¹ Mu tangwa diene Elode Antipase, wa vile ndaga jia khalele mu zwela athu mukunda nu Yesu. Mwene wa lezele athu enji a gisalo egi: ² " Muthu mwene udi Yowani-mubotigi wa zuga gu lufwa, hene adi nu ngolo jia gu kita ndaga jia gu yituga ³ Mukunda Elode wa kwatesele Yowani, wa mu jitshigishile shinga, hene a mu mbile mu bologo, mukunda nu ndaga ya Elodiade mukajia phangienji Filipo. ⁴ Yowani wa khalele mu leza Elode egi: "Ishi ya bonga go ha gu tambula mukajia phangiaye ". ⁵ Hene Elode a khalele mu kamba phila ya gushiya Yowani, uvi wa khalele muvwa woma wa athu, mukunda athu a khalele mu yindula egi Yowani udi profeta wa Nzambi. ⁶ Mu gilumbu gia khalele mu kita fete ya gubutuga gwa Elode, mona wa Mukhetu wa Elodiade wa zogele mu kina mu katshi dia athu wanyi a tamegeye Hene henyanyi wa hwile Elode kiese gia vula; ⁷ hene Mwene a lezele mona-mukhetu mwene egi: Nga batudile giba egi gima gi kima mba u lomba, mba ngudi mu guhwa na gio!" ⁸ Gina mona-mukhetu wa mu lezele gima gia gulomba; Hene mona-mukhetu a lombele mutwe wa Yowani-mubotigi holo dia longa. ⁹ Fumu Elode wa monele khenda jia vula, uvi mukunda nu giba gia batudile gu meso a athu wanyi a tamegeye gu fete, wa tamegele muthu wenji mu moshi wa mu lezele egi: muhwe gima giene." ¹⁰ Wa tumile muthu mwene ha guya mu batula mutwe wa Yowani-mubotigi wa khalele mu bologo. ¹¹ Mutwe wa Yowani wa bateye holo dia longa, wa hwiye mona-mukhetu wa yile mu hwa ginenji. ¹² Alongogi a Yowani ejile mu zula mvumbi ya Yowani ha guya mu ifunda. Gu nyima a yile mu jiyisa Yesu ndaga yene. ¹³ Tangwa Yesu a vile ndaga yene, wa ngidile mu wato, wa katugile hene ha guya mukhala hama hako ha khenji. Tangwa athu a jiyile nganyi a katugile mu membo awo ha guhata Yesu. ¹⁴ Tangwa Yesu a zogele mu wato, wa monele athu a vula, khenda jia mu kwatele, ebuna wa yandigile gu belula athu wanyi a khalele nu misongo. ¹⁵ Mu gingweze gia gilumbu giene, alongogi enji a mu lezele egi:" tangwa dia balega, haha tu di mu katshi dia temu, mwa bonga u leza athu a vutuge mu membo adi phene-phene ha gu sumba ima ya gudia" ¹⁶ Uvi Yesu wa a vutudile egi: A shi go nu funu ya gu vutuga. Enwe ha khenu a hwenu ima ya gudia" ¹⁷ A vutudile egi: "Haha tudi nu mapha a tano nu jiswi ji yadi " ¹⁸ Yesu egi: " Ngu batelenu ima yene " ¹⁹ Yesu wa lezele athu ha gudi tumbiga holo dia mwangu. Mwene wa zudile mapha wanyi a-tano nu jiswi ji yadi, wa tuphudile meso gosa, wa vutudile matondo gwa Nzambi, wa batudile mapha itshidi-itshidi wa hwile alongogi enji ha gu kaphela athu. ²⁰ Athu akima a dile a kuta, gu nyima alongogi a nonele itshidi ya mapha, a zalesele milongo kumi-nu-iyadi. ²¹ Athu wanyi a dile a khalele giteso athu mafunda-a-tano, gukonda gu tanga akhetu nu ana a mitumba. ²² Gu nyima, Yesu wa lezele alongogi ha gungila mu wato a diangele ha gu zauga ha sambwa dia gijiba, tangwa diene mwene wa begele ha guleza athu a vutuge mu membo. ²³ Tangwa athu a zudile njila ha guvutuga mu membo, Yesu wa kandugile ha mulundu mukunda nu gusamba Nzambi. Mu tangwa diene dia gingweze Yesu wa begele ha khenji, ²⁴ hene henyanyi wato wa khalele ha katshi-katshi dia muta, muphephe wa katugile gu khanda iko, wa nyigishile meya mu ngolo, ebuna wato wa yandigile gu zaluga. ²⁵ Mu kolombolo dia thomo, Yesu wa wendele holo dia meya, ha guza mu phusana phene-phene nu alongogi. ²⁶ Woma wa vula wa kwatele alongogi tangwa a monele Yesu mu wenda holo dia meya, a zwelele egi:" yogo diabulu!" hene a yandigile gukabuga nu gu haga milolo ya vula mukunda nu woma. ²⁷ Yesu wa a lezele kaka mu mbala imoshi hene henyanyi egi:"khalenu nu gikhesa! yogo Eme! mu vi go woma! " ²⁸ Piele wa vutudile egi: "Fumu gula idi Eye, ngu hwe nswa, ngu wende holo dia meya ngu ze ngu gu sange." ²⁹ Yesu egi:"giza!" Phetelo wa zogele mu wato, wa yandigile gu wenda holo dia meya ha guya mu sanga Yesu. ³⁰ Tangwa muphephe wa budile meya, Piele wa vile woma, ebuna wa yandigile gu koboga, wa kabugile mu ngolo: Fumu ngu guluse!" ³¹ Kaka mu mbala imoshi Yesu wa sununile koko, wa kwatele Piele wa mu lezele egi:"Eye muthu wa lukwikilu lwa gabiyo, mukunda nu ikhi udi nu mitshima iyadi?" ³² Tangwa Yesu nu Piele a ngidile mu wato, muphephe wa batugile. ³³ Alongogi a khalele mu wato a fugamele ha gu kumisa Yesu, a zwelele egi:"Idi ya masonga, udi Muna-Nzambi!" ³⁴ Tangwa a zaugile ha sambwa dia muta a kumile gu khanda ya dimbo dia Zenezareti. ³⁵ Tangwa athu a mu dimbo diene a jiyile egi yonu Yesu: sango jenji jia phanzanele mu khanda yene ikima, hene athu a batele gwa Yesu athu a gimbefu. ³⁶ A khalele mu bondila Yesu egi: hana njila gwa mbefu ha gu kwata ata songi yaye ya mulele " ebuna athu wanyi a khalele mu kwata mulele wa Yesu a khalele mu beluga