¹ Ha sungi yene, Yesu wa khalele mu balega mu katshi dia gilanga gia ble; ya khalele mu gilumbu gia shigo. Nzala ya kwatele alongogi enji, hene a yandigile gu hala khenyi jia ble ha gudia. ² Tangwa a falisaye a monele ndaga jiene a lezele Yesu egi: "Tala! a longogi aye adi mu kita ndaga jinyi jia tuniya ha gusala mu gilumbu gia shigo. ³ Yesu wa a vutudile egi;"mwa tangele go ndaga jia salele Davidi nu athu enji tangwa nzala ya a kwatele? ⁴ Mwene wa ngidile mu inzo-Nzambi ya tenta, mwene nu athu enji a dile mapha wanyi a hageye mukunda nu Nzambi, ata a khalele nu shigo ha gu a dia, khuta Nganga-Nzambi jia khalele nu giyega gia gu a dia. ⁵ To khanji mu tanga go mu mukanda wa shigo egi mu gilumbu gia shigo, nganga-Nzambi a nu hata go shigo jia gilumbu gia shigo, enji Nzambi gwa nu a belesa go? ⁶ Ngudi gu mi leza egi, muthu yonu udi haha wa balega inzo-Nzambi gu ufumu ⁷ Gula nga mwa jiyile thendula ya ndaga yiyi:"nga tshigina khenda, uvi makapho a gimenga gia mbiji ndo " nga mwa jiyile thendula nga mwa belesele go athu ako. ⁸ Mukunda Muna-Muthu udi Fumu nu mu gilumbu gia shigo ⁹ Yesu wa katugile hene ha guya mu ngila mu inzo yawo ya isambu. ¹⁰ Gwa khalele nu muthu mu moshi wa koko dia gifu. A falisaye a hudile Yesu egi: keti idi ya bonga a gu belula muthu mu gilumbu gia shigo? A hudile mukunda nu gu mu funda. ¹¹ Yesu wa vutudile egi:" gula gudi nu muthu mu moshi mu katshi dienu udi nu dimeme di moshi dia bwa mu wina mu gilumbu gia shigo, keti mba udi bemba to mba udi zola mu wina? ¹² Muthu udi nu funu ya gubalega dimeme. Hene ishi go gubola ha gusalela muthu mambote mu gilumbu gia shigo ¹³ Ebuna Yesu wa lezele muthu yonu wa khalele nu koko dia gifu egi: "Sununa koko diaye, mwene wa sununile koko, hene koko diene dia belugile, dia vutugile giteso gi moshi nu koko diko. ¹⁴ A falisaye adi bungishile mukunda nu gukamba phila ya gushiya Yesu ¹⁵ Tangwa Yesu a jiyile ndaga yene, wa katugile hama hene. Athu a vula a khalele mu mu hata, ebuna Yesu wa khalele mu a belula. ¹⁶ Yesu wa khalele mu a kebesa ha gukonda gu mu jiyisa gwa athu ako. ¹⁷ Ya khalele mukunda nu gulungisama gwa ndaga yinyi profeta Yezaya a zwelele egi: ¹⁸ " Tala muthu wami, yonu nga phonele ha gu ngu salela, muthu yonu nga tshigina, muthu yonu nga nu monela kiese gia vula, mba ngudi gu mu hua pheve yami ebuna mba udi mu jiyisa ndaga jia gu sambeseya gwa aphagano ¹⁹ Mwene mba a hagi go thembe nu makelele. Ata muthu mba gwa shi mu vwa go ndinga yenji mu ma bala-bala. ²⁰ Mwene mba gwa kheshi go ata diyiji dia gu kondamana, mba gwa Jimi go tshiya tudi mu lema gu shinga ya bola ya mwinda. Mwene mba uhata ti nu gunu mba a nungisa ndaga jia kielega. ²¹ Ebuna athu akima mba adi mu mu hagela mutshima. ²² Tangwa didi, athu ejile, mu bata gwa Yesu gatabu ga fwa meso ga khalele nu pheve ya bola. Yesu wa mu beludile hene a yandigile guzwela nu gumona. ²³ Athu akima a yitugile, enji a khalele mu hula egi:"Muthu yogu wa jiya gukhala Muna Davidi? ²⁴ Tangwa a falisaye a vile ndaga yene ya gidimbu gia khumbwa a zwelele egi:"Muthu yogu udi mu kaya pheve jia bola kaka mu ngolo jia fumu wawo satana belezebule." ²⁵ Uvi Yesu wa jiyile ngindu jiawo wa a lezele egi:" Konso gifumu gidi gia gu di kapha gia nu fwa, enji gula athu a dimbo di moshi, nga a vumo di moshi adi mu di lwisa ene-nu-ene, dimbo dinyi, nga vumo dinyi mba di jingi go. ²⁶ Gula satana udi mu kaya athu enji, udi wa gudi kapha gwa mwene, ebuna phila khi gifumu gienji gia jiya gu jinga? ²⁷ Enwe mwa nu zwela egi nga nu kaya pheve jia bola mu ngolo jia belezebule, gula nganyi alongogi a nu kaya pheve jia bola mu ngolo jia nanyi? Mukunda nu nganyi ndaga jinyi alongogi enu adi mu sala jidi mu leza egi, jidi ndaga jia mambo mwa nu zwela. ²⁸ Uvi gula Eme nga nu kaya pheve jia bola mu ngolo jia pheve ya Nzambi, idi mu leza egi Gifumu gia Nzambi gia kuma mu katshi dienu. ²⁹ Gushi go nu muthu wa jiya gungila mu inzo ya muthu