¹ Mu gilumbu giene, Yesu wa katugile mu inzo, wa vutugile ha guya mukhala phene-phene mu khelelego ya gijiba, wa yandigile gulonga. ² Athu a vula ejile mu zala phene-phene nu Mwene, ebuna Yesu wa ngidile mu wato. Athu akima a maganele phene-phene nu muta ³ Yesu wa yandigile gu a longa ndaga jia vula mu ingana egi; "Muthu mu moshi wa katugile mu inzo yenji wa yile mu gilanga ha gukuna. ⁴ Tangwa a khalele mu kuna khenyi mu gilanga, khenyi jiko jia bwile mu katshi dia njila; tunjila twa dile khenyi jiene. ⁵ Khenyi jiko jia bwile ha mavu a maseso, khenyi jiene jia zogele mu phushi uvi mavu a khalele go a vula. ⁶ Tangwa mwanya wa zogele wa vula wa shididishile imenina yene ya uma mukunda imenina yene ya khalele go nu miji ya leha ⁷ Khenyi jiko jia bwile mu katshi dia mitshi ya isongesa. Tangwa isongesa ya zogele ya kula ya yandigile gutshoga imenina yinyi ya zogele ya bonga. ⁸ Khenyi jiko jia bwile ha mavu a bonga. Imenina ya butile mabundu. Mabundu ako a butugile khama, ako makumi-a-sambano, ako nji makumi- a-tatu." ⁹ Ebuna Yesu wa zwelele egi:" Muthu yonu udi nu matshi a guvwila a vwe " ¹⁰ Tangwa didi alongogi ejile gwa Yesu a mu hudile egi: Mukunda nu ikhi udi mu leza athu mu ingana?" ¹¹ Yesu wa vutudile egi: Nzambi wa mi hwile njila ha gu jiya ndaga jia giswegi gia Gifumu Gienji, uvi gwa hanele go njila gwa athu ako. ¹² Mukunda muthu yonu udi nu ima, Nzambi mba udi gu mu yiga ima iko mukunda a khale nu ima ya gu balega giteso, uvi muthu yonu udi wa konda gima, Nzambi mba u mu tambula nu ga ndambu ga ima inyi adi nayo. ¹³ Hene, ngu mu a leza ndaga mu ingana, mukunda adi mu tala uvi a shi go mu mona, adi mu vwa, uvi a shi mu bagisa go. ¹⁴ Nganyi ndaga jia zwelele profeta Yezaya jia lungisama egi:" Adi mu vwa, uvi a shi mu bagisa go, adi mu mu tala, uvi a shi mu mona go. ¹⁵ Mukunda mitshima ya athu wawa ya bwa ya gingolo-ngolo; a shi go muvwa gu matshi; enji a shi go mu mona gu meso gula nganyi ndo, nga a nu mona nu meso, enji nga a nu vwa gu matshi, nga a nu bagisa ndaga, ebuna nga a nu balula mitshima mukunda nu gu beluga. ¹⁶ Hene Enwe mu khala mu kiese! mudi mu mona nu meso, enji mudi mu vwa gu matshi. ¹⁷ Eme ngudi gu mi leza ndaga jia kielega egi: Mu tangwa dikulu ba profeta a vula nu athu a vula a masonga a khalele nu nzala ya gumona ndaga jiji mudi mu mona uvi a ji monele go; enji a khalele nu nzala ya guvwa ndaga jiji mudi muvwa, uvi a ji vile go. ¹⁸ Enwe hatenu gingana gia muthu wa yile mu kuna mu gilanga. ¹⁹ Athu wanyi a nu hata nu guvwa sango jia Gifumu gia Nzambi, athu ene a shi mu bagisa go sango jiene, athu ene a fwanana nu njila. Khenyi jiko jidi mu bwa mu njila yene. Muthu wa luvunu udi muza mu katula sango jinyi jidi mu mitshima yawo. ²⁰ Athu ako adi a fwanana nu khenyi jia bwile mu mavu a maseso. Athu ene a vile sango jia Nzambi a ji tshiginile nu kiese, ²¹ uvi athu ene a nu kanga go mitshima enji, athu ene a nu khala go nu tangwa dia vula. Gula phashi