¹ Mu tangwa Yesu a manesele gulonga, wa lezele alongogi enji egi: ² " Jiyenu egi sungi ya page ya bega ilumbu iyadi, enji muna muthu mba udi mu haneya ha gu hageya ha khulunji." ³ Hene mafumu a nganga-Nzambi nu ma mbuta adi bungishile mu luphango lwa Gayifa, fumu wa nganga-Nzambi. ⁴ A hagele fondo ha gukwata Yesu mu giswegi Mukunda nu gu mu shiya. ⁵ Mukunda a zwelele egi: " Mwa bonga ndaga yene ile gu salama ndo mu sungi ya wadi, mu phila egi mavanga gu zoga ndo mu katshi dia athu." ⁶ Yesu wa khalele gu betaniya mu inzo ya simoni mwenya hute, ⁷ mu phila a khalele gu mesa, mukhetu mu moshi we jile gwa mwene nu mulangi wa mananashi a thalo ya vula; wa a bundudile holo dia mutwe wa yesu. ⁸ Uvi, tangwa alongogi a monele nganyi, a vile khabu jia vula hene a zwelele egi: " Mukunda nu ikhi gu bolesa nganyi? ⁹ Mananashi wawa a bolo digiya mu thalo ya vula ha guhwa a sugami." ¹⁰ Uvi yesu wa jiyile ngindu jenji, wa zwelele egi: "Mukunda nu ikhi mudi mu monesa mukhetu yogu phashi? Wa kiti gima gia bonga mukunda nu eme. ¹¹ Mba mudi mu khala nu a sugami tangwa dikima, uvi mba ngu khala n'enu go tangwa dikima. ¹² Mu phila a ngu bundudila mananashi wawa mu mwila wami, wa i kiti ha gu yidiga ha gu ngu funda. ¹³ Mu masonga ngu mu mi leza egi, mu thotho ikima mba ilongeya sango yiyi ya bonga, ndaga ya mukhetu yogu mba idi mu zweleya ha gu mu tangiza." ¹⁴ Mu moshi mu katshi dia kumi nu muyadi, jina dienji Yudasi isikaliote, wa yile gwa mafumu a nganga-nzambi ¹⁵ wa a lezele egi: " Ikhi mwa mbo ngu hwa mukunda ngu mi hwe nenji?" A mu tuludile ibende makumi a tatu a falanga. ¹⁶ Katuga tangwa diene dinyi, wa yandigile gu kamba phila ya gu a hwa nenji. ¹⁷ Mu gilumbu gia thomo gia mapha a konda khishi, alongogi a hudile yesu egi: " Gwi udi mu tshigina tuye tu londe madia a khinji ya phage?" ¹⁸ Mwene wa vutudile egi: " Gindenu mu katshi dia dimbo mu inzo ya muthu mu moshi mu mu leze egi: "Longi wa zwelele egi: " Tangwa diami dia kuwa. Nga tshigina ha guza mudia madia a khinji ya phage mu inzo yaye nu alongogi ami." ¹⁹ Alongogi a kitile ndaga mu phila Yesu wa a lezele hene a yile mu londa madia a khinji ya phage. ²⁰ Mu gingweze giene, wa khalele ha mesa nu alongogi enji kumi nu muyadi. ²¹ Tangwa a khalele mudia, wa zwelele egi: " Mu masonga ngu mu mi leza egi, mu moshi mu katshi dienu wa ngu diga." ²² A bwile khungiawo akima khenda-khenda hene a yandigile gu mu hula egi: " Keti eme, Fumu?" ²³ Mwene wa vutudile egi: " Yonu wa bonda koko dienji nu diami mu longa di moshi, udi mwene wa mbo ngu diga. ²⁴ Muna muthu udi muya mu phila ya sonegeye mukunda nu mwene. Uvi phashi jia vula gwa muthu yonu udi mu diga muna muthu! Ya bolo khala mwa bonga gula nga gwa butugile go." ²⁵ Yudasi, yonu wa tshiginile gu mu diga, wa mu lezele egi: " Keti idi eme Fumu?" Mwene wa mu vutudile egi: " Eye ha khaye wa zwela." ²⁶ Mu phila a khalele mudia, Yesu wa zudile dipha, wa di sagumunile, enji wa di khesele itshidi-itshidi. Mwene wa hwile alongogi nu gu zwela egi: " Zulenu mu die. Mukunda wuwu udi mwila wami." ²⁷ Wa zudile kopho enji wa vutudile matondo. Wa a hwile kopho diene nu gu zwela egi: " Nwenu khungienu akima; ²⁸ mukunda wawa adi menga ami, wanyi a gudi visa gwa pha wanyi mba a bishidiya mukunda nu athu a vula, ha gu katula gubola. ²⁹ Uvi eme ngu mu mi leza egi, mba ngu shi mu nwa nji go meya a bundu didi dia vino, ti nu gilumbu