wa ngolo, mukunda nu gu kuya ima ya muthu mwene, gula gwa mu jitshigile go shinga. Kansi gula wa mu jitshiga shinga, wa jiya gu kuya ima ya muthu mwene ikima mu inzo yenji. ³⁰ Muthu yonu gwa shi go futa diami, udi mbeni wami, muthu yonu wa nu tuna ha gu ngu salela ngu vudise athu ako, muthu yonu wa nu phanza athu. ³¹ Hene ngudi gu mi leza egi: mukunda nu masumu akima wanyi athu adi mu sala, nu gu vweza gukima athu adi mu vweza Nzambi, Nzambi mba udi mu a lolula, uvi Nzambi mba gwa lolula go muthu yonu mba u vweza Pheve-Santu. ³² Muthu mukima yonu mba u zwela ndaga ya bola mukunda nu Muna-Muthu, Nzambi mba udi gu mu lolula. Uvi muthu yonu mba u zwela ndaga ya bola mukunda nu Pheve-Santu, Nzambi mba gwa mu lolula go ata mu tangwa didi nga mu tangwa dinyi mba didi muza. ³³ Gula mwa tshigina guzula mabundu a bonga, idi ya bonga ha gukhala nu mutshi wa bonga; gula mudi nu mutshi wa bola, mba mudi mu zula mabundu a bola. Mutshi ukima wa nu jiyana gu mabundu enji. ³⁴ Enwe athu a phamba, gula mudi athu a bola, phila khi mwa jiya guzwela ndaga jia bonga? mukunda muthu wa nu zwela ndaga jinyi jia nu zala gu mutshima wenji. ³⁵ Muthu wa bonga wa nu zwela ndaga jia bonga jinyi jia vula adi najio gu mutshima, muthu wa bola wa nu zwela ndaga jia bola jinyi adi najio jia vula gu mutshima ³⁶ Ngudi gu mi leza egi: Mu gilumbu ginyi Nzambi mba a sambesa athu, mba adi mu samba mukunda nu ndaga jikima jinyi jia phamba-phamba a khalele muzwela. ³⁷ Nzambi mba u nungisa to gu belesa athu mukunda nu ndaga jinyi a nu zwela. ³⁸ Tangwa didi a longi ako a shigo nu a falisaye a hudile Yesu egi:" Longi ta tshigina tu mone gidimbu jiaye gimoshi gidi mu leza egi udi nu giyega." ³⁹ Uvi Yesu wa a vutudile egi: "Enwe athu a tangwa didi, mwa athu a bola, enji mushi nu lukwikilu go, mudi mu kamba ha gumona gidimbu, uvi Nzambi mba gwa shi go gu mi leza gidimbu giko ndo kaka ginyi gia profeta Yonasi phamba. ⁴⁰ Phila Yonasi a khalele mu vumo dia ishi ya koma mu muta ilumbu itatu phipha nu mwanya, phila yene nji Muna-Muthu mba u khala mu mavu ilumbu itatu phipha nu mwanya. ⁴¹ Mu gilumbu ginyi Nzambi mba a sambesa athu, athu a mu dimbo dia Niniwe mba a magana hama ha moshi nu athu a tangwa didi ebuna mba adi mu mi funda mukunda mwa baludile mitshima tangwa mwa vile malongi a Yonasi. Uvi haha hadi nu muthu wa balega yonasi ⁴² Mu gilumbu Nzambi mba a sambesa athu, fumu mukhetu wa dimbo dia saba mba u zuga hama ha moshi nu athu a tangwa didi, ebuna mba adi gu mi funda mukunda mwene wa katugile gu suga ya mavu ha guza muvwa ndaga jia gutema Salomo a khalele mu zwela, uvi haha hadi nu muthu wa balega Salomo. ⁴³ Gula pheve ya bola ya zoga gwa muthu, pheve yene ya nu ya mu wenda hama ha konda meya, mukunda nu gukamba gifundo gia gu hima, gula pheve yene ya bola ya monele go gifundo gia gu hima ⁴⁴ mba idi mu zwela egi:"Idi ya bonga ngu vutuge mu inzo wami inyi nga zogele. Tangwa mba i vutuga mu inzo yene, pheve yene ya sanga inzo yene ya gukomba mwa bonga, enji ya gu londa mwa bonga, ⁴⁵ tangwa didi pheve yene mba i vutuga mu zula pheve jiko sambwadi jia gu balega gubola, pheve jiene mba jidi muza mu ngila mu inzo yene ha gu jinga mwene. Nganyi ha suga ya ndaga yene, lujingu lwa muthu mwene mba lukhala lwa gu balega gubola mu phila ya ha thomo. Mba ikhala giteso gi moshi gwa athu a bola a tangwa didi. ⁴⁶ Tangwa Yesu a khalele mu longa athu,"Ginenji nu aphangienji ejile a maganele honze; a khalele mu kamba phila ya gu solula nu Yesu. ⁴⁷ Hene muthu mu moshi wa lezele Yesu egi:" Tala, Ginaye nu aphangi'aye adi haha honze adi nu funu ya gu solula n'eye ndaga. ⁴⁸ Yesu wa vutudile gwa muthu mwene egi;"Ginami nanyi? A phangia'mi a kwatshi? ⁴⁹ Yesu wa tuphudile koko, ebuna wa lezele alongogi enji egi;" talenu, mama nu a phangia'mi enyawa. ⁵⁰ Muthu mukima yonu udi mu kita ndaga jinyi jia nu tshigina Tata, mwene muthu udi phangia'mi wa yala nu wa mukhetu, to ginami."