¹ Yesu wa tamegele alongogi enji kumi nu muyadi wa a hwile giyega holu dia pheve jia bola ha gu ji kaya nu gu belula imbefu ya phila ikima nu ifu ya mwila ya phila ikima. ² Haha ngagi wawa majina a athumwa kumi ni muyadi. Wa thomo, Simoni (wa nu tamegeya egi Phiele) nu Andele phangienji; Jake, muna Zebedeyo, nu Ja phangienji; ³ Filipo, nu Bartelemi; Toma, nu Matayo, mufutisi wa itadi; Jake muna Alfeyo nu Tade; ⁴ Simoni muthu wa di zalula, nu Yudasi Isikaliote, yonu wa yegudile Yesu. ⁵ Athu wawa kumi nu muyadi, Yesu wa a tumile; wa a hwile giyega gigi egi, " Guya ndo mu njila idi mu jinga athu wanyi adi aphagano enji gu ngila ndo mu membo a gu samaliya. ⁶ Uvi gindenu gwa mameme wanyi a totele athu a gu Isalele. Mu njila ⁷ longenu sango ya bonga egi, " Gifumu gia gosa gidi phene-phene. ⁸ Belulenu mbefu, zugisenu athu a fwa, Enya gimbefu gia hute a belulenu, kayenu pheve jia bola jidi nu athu. Mwa zudile giyega gia ofele mu gi hana gia ofele. ⁹ Mu zudi go wolo to maseso a thalo mukunda nu phogotshi jenu; mu zudi go ata sagi ya gumba ima yenu, ata mulele uko mu zudi go, ata sabatu, nga muhango. ¹⁰ Mukunda muthu wa gisalo wa nu futiya gu gisalo gienji. ¹¹ Mu membo akima mba mu ngila, kambenu muthu yonu wa jiya gu mi yamba, mu khala mu gisapha giene ti nu gilumbu gia gu katuga gwenu. ¹² Tangwa mba mu khala mu ngila mu konso gisapha hwenu enya gisapha giene mbote. ¹³ Gula enya gisapha giene a mi yamba, ngemba yenu i khale mu inzo yene; uvi gula enya gisapha gi moshi a tuna ha gu mi yamba, ngemba yenu mba mu vutuga nayo. ¹⁴ Wanyi akima mba a tuna ha gu mi yamba to ha gu vwa ndaga jenu, tangwa mba mu katuga mu inzo yene to dimbo diene, mba mu a phuphudila fuphi ya malu. ¹⁵ Mu masonga, ngu mu mi leza egi, mu gilumbu gia gu sambeseya, dimbo dia sodome nu gomore mba di sambeseya mu lebe dikima dia gu balega dimbo diene. ¹⁶ Tala ngu mu mi tuma ule mameme mu katshi dia mbwa ibulu, mudi keba mu phila ya nu di keba nioga nu gu khala mwa konda ndaga phila ya nu khala mayembe. ¹⁷ Mu khala mwa di keba mukunda enya hoshia mavu mba ale gu mi twala ndo gu twama dia ma nzuji nu gu twama dia jinzo jiawo jia isambu ha gu mi kuphula fimbu ¹⁸ nu gu mi twala gu twama dia Guvernere nu gu twama dia mafumu mukunda nu jina diami, mukunda nu gu ta githemwe giawo nu gia aphagano. ¹⁹ Tangwa mba a mi hana gu maga awo, mudi yangisa go mukunda nu phila mba mu zwela, mukunda ndaga mba mu zwela mba jidi mu mi lezeya kaka hene henyanyi. ²⁰ Mukunda ishi enwe mba mu kamba ndaga jia gu zwela go, uvi ndaga mba mu zwela mba ji katuga gu Pheve ya Shenu mba i zwela mu katshi dienu. ²¹ Mba adi mu mi twala gu twama dia mafumu mukunda mudi mu kwikila mu jina diami. Mu mbandu, athu ako mba a yegula aphangiawo nu a shawo nu anawo. Ana mba mba a kituga mbeni jia ibuti yawo enji mba adi mu kamba phila ya gu a shiya. ²² Athu a vula mba adi mu mi tuna mukunda mudi mu kwikila mu jina diami, uvi muthu yonu mba u kanga mutshima tii nu ha suga mba udi mu guluga. ²³ Gula enya dimbo