ginyi mba ngu a nwa nji nenu mu Gifumu gia Shami." ³⁰ Gu nyima ya gu yimba khunga, a yile gu mulundu wa mitshi ya ba olive. ³¹ Gunu Yesu wa a lezele egi: " Enwe mu mu ngu bemba mu gingweze gia magino; mukunda ya sonegeye egi: "Mba ngu beta mubambi wa mameme gu nyima mameme mba adi mu phanzana." ³² Uvi gu nyima mba ngu futumuga gu lufwa mba ngu mu mi diangela gu Galileya." ³³ Uvi piele wa mu lezele egi: " Ata akima mba adi mu gu bemba, eme mba ngu shi mu gu bemba go." ³⁴ Yesu wa mu lezele egi: "Mu masonga ngu mu gu leza egi, kaka mu phipha yiyi, gu twama kolombolo di dile, udi mu ngu tuna mbala jitatu." ³⁵ Piele wa mu lezele egi: " Ata idi ya gufwa naye, nga jiyile go gu gutuna." Hene alongogi akima a zwelele giteso gi moshi. ³⁶ Gu nyima Yesu wa yile nawo hama ha moshi ha nu tamegeya egi gesetemane enji wa lezele alongogi enji egi: "Di tumbigenu haha mu tangwa ngu phusana ga ginano ha gu samba." ³⁷ Wa zudile Piele nu ana muyadi a zebedeyo, gu nyima wa yandigile gu monesa khenda nu guvwa woma. ³⁸ Gu nyima wa a lezele egi: " Monyo wami udi mu katshi dia khenda jia vula, ti nu tangwa dia lufwa. Begenu haha enji khalenu mu sungidila." ³⁹ Wa yile ga ndambu gu twama, wa bwile wa shiwudile meso hoshi wa sambele egi: " Tata, gula phila idi gwene, phusa kopho yiyi gu twama diami. Ishi go mu phila ngudi mu tshigina, uvi i khale mu phila udi mu tshigina." ⁴⁰ Wa vutugile gwa khalele alongogi wa a sangele gu tulo. Hene a lezele piele egi: " Ikhi? Mwa jiyile go gu sungidila ata tangwa di moshi? ⁴¹ Sungidilenu enji sambenu mukunda mule gubwa ndo mu ndaga jia bola. Pheve idi ya gudi londa, uvi mwila udi phetephete." ⁴² Wa vutugile mu mbala ya giyadi wa sambele egi: " Tata gula ishi go nu phila egi kopho didi diye gwa leha nu eme mu phila egi ngule gu dinwa ndo, kaka luzolo lwaye lu salame." ⁴³ We jile mu vutuga wa a sangele gu tulo; uvi meso awo a khalele a nema nu gu hwila. ⁴⁴ Hene wa a bembele nji wa vutugile. Wa sambele mu mbala ya gitatu nu gu zwela ndaga jia phila imoshi. ⁴⁵ Gu nyima, Yesu we jile mu vutuga gwa khalele Alongogi wa a lezele egi: " Mwa bandi genu nu gu hululuga genu nji? Talenu, tangwa dia kuwa ha gu mona egi Muna Muthu wa haneya ha mago a athu a masumu. ⁴⁶ Zugenu tuye. Tala, yonu udi mu ngu diga wa phusana." ⁴⁷ Tangwa a khalele nji mu zwela, Yudasi, mu moshi mu katshi dia kumi nu muyadi we jile mu zoga. Gibuga gia athu a vula a katugile gwa mafumu a nganga-Nzambi nu mambuta a gimvuga gia athu ejile nenji. Ejile nu phogo jia khusa nu itshidi ya mitshi. ⁴⁸ Muthu yonu wa digile yesu wa a lezele egi: " Muthu yonu nga mbo yamba, mwene, mu kwatenu." ⁴⁹ Mu mbala imoshi, we jile gwa yesu enji wa zwelele egi: " Wa banda fumu! wa mu yambele. ⁵⁰ Yesu wa mu lezele egi: " Yala, kita gima ginyi we ji mu kita." Hene ejile, a mbile yesu mago a mu kwatele. ⁵¹ Mu moshi mu katshi dia wanyi a khalele nu yesu wa sununile koko dienji wa nanele phogo yenji ya khusa wa khesele ditshi dia muthu wa gisalo wa fumu wa nganga-Nzambi. ⁵² Yesu wa mu lezele egi: " Vutula phogo yaye ya khusa mu gitshigo giayo, mukunda wanyi akima mba a salela phogo ya khusa mba a shiyiya gu phogo ya khusa. ⁵³ Ushi mu yindula go egi nga jiya gu tamega Shami a ngu tumile gimvuga gia ma wanjio gubalega kumi nu muyadi? ⁵⁴ Uvi phila khi ndaga ya sonegeye ya jiya gulungisama gula ndaga yiyi nu gu salama go?" ⁵⁵ Kaka mu tangwa diene dinyi