jia a kwata to athu ako a amonesa phashi mukunda nu sango jia Nzambi, athu wawa a nu bwisa lukwikilu mu phushi. ²² Khenyi jia bwile mu katshi dia isongesa jia fwanana nu athu wanyi a nu vwa sango jia Nzambi, uvi lujingu lulu lwa ha mavu lwa nu yangisa mabanza awo; kiese gia gimvwama gia nu a dimba, gia nu yangisa sango jia Nzambi, hene sango jia Nzambi jia nu fwa phamba. ²³ Khenyi jia bwile mu mavu a bonga jia fwanana nu athu wanyi adi a fwanana nu mavu a bonga. Sango jia Nzambi jia bwile mu mavu ene, athu ene a vile sango a ji bagisele, athu ene a nu buta mabundu a gubalega khama, ako adi mu buta mabundu makumi-a-sambano, ako adi mu buta mabundu makumi-a-tatu." ²⁴ Yesu wa a tele gingana giko egi:"Gifumu gia Nzambi gia fwanana nu muthu mu moshi wa kunyile khenyi jia bonga mu gilanga gienji. ²⁵ Gilumbu gi moshi mu phipha, tangwa athu a khalele gu tulo mbeni wenji we jile mu kuna khenyi jia bola mu katshi dia khenyi jia ble, ebuna wa katugile genji. ²⁶ Tangwa khenyi jia ble jia zogele, jia butile mabundu, khenyi jia bola jia zogele mu katshi jia khenyi jia bonga. ²⁷ Athu a gisalo ejile mu hula fumu wa gilanga egi: "Fumu, keti wa kunyile go khenyi jia bonga mu gilanga giaye? gwi gwa katuga mayiji wawa a bola? ²⁸ Mwene wa a vutudile egi:" Mbeni muthu wa kita nganyi." A mu hudile egi: wa tshigina tu vuze mayiji ene a bola? ²⁹ Fumu wa vutudile egi: Ndo, mukunda tangwa muya mu vuza mayiji a bola, mba mu mu vuza nu khenyi jia ble. ³⁰ Hene bembenu khenyi jia ble nu khenyi jia bola ji kule hama ha moshi ti nu tangwa dinyi mba tu ji katula. Mu tangwa diene mba ngudi mu leza athu wanyi a nu katula khenyi ha gukatula thomo mayiji a bola ha gu a jitshiga mu sophe mukunda nu gu a bishila ha jigo dia tshiya, uvi khenyi jia ble ji katulenu mu ji mbe mu mukala. ³¹ Yesu wa a tele nji gingana giko egi:"Gifumu gia Nzambi gia fwanana nu bundu di moshi dia ga mutshi ga mutarde ga kunyile muthu mu gilanga gienji. ³² Gabundu gene gadi ga bundu ga zonda mu katshi dia mabundu akima. Uvi gula ga zoga ga nu balega mitshi iko gu gu koma, mu phila egi tunjila twa tu za mu tunga yanzu mu thango jienji." ³³ Yesu wa a tele nji gingana egi:"Gifumu gia Nzambi gia fwanana nu khishi dia mapha dinyi gula mukhetu wa di futula nu phupha ya giteso gia gilo makumi-a-yadi nu a- tano, mwene mba udi mu bemba phupha yene ti tangwa mba i jimba. " ³⁴ Yesu wa khalele mu longa athu kaka mu ingana. ³⁵ Mwene wa khalele mu kita nganyi mukunda nu gu lungisa ndaga jia zwelele profeta egi: Eme mba ngu a longa khuta mu ingana; mba ngudi mu a jiyisa ndaga jinyi Nzambi a swegele katuga tangwa dinyi, Mwene a salele ima ikima. ³⁶ Tangwa didi Yesu wa bembele athu, Mwene wa vutugile gu inzo. Alongogi enji ejile ha gu mu hula egi:" Tu tendudile gingana ginyi gia mayiji a bola. ³⁷ Yesu wa vutudile egi: "Muthu yonu wa kunyile khenyi jia bongaudi Muna-Muthu; ³⁸ gilanga gidi mavu a kima; khenyi jia bonga jidi athu a Gifumu gia