¹ Hene henyanyi, a falisaye ako, nu a longi a shigo a katugile gu Yelusalemi muza gwa Yesu, a mu hudile egi: ² "Mukunda nu ikhi alongogi aye a shi go mu hata shigo jia mambuta? adi mudia mago a konda guwova. " ³ Yesu wa vutudile egi: " Enwe mukunda nu ikhi mwa nu jitisa kaka shigo jienu uvi jia Nzambi ndo? " ⁴ Mukunda Nzambi wa zwelele egi:"Jitisa Shaye nu Ginaye" wa zwelele nji egi "Muthu yonu udi mu zweza Shenji nu Ginenji u feto fwa. " ⁵ Uvi Enwe mwa zwelele gwa athu enu egi, gula muthu wa leza Shenji to Ginenji egi: gusadisa gukima nga tshigina gu guhwa, idi makapo wanyi ngudi mu swega ha guhwa Nzambi" ⁶ funu gu thugu gwa muthu mwene ha gujitisa Shenji, nganyi mudi mu shiya ndaga jia zwelele Nzambi, hene mudi mu hata kaka shigo jiene. ⁷ Enwe athu a mambo, Yezaya wa zwelele ndaga jia kielega, tangwa mwene a zwelele gu twama mukunda nu ndaga jiene egi: ⁸ Nzambi wa zwelele egi: " Athu wawa adi mu ngu jitisa kaka ha kano, uvi gu mitshima ndo. ⁹ Isambu inyi adi mu samba idi ya phamba, mukunda adi mu longa shigo jia athu egi malongi a Nzambi." ¹⁰ Henyanyi, Yesu wa tamegele athu, wa a lezele egi: " mu vwa mu bagise egi; ¹¹ ima ya gudia inyi ya nu ngila mu kano dia muthu, ishi go yene ya nu hana mvindu gwa muthu, uvi ndaga jinyi jia nu zoga mu kano dia muthu jia nu hana mvindu gwa muthu. " ¹² Tangwa diene alongogi ejile mu hula Yesu egi: "wa jiya egi ndaga wa nu zwela jia nu hana phashi gu mitshima ya afalisaye?" ¹³ Yesu wa vutudile egi: Shami yonu udi gosa, mba udi mu vuza imenina ikima inyi mwene a kunyile go. ¹⁴ Enwe mu hati go afalisaye! adi a twadisi a meso a fwa, gula muthu wa meso a fwa udi mu twalesa muthu muko wa meso a fwa, ene mu yadi mba adi muya mu bwa mu wina." ¹⁵ Piele wa lezele Yesu egi: " Tu tendudile gingana giene." ¹⁶ Yesu wa vutudile egi: " Nenwe, khanji mu bagisa go? ¹⁷ Khanji mu bagisa go egi madia wanyi a nu ngila mu kano dia muthu, a nu balega mu vumo, gu nyima a nu zoga honze? ¹⁸ Uvi ndaga ginyi jia nu zoga mu kano jia nu katuga gu mutshima; ndaga jiene jia nu bolesa muthu. ¹⁹ Mukunda ngindu jia bola jia nu zoga gu mutshima wa muthu jia nu tuma muthu ha gushiya athu, gusala pite, gusala ndaga jia sonyi, gukuya, guzwela ndaga jia mambo, nu gu vweza athu ako. ²⁰ Ndaga jia phila yiyi jia nu bolesa muthu uvi gula muthu wa dia gukonda gu wova mago, gwa nu bola go. ²¹ Tangwa diene Yesu wa katugile hene wa yile gu khanda ya membo a tire nu sidoni. ²² Mukhetu mu moshi wa mu dimbo dia kanana wa khalele mu jinga gu khanda yene, we jile mu leza Yesu nu gu kabuga egi: "Fumu, Muna-Davidi, ngu vile khenda! Munami wa mukhetu udi nu pheve ya bola, ebuna udi mu mona phashi jia vula. " ²³ Uvi Yesu wa mu vutudile go ata mvutu. Alongogi a Yesu ejile mu bondila Yesu egi:" Kaya mukhetu yogu! udi mu haga makelele a vula, tangwa adi mu tu hata!" ²⁴ Ebuna Yesu wa vutudile egi: Nzambi wa ngu tumile kaka gwa athu a gu Izrayele wanyi adi gifwa mameme a totele. ²⁵ Uvi mukhetu mwene we jile mu fugamela Yesu, wa mu lezele egi: "Fumu ngu salese! " ²⁶ Yesu egi: Ishi go ya bonga ha guhwa mbwa mapha wanyi adi mukunda nu ana-a-athu. ²⁷ Mukhetu egi: "Idi nganyi Fumu, uvi ata mbwa jia nu dia itshidi ya ima ya nu bwa ha mesa a mafumu ajio." ²⁸ Ebuna Yesu wa mu lezele egi: " Mukhetu eye udi nu lukwikilu lwa ngolo! " ndaga wa tshigina idi mu salama." Mu tangwa diene mona-mukhetu wa belugile. ²⁹ Yesu wa katugile hama hene wa yile phene-phene nu gijiba gia koma gia Galileya. Wa yile mu khala ha ga mulundu ga moshi? ³⁰ Athu a vula ejile gwa Yesu, ha gu mu batela athu a malu a fwa, nu athu a meso a fwa, nu tutabu, nu athu ako a gimbefu gia phila- nu- phila. Athu wawa a tuludiye ha malu a Yesu mukunda Yesu a a belule. ³¹ Athu a yitugile mwa vula, tangwa a monele tutabu mu zwela, ifwa malu mu wenda, ifwa meso mu mona, hene a yandigile guvutula lukumu gwa Nzambi wa Izrayele. ³² Yesu wa tamegele alongogi enji, wa a lezele egi: " Ngu mu mona khenda mukunda nu athu wawa a kita ilumbu ya vula nu Eme a konda gima gia gudia. Nga tshiginile go gu a vutula mu jinzo jiawo nu nzala; mukunda a mbo hwila mwa vula mu njila." ³³ Alongogi a hudile Yesu egi: " Haha tudi mu temu, gwi ta jiya gumona ima ya gudia ha guhwa athu wawa? ³⁴ Yesu egi: " Mudi nu mapha gutshi? " A vutudile egi: " Mapha sambwadi, nu ga ndambu ga itshidi ya jiswi. " ³⁵ Ebuna Yesu wa lezele athu ha gudi tumbiga ha mwangu. ³⁶ Tangwa didi Yesu wa zudile mapha ene a sambwadi nu itshidi ya jiswi, wa vutudile matondo gwa Nzambi, wa batudile mapha nu jiswi itshidi-itshidi, wa hwile alongogi ha gu kaphela athu? ³⁷ Athu akima a dile a kuta. Ebuna alongogi a nonele itshidi ya mapha nu itshidi ya jiswi a zalesele milongo sambwadi. ³⁸ Athu wanyi a dile madia a khalele a mala mafunda-a-wana, konda gutanga akhetu nu ana. ³⁹ Ebuna Yesu wa lezele athu ene ha guvutuga " ebuna mwene wa ngidile mu wato ha guzauga muya gu khanda ya dimbo dia Magadania.