di moshi a mi monesa phashi, mba lengenu gu dimbo diko. Jiyenu egi: Muna Muthu mba uza mu vutuga haha hoshia mavu gu twama dia guya gwenu mu membo ako ha gu longa jina diami gwa enya gu Izalayele. ²⁴ Longogi gwa balegele go longi wenji, ata mwenya gisalo gwa balegele go fumienji. ²⁵ Mu yindula go egi longogi wa jiya gudi tesa nu longi, nu mwenya gisalo adi tese nu fumienji wa gisalo. Mu phila ngudi nga longi wenu, mba mudi mu moneseya phashi mu phila adi mu ngu monesa phashi. Gula fumia gisapha wa tamegeya egi udi Belezebulu, jiyenu egi athu adi mu jinga mu gisapha gienji mba a tamegeya phila imoshi. ²⁶ Nganyi, mu vi woma go mukunda gushi nu gima gi moshi go gidi gia gu swega mba gila gu monega ndo ha phelo, enji gushi go nu gima gia giswegi mba gila gu jiyiya go. ²⁷ Ndaga jikima ngu mu mi leza mu phipha, ji zwelenu mu mwanya, enji ndaga jinyi mudi mu vwa hoshi hoshi ji longenu holu dia kangu dia gisapha. ²⁸ Enwe mu vi woma go wa athu wanyi adi mu shiya kaka mwila uvi monyo ndo. Uvi enwe vwenu woma wa muthu yonu wa jiya gu shiya mwila nu monyo nu gu u bishila gu milungi. ²⁹ Indulenu tunjila tutu tunzunzu tushi nu funu ya vula go, twa giya gu digiya mu thalo ya gibende gi moshi gia falanga. Uvi gula ga moshi ga bwa hoshi ga fwa, Shenu yonu udi gosa wa nu giya mukunda wa nu giya ndaga jikima. ³⁰ Wa nu jiya ndaga jenu jikima. Ata sugi jia gu mutwe wa nu ji tanga. ³¹ Hene, mu vi woma go mukunda mudi nu funu ya vula ya gu balega tunjila tutu tunzunzu. ³² Hene muthu mukima mba u ngu tshigina gu twama dia athu, n'eme mba ngudi gu tshigina gu twama dia Tata yonu udi gosa. ³³ uvi muthu yonu mba u ngu tuna gu twama dia athu, n'eme mba ngudi gu mu tuna gu twama dia Shami yonu udi gosa. ³⁴ Mu yindula go egi nge jile haha hoshia mavu ha gu haga ngemba ndo, nge jile mu bata ngemba uvi nge jile mu bata phogo ya ita. ³⁵ Nge jile mu bata gudi kapha mu katshi dia ana a mala nu a shawo, ana a akhetu nu a ginawo, gwa mukhetu wa makwela nu bokilo wenji wa mukhetu, bokilo wa mukhetu nu mukajia munenji wa yala. ³⁶ Mbeni wa muthu mba ukhala mwenya mu gisapha gienji. ³⁷ Muthu yonu wa nu tshigina shenji nga ndo ginenji ya gu ngu balega gwa kuyile go ha gu khala muthu wami nga ndo muthu yonu wa nu tshigina munenji wa yala nga ndo wa mukhetu gwa kuyile go ha gu khala muthu wami. ³⁸ Muthu yonu wa nu la gu zula khulunji yenji ndo ha gu ngu hata gwa shi muthu wami go. ³⁹ Muthu yonu mba u tshigina gu swega monyo wenji mba udi mu u totesa, uvi yonu mba monyo wenji mukunda nu eme mba udi mu u zula. ⁴⁰ Muthu wa mi yamba, wa ngu yamba eme gibeni, hene yonu wa ngu yamba, wa yamba muthu yonu wa ngu tumile. ⁴¹ Muthu yonu wa yamba profeta mu moshi mukunda udi profeta, mba udi mu zula mabula wanyi mba a hwiya profeta. Yonu mwa u yamba muthu wa bonga, mba udi mu zula mabula wanyi mba a hwiya muthu wa bonga. ⁴² Muthu mukima mba u hwa longogi mu moshi kopho dia meya a madidi mukunda udi longogi wami, ngu mu mi leza mu masonga egi mba gwa totesa mabula enji go.