Nzambi; khenyi jia bola jidi athu a bola. ³⁹ Mbeni yonu wa kunyile mayiji a bola udi satana. Tangwa dia gukatula mabundu didi tangwa dia suga ya mavu. Athu wanyi a nu katula mabundu adi ba wanjio. ⁴⁰ Phila ya nu bungishiya mayiji a bola hama ha moshi ha jigo dia tshiya, mba ikhala mu phila inyi mu tangwa dia suga ya mavu. ⁴¹ Muna-Muthu mba udi mu tuma ba wanjio ha gukatula mu Gifumu gienji athu wanyi akima a nu benda athu ako ha gukita masumu, nu athu wanyi akima a nu kita ndaga jia bola, ⁴² mba a bishidiya mu wina dia tshiya twa bala gunu mba a khala mu dila, nu gu di sumana mazo mu ngolo. ⁴³ Ebuna athu a bonga mba a khala mu sema mu Gifumu gia Shawo phila tangwa dia nu sema. Muthu yonu udi nu matshi a gu vila a vwe." ⁴⁴ " Gifumu gia Nzambi gia fwanana nu ima inyi ya thalo ya swegeye mu gilanga. Gula muthu mu moshi wa imona, mwene mba udi mu iswega. Mukunda nu kiese mba uya mu diga ima yenji ikima; tangwa didi mba uza mu vutuga ha gu sumba gilanga giene." ⁴⁵ "Enji Gifumu gia Nzambi gia fwanana nu komersa udi mu kamba mayaga a thalo. ⁴⁶ Gula wa mona diyaga di moshi dia thalo ya vula; mba u vutuga mu diga ima yenji ikima, mukunda nu gu sumba diyaga diene." ⁴⁷ "Twa jiya nji gufwanesa Gifumu gia Nzambi nu ukonde wa nu tambeya jiswi mu muta. Ukonde wene wa kwata jiswi jia phila nu phila. ⁴⁸ Gula ukonde wene wa zala nu jiswi wa nu zoleya gonze phene-phene nu muta, a tambi a jiswi mba a khala mu phona jiswi; mba adi mumba jiswi jia bonga mu mulongo, uvi jiswi jia bola mba adi mu ji bishila ⁴⁹ Mba ikhala giteso gi moshi mu tangwa dia suga ya mavu; ba wanjio mba eza tangwa Nzambi mba a sambesa athu, ebuna mba adi mu phona athu a bola nu athu a bonga. ⁵⁰ Athu a bola mba adi mu bishidiya mu wina dia tshiya, gunu mba a khala mu dila, nu gudi sumana mazo. ⁵¹ Yesu wa a hudile egi:" Enwe mwa bagisa ndaga jiji jikima? Alongogi a vutudile egi: Nganyi ta bagisa. ⁵² " Ebuna Yesu wa a lezele egi: "Nganyi konso longi wa shigo yonu wa kituga mulongogi wa Gifumu gia Nzambi, udi wa fwanana nu fumu mu moshi wa inzo wa nu zola gu sugu ima yenji ya pha nu inyi ikulu a nu swega. ⁵³ Tangwa Yesu a manesele guta ingana yene wa katugile hama hene, ⁵⁴ ebuna wa yile mu dimbo diawo, gunu wa yandigile gulonga athu mu inzo ya isambu. Athu wanyi a khalele mu hata malongi, a khalele mu yituga, nu guzwela egi;"Gwi gudi mu katuga mayele a muthu yogu? Phila khi adi mu kita idimbu ya kumbwa? ⁵⁵ Keti muthu yogu gwa shi go muna mwenya mabaya go? Keti mariya gwa shi go ginenji? Yakobo, Yozefi, Simoni nu Yude keti a shi go a phangie'nji go? ⁵⁶ A phangienji a akhetu keti a shi go haha mu katshi dietu? Hene ndaga jiji ji kima gwi gidi mu mu katugila? " ⁵⁷ Hene mukunda nu ndaga jiene, athu a tunyile Yesu, uvi Yesu wa a lezele egi:" profeta wa Nzambi wa nu zula lukumu khanda ji kima, uvi wa nu katudiya lukumu mu inzo ya Shenji nu mu dimbo diawo." ⁵⁸ Mwene gwa salele go nji idimbu ya vula, mukunda nu gukonda gu mu tshigina.