¹ Tangwa Yesu a manesele gu longa alongogi kumi nu muyadi, wa katugile hene ha guya mu longa sango ya bonga mu membo ako. ² Yowani Mubotigi mu bologo wa vile ndaga jia khalele mu zwela athu gu isalo ya Kilisto, wa tumile alongogi enji, ha guya ³ mu hula egi: " Keti udi muthu yonu u feto za, to tu nengele muthu muko?" ⁴ Yesu wa vutudile egi, " Gindenu mu jiyise Yowani ndaga mwa mona nu jinyi mwa vwa. ⁵ Enya meso a fwa a mu mona, enya malu a fwa a mu wenda, enya misongo ya hute adi mu beluga, ifwa matshi mu vwa, mvumbi mu futumuga, athu wanyi adi nu funu ya guvwa sango ya bonga adi mu longeya. ⁶ Kiese gwa muthu yonu gwa shi go nu mitshima iyadi mukunda nu eme. ⁷ Mu phila alongogi a khalele mu katuga hama hene, Yesu wa yandigile gu leza gimvuga gia athu ndaga jia khalele mu talela Yowani egi, " Nanyi mwa yile mu tala mu temu dia zala fufuta? Gilengelenge gi moshi gidi mu nyigana gu muphephe? ⁸ Uvi nanyi gibeni mwa yile mu tala? Muthu mu moshi wa sudiga milele ya thalo? Athu a nu sudiga milele ya thalo a nu jinga mu jinzo jia mafumu. ⁹ Uvi enwe nanyi mwayi mu tala? profeta? Eya, ngu mu mi leza egi muthu mwene udi wa balega profeta. ¹⁰ Yogu muthu wa sonegeye mukunda nu mwene egi, ' Tala, nga tuma gaphungu gami gu twama diaye mukunda nu gu gulondela njila gu twama diaye'. ¹¹ Ngu mu mi leza mu masonga egi, mu katshi dia wanyi akima a butugile gwa mukhetu, gushi nu muthu mumoshi go udi wa balega Yowani Mubotigi. Uvi muthu yonu udi wa konda funu ya vula mu katshi dia gifumu gia gosa mwene udi wa mu balega gu funu. ¹² Katuga mu ilumbu ya Yowani Mubotigi ti nu magino, athu adi mu lwisa gifumu gia gosa, adi mu tshigina gu gi tambula mu gingolo ngolo. ¹³ Mukunda ba profeta akima a zwelele nu gu mikanda ya shigo ya sonegeye ti nu magino mu gilumbu gia yandigile Yowani gisalo. ¹⁴ Gula mwa tshigina gu mu yamba nganyi, mwene udi Eliya yonu u feto za mu vutuga. ¹⁵ Yonu udi nu matshi a gu vila a vwe. ¹⁶ Nu nanyi nga jiya gu fwanegesa khukho yiyi? Khukho yene idi ole ana mitumba adi mu kena ha zando, adi tumbiga hoshi mu kabuga mu ngololo nu mafuta wanyi adi mu kena nawo, ¹⁷ nu gu zwela egi, " Etwe ta mi budile ngoma nu miheho, uvi enwe mwa kinile go. Ta mi yimbile khunga jia khenda, uvi enwe mwa monesele go khenda. ¹⁸ Yowani we jile, wa tunyile gudia nu gunwa, uvi athu a zwelele egi, "udi nu pheve ya bola." ¹⁹ Muna muthu we jile, udi mu dia nu nu gunwa uvi athu adi mu zwela egi, " Talenu, udi nu lukhala, enji udi ginwi gia matombe, wa ta gifuta nu afutisi a itadi nu enya masumu! uvi, mayele a bonga a nu monega gu isalo. ²⁰ Gu nyima, yesu wa yandigile gu balela athu a membo wanyi mwene a kitile idimbu ya khumbwa, mukunda a baludile go mitshima. Wa zwelele egi, ²¹ khenda jia vula gwa eye dimbo dia korazini! khenda ji jia vula gwa eye Betesayida! mukunda gula idimbu ya khumbwa yinyi ya salamele mu membo enu nga ya salamele mu membo a tire nu sidoni, nga a sudigile sagi nu gudi kungula fuphi ya tshiya nu. gu balula mitshima. ²² Hene ngu mu mi leza egi, mu gilumbu gia gu sambeseya, membo a tire nu sidoni mba adi mu sambeseya nu gu lebeseya. ²³ Eye dimbo dia kapelenawum, udi mu yindula egi mba udi mu thuphudiya ti nu gosa? Ndo, mba udi mu bulumwishiya ti nu hoshi; mukunda gula idimbu ya khumbwa yinyi mwa monele ya salamele gu dimbo dia Sodome, nga dimbo diene dia baludile mutshima enji nga didi ti nu magino. ²⁴ Uvi ngu mu mi leza egi, mu gilumbu gia gu sambesa, dimbo didi mba didi mu sambeseya nu gu lebesa, uvi enwe ndo. ²⁵ Mu tangwa diene dinyi, Yesu wa zwelele egi: " Tata eye fumu wa gosa nu wa hoshi, nga gu vutudila matondo a vula mukunda wa swegele ndaga jiji gwa athu a tema, uvi wa monesa ndaga jene gwa wanyi a longugile go nu gwa ana a mitumba. ²⁶ Eya, Tata mukunda wa tshiginile egi ndaga jene ji salame nganyi. ²⁷ Ima yiyi ikima shami wa ngu hwile nayo, gushi ata muthu go udi mu jiya Mona mwa bonga-bonga katula kaka Tata mwene hakhenji; gushi go ata muthu wa jiya Tata mwa bonga-bonga katula kaka Mona mwene hakhenji, nu athu wanyi mona a nu tshigina egi a mu monese. ²⁸ Gizenu gwa eme, khungienu akima mwa hwila enwe mudi nu inemo, mba ngu mi hwe gu hima. ²⁹ Zulenu ginemo giami ha phanga jenu, mukunda ngudi nga muthu wa mawete nu wa khenda jia vula, nganyi mba mudi mu zula gu hima gwa vula gu mitshima yenu. ³⁰ Mukunda ginemo giami gishi go nu phashi ha gu tuphula.