¹ Mu kala go mu sambesa mukunda mba mu le gu sambeseya ndo. ² Mukunda mba mudi mu sambeseya mu phila mwa nu sambesa, mba mu mu teseya nu ga giteselo ganyi mwa nu tesela. ³ Mukunda nu ikhi udi mu mona ga mwangu gadi nu iso dia mukwenu, uvi u shi mu mona go ga mutshi gadi mu iso diaye? ⁴ Phila khi wa jiya gu leza phangi'aye egi: " ngu bembe ngu gu katule ga mwangu gadi mu iso diaye", uvi eye udi nu ga mutshi mu diso diaye? ⁵ Mwa enya mbamba mbalumugu! Katula thomo ga mutshi gadi mu diso diaye gu nyima u katule ga mwangu gadi mu iso dia phangi'aye. ⁶ Gu hana ndo ima ya bonga gwa mbwa, nga ndo gu bemba mayaga a bonga gu twama dia ngulu; mukunda ngulu ja jiya gu a diata, gu nyima jeza mu mi phasula milele ⁷ Lomba mba u hwiye; kamba mba u mone, kokola, mba a gu kangudile. ⁸ Mukunda yonu u mu lomba mba u mu hwiya, yonu u mu kamba mba u mu zula, a nu kangudila muthu yonu u mu kokola. ⁹ Keti gudi nu muthu mu katshi dienu, gula munenji wa mu lomba gitshidi gia dipha, mwene na a mu hwi seso? ¹⁰ Nga ndo gula wa mu lomba iswi mwene na u mu hwi nioga? ¹¹ Hene, enwe mudi mwa athu a bola, mwa nu hwa anenu ima ya bonga, phila khi shenu yonu udi gosa gwa jiyile go gu mi hwa ima ya bonga gula mwa mu lomba? ¹² Hene, ndaga jikima mu mu tshigina egi athu ako a mu kitila, mwa feto gu a kitile; mukunda idi shigo ya sonegeye gwa ba profeta. ¹³ Ngidilenu ha mufulo wa kamagana, mukunda mufulo wa koma wa nu twala mu njila ya bola, athu a vula a nu balegela hene. ¹⁴ Mufulo wa gibibila udi wa kamagana udi njila ya nu twala gu lujingu, athu gabiyo a nu balegela mu njila yene. ¹⁵ Mu kala go mu hata malongi a ba profeta a mambo adi mu mi jila mu gifwanisu gia mameme, uvi mu masonga adi miyegu idi nzala. ¹⁶ Mba mu a jiyila gu mabundu awo. Keti wa jiya gu hela manga gu mutshi wa isongesa? ¹⁷ Phila imoshi, mutshi wa bonga wa nu haga mabundu a bonga, uvi mutshi wa bola wa bola wa nu haga mabundu a bola. ¹⁸ Mutshi wa bonga wa jiyile go gu haga mabundu a bola, nga ndo mutshi wa bola u hage mabundu a bonga. ¹⁹ Mutshi ukima u shi mu haga go mabundu a bonga u feto kheseya a gu mbiya ha jigo. ²⁰ Giteso gi moshi, mba mudi mu jiya mitshi yene mu njila ya mabundu. ²¹ Ishi go athu wanyi a nu ngu tamega egi " Fumu, Fumu, " mba a ngila mu gifumu gia gosa, uvi idi wanyi a nu kita luzolo lwa Shami yonu udi gosa. ²² Athu a vula mba a zwela mu gilumbu giene egi: " Fumu, Fumu, keti ta longele go mu jina diaye, nu gu kaya ba diabulu mu jina diaye nga ndo gu kita ndaga ja gu yituga mu jina diaye? ²³ Hene mba ngu a leza pwelele egi: " Ngu mi jiya go! Katugenu haha, enwe mwa kitile ndaga ja bola! ²⁴ Hene, muthu mukima u mu hata malongi ami nu gu a salela mba u kala muthu wa tema udi mu tunga gisapha gienji holu dia maseso. ²⁵ Mvula ya nogele, meya a zalele muphephe wa bala wa budile gisapha giene; uvi gia bwile go, mukunda gia tungiye holu dia maseso. ²⁶ Uvi muthu yonu udi mu hata malongi ami enji gwa shi mu a salela go udi wa fwana muthu yonu wa unga wa tunga gisapha gienji ha fufuta. ²⁷ Mvula ya nogele, meya a zalele, muphephe wa budile gisapha giene gia bwile gikima." ²⁸ Gu nyima ya gu manesa gu longa, athu a yitugile ha gu vwa malongi a nganyi, ²⁹ mukunda wa kalele mu longa ole muthu udi nu giyega uvi ndo ole a longi a shigo.