndinga imoshi, nu wanyi a khalele nu imbefu ya phila nu phila khungiawo akima a belugile. ¹⁷ Wa kitile nganyi ha gu lungisa ndaga ya sonegeye gu mukanda: " Mwene hakhenji wa zudile phashi jetu, nu gu tu belula gu imbefu yetu." ¹⁸ Tangwa Yesu a monele athu a mu jeta, wa lezele alongogi ha gu zauga ha sambwa dia muta wa Galileya. ¹⁹ Gunu longi mu moshi wa shigo we jile mu mu leza egi: " Longi, ngu mu gu hata hama hakima wa mbo ya." ²⁰ Yesu wa mu vutudile egi: " Mikenge idi nu ma wina ya nu ngila, tunjila twa gosa tu di nu yanzu, uvi Muna Muthu gwa shi nu hama ha guya mu haga mutwe go." ²¹ Mu longogi muko we jile mu mu leza egi: " Fumu, ngu hwe njila ngu ye ngu funde shami udi wa fwa." ²² Uvi yesu wa mu lezele egi: " Ngu hate, bemba athu a fwa adi funde." ²³ Tangwa Yesu a ngidile mu wato, alongogi a mu hatele. ²⁴ Tala, muphephe wa vula wa zugile holu dia meya mu phila egi wato wa zalele nu meya, uvi Yesu wa kalele genji gu tulo. ²⁵ A longogi ejile mu mu zugisa nu gu zwela egi: " Tu guluse, Fumu Tu fwa! " ²⁶ Yesu wa a lezele egi: " Mukunda nu ikhi mudi nu woma, enwe athu a konda lukwikilu?" Hene, wa zugile enji wa balele muphephe wene nu meya, mu mbala imoshi a henele tedie. ²⁷ A yitugile mwa vula enji a zwelele egi: " Muthu wa phila khi ngagi, muphephe nu meya adi mu mu lemvugila? ²⁸ Tangwa Yesu a kumile ha sambwa diko dia muta gu khanda ya dimbo dia Gadarenie, athu muyadi a zala nu ma diabulu ejile ha gu mu yamba. A kalele mu jinga gu majamo enji a kalele ole enya malwi, mukunda gwa kalele go nu muthu wa kalele mu balegela khanda yene. ²⁹ A yandigile gu kabuga mu ngolo nu gu zwela egi: " Ndaga khi tu di nayo nu eye, Muna Nzambi? Keti weji haha ha gu tu monesa phashi gu twama tangwa diene di lunge?" ³⁰ Gwa kalele mu lwega, ngulu ja vula ja kalele mu dia. ³¹ Ma diabulu a yandigile gu bondila Yesu nu gu zwela egi: " Gula wa tshigina gu tu kaya, tu tume tu ngile mu ngulu ginyi." ³² Yesu egi: " Indenu!" Ma diabulu a zogele gwa athu ene a ile mu ngila mu katshi dia ngulu, mu mbala imoshi ngulu jene ja zudile phushi katuga ha mulundu ti nu guya mudi bwa mu muta. ³³ Athu a kalele mu tala ngulu jene a lengele, a ile mu dimbo mu ta ndaga phila ya balegele, gibeni ha gu tala ndaga ya athu wanyi muyadi enya ma diabulu. ³⁴ Gu nyima, enya dimbo diene a zogele muya mu tagana Yesu. Tangwa a mu monele, a kalele mu mu bondila ha gu katuga mu dimbo diawo.