¹ Gwa dile guma gwakia, mafumu akima a nganga-nzambi nu mambuta a gimvuga gia athu a yile mu ngila fondo ha gu kamba phila ya gu shiya Yesu. ² Tangwa a kangele shinga, a mu batele ha gu mu hana gwa fumu Pilato. ³ Yudasi wa mu yegudile, tangwa a monele egi Yesu wa kwateye ha gu shiyiya, wa vile khenda jia vula hene a yile mu vutudila nganga-nzambi nu mambuta a gimvuga khama jitatu jia falanga, mwene ⁴ wa zwelele egi: " nga salele gima gia bola tangwa nga yegudile menga a muthu yonu wa konda gu kita gima gia bola." Uvi a mu lezele egi: " Ya tu tala gu khi? Idi ndaga yaye." ⁵ Hene wa bishidile phata jene jia falanga mu katshi dia inzo ya isambu, wa zogele ha guya mudi kanda shinga. ⁶ Fumu wa nganga-nzambi wa zangudile falanga jene hene a zwelele egi: " Shigo ishi mu tu hwa nswa go ha gu vutula falanga jiji mu sundugu ya dibundu, mukunda jidi falanga jia gimenga." ⁷ Gu nyima ya gudi visa a sumbile gitshidi gia mavu gwa muthu mu moshi mwenia gu londa nzungu mukunda nu gu funda a nzenza akima a khalele mufwa. ⁸ Hene gilanga giene gia nu tamegeya nu magino egi:" gilanga gia menga." ⁹ Hene ndaga ya zwelele profeta Yeremia ya lungisamele egi: " a zudile khama jitatu jia falanga, thalo yinyi ya hageye gwa enya gu Izalayele mukunda nu muna muthu, ¹⁰ thalo yene ya haneye ha gu sumba gilanga gwa mwenia gu londa nzungu, mu phila Fumu a ngu lezele." ¹¹ Yesu wa maganele gu twama dia fumu wa gitshidi ha gu samba, hene fumu wa dimbo wa mu hudile egi: " Keti udi wa fumu wa ba yuda? Yesu wa vutudile egi: " Eya wa zwela". ¹² Tangwa yesu a fundiye gu twama dia mafumu a nganga-nzambi nu mambuta a gimvuga gia athu, gwa vutudile go ata gima. ¹³ Hene Pilato a mu lezele egi: " keti ushi mu vwa go ndaga adi mu gu fundila? ¹⁴ Uvi mwene gwa vutudile go ata gima, hene fumu wa dimbo a yitugile mwa vula. ¹⁵ Fumu wa dimbo wa khalele nu gikalulu mu konso khinji ha gu bembela gimvuga gia athu mwenia bologo mu moshi. ¹⁶ Mu tangwa diene dinyi, gwa khalele nu mwenia bologo mu moshi wa jiyanele mwa vula mu jina dia Barabasi. ¹⁷ Hene, tangwa gimvuga gia athu a di bungishile, Pilato wa a hudile egi: " Nanyi mwa tshigina ngu mi bembele? Barabasi to Yesu udi mu tamegeya egi Kilisto?" ¹⁸ Mukunda wa khalele mu jiya egi a mu yegudile mukunda nu gingonzo. ¹⁹ Mu phila a khalele wadi tumbiga gu twama dia hama ha nu sambesa, mukajenji wa mu tumile ndinga egi: " gu ngila ndo ndaga ya muthu yogu wa konda gu kita gima gia bola; mukunda nga mona phashi jia vula gu nzoji nga lota magino mukunda nu mwene." ²⁰ Fumu wa nganga-nzambi nu mambuta a gimvuga gia athu a bendele athu matshi ha gu lomba Barabasi, uvi ha gu shiya Yesu. ²¹ Fumu wa dimbo wa a hudile egi: " Nanyi mu katshi dia athu wawa muyadi mwa tshigina ngu mu bembele? A zwelele egi: " Barabasi." ²² Pilato wa a hudile egi: " Ikhi nga jiya gu kita Yesu udi mu tamegeya egi Kilisto? A vutudile khungiawo akima egi: " Mu hage holu dia khulunji." ²³ Wa hudile egi: " Mukunda nu ikhi, gima khi gia bola mwene a kiti?" Uvi ene a kabugile mu ngololo egi: " Mu hage holu dia khulunji." ²⁴ Pilato gwa monele nji go ata gima giko gia gu kita, mu phila makelele a balegesele giteso, wa zudile meya, wa wovele mago gu twama dia gimvuga gia athu nu gu zwela egi: " Ndaga ya lufwa lwa muthu yogu ishi mu ngu talela go; idi mu mi talela enwe hakhenu." ²⁵ Athu akima a vutudile egi: " Menga enji a bwe holu dia mitwe yetu nu ya anetu." ²⁶ Hene wa bembele Barabasi uvi wa betesele Yesu fimbu nu gu mu hana ha guya mu hageya holu dia khulunji. ²⁷ Masuta a fumu wa dimbo a mu batele Yesu mu inzo ya fumu gunu a bungishile gimvuga gikima gia masuta. ²⁸ A mu katudile milele, a mu sudigile lopho dia banga. ²⁹ A londele giphu gia isongesa, a mu hagele nagio gu mutwe, a mu hagele gitshidi gia mutshi gu koko dia madia, gu nyima a fugamele gu twama dienji, a mu lelele nu gu zwela egi: " Wa banda fumu wa ba yuda!" ³⁰ A mu tshidile mate, a zudile gitshidi gia mutshi unu a mu betele holu dia mutwe. ³¹ Gu nyima ya gu mu lela, a mu katudile lopho, a mu vutudile milele yenji, hene a mu batele ha guya mu mu haga holu dia khulunji. ³² Tangwa a zogele muya, a monele muthu mu moshi mwenia gu Sirene jina dienji Simoni, a mu bangigile ha guya nawo mukunda a bate khulunji ya Yesu. ³³ A kumile hama ha nu tamegeya egi Gologota disongidila:" hama ha mikuwa ya mitwe". ³⁴ A mu nwishile vinu dia gu fungisa nu meya a lula; uvi tangwa a phagele, wa tunyile ha gunwa. ³⁵ Gu nyima ya gu haga holu dia khulunji, adi kaphele milele yenji ha gu budila ubwadi; ³⁶ hene a di tumbigile a yandigile gu mu langidila. ³⁷ Holo dia mutwe wenji a sonegele gikuma ginyi a kwatele egi: " Yogu Yesu Fumu wa ba yuda". ³⁸ Nzangi jiyadi jia hageye nenji holu dia khulunji, mu moshi gu koko dia madia muko gu koko dia gihidi. ³⁹ Athu wanyi a khalele mu balega a khalele mu mu shingana nu gudi hunga mitwe ⁴⁰ nu gu zwela egi: " Eye wa tshiginile gu bwisa inzo ya isambu ha gu i tunga gu nyima dia ilumbu itatu, di guluse ha khaye. Gula udi wa muna Nzambi, tuluga ha khulunji". ⁴¹ Giteso gi moshi, mafumu a nganga-nzambi a khalele nji gu mu lela nu alongi a shigo nu mambuta a gimvuga nji a khalele mu zwela egi: ⁴² " Wa gulushile athu ako, uvi gwa jiyile go gudi gulusa mwene hakhenji. Gula udi Fumu wa Izalayele; a tuluge ha khulunji, nganyi tu mu kwikile. ⁴³ Wa nu haga mutshima gwa Nzambi; Nzambi mwene a mu guluse gula wa nu mu tshigina, mukunda wa zwelele egi: " Ngu di nga muna Nzambi". ⁴⁴ Nzangi mu moshi wa hageye nenji ha khulunji wa yandigile gu mu shingana. ⁴⁵ Katuga tangwa dia sambano nu tangwa dia uvwa, phipha ya bwile mu thotho ikima. ⁴⁶ Ha gu mona tangwa dia uvwa, Yesu wa kabugile mu ndinga ya ngolo egi: " Eli, Eli, lama sabakatani?" disongidila egi: " Nzambi wami mukunda nu khi wa ngu bemba? ⁴⁷ Tangwa athu ako wanyi a khalele hene a vile nganyi, a zwelele egi: " Udi mu tamega Eliya". ⁴⁸ Mu mbala imoshi, mu moshi mu katshi diawo wa zudile phushi wa yile mu zula sasula imoshi, wa i zalesele nu vinu dila kwa we jile mu mu hwa a nwe. ⁴⁹ Athu ako a zwelele egi: " Mu bembenu; tu tale gula Eli wa mbo za ha gu mu gulusa." ⁵⁰ Yesu wa kabugile mbala iko mu ndinga ya ngolo, wa zenzele monyo. ⁵¹ Hene henyanyi, mulele wa nu tshiga hama ha santu mu inzo ya isambu wa taugile mu itshidi iyadi katuga gosa nu hoshi; mavu a nyiganele, maseso a koma a taugile. ⁵² Majiamo a kangugile, athu wanyi a vula a ba santu a file a futumugile. ⁵³ A zogele mu majiamo, gu nyima ya gu futumuga gwa Yesu a ngidile mu dimbo dia santu enji athu a vula a amonele. ⁵⁴ Tangwa fumu wa masuta nu wanyi a khalele nawo ha gu mu langidila a monele phila mavu a nyiganele nu phila ndaga ya khalele mu balega a vile woma wa vula hene a zwelele egi: " Ya kielega muthu yogu udi Muna Nzambi." ⁵⁵ Akhetu a vula a hatele Yesu katuga gu Galileya wanyi ejile gu mu twala a khalele hene, mu talela ndaga jene gwa leha. ⁵⁶ Mu katshi diawo gwa khalele Mariya wa gu Magadala, Mariya wa gina Zake nu Yozefi, nu gina ana a Zebedeyo. ⁵⁷ Mu gingweze, muthu mu moshi wa mvwama wa gu dimbo dia dia Arimateya, jina dienji Yozefi we jile mu zoga hene, wa khalele nu mwene longogi wa Yesu. ⁵⁸ Wa yile mu mona Pilato ha gu lomba mvumbi ya Yesu. Pilato wa hanele nswa ha gu mu hwa nayo. ⁵⁹ Yozefi wa zudile mvumbi ya Yesu, wa i langele ha madikanyi a bonga, ⁶⁰ wa yile mu funda mvumbi yene gu majiamo enji wanyi mwene hakhenji a hagele mu katshi dia seso. Gu nyima wa kangele seso diko dia koma ha mufulo wa majiamo ene, gu nyima wa yile genji. ⁶¹ Mariya wa gu magadala nu Mariya muko a khalele hene, a di tumbiga ha sambwa dia majiamo. ⁶² Mu gilumbu gia hatele, gu nyima dia gilumbu gia gu di longa, mafumu a nganga-nzambi nu afalisaye a di bungishile gu twama dia Pilato. ⁶³ A zwelele egi: " Fumu, tu di mu yibuga egi tangwa muthu yogu wa luvunu a khalele nu monyo, wa zwelele egi: " Gu nyima dia ilumbu itatu mba udi mu futumuga." ⁶⁴ Hana nswa mu phila egi majiamo aye a langidiye ti nu mu gilumbu gia gitatu gula ndo alongogi enji a jiya guza mu kuya mvumbi aye a zwele gwa athu egi: " Wa futumuga gu lufwa"; luvunu lulu lwa suga mba ludi mu balega lunu lwa thomo." ⁶⁵ Pilato wa a lezele egi: " Gindenu mu langidile mu phila mwa tshigina". ⁶⁶ A yile mu haga masuta ha gu langidila majiamo, a kangele seso ha mufulo wa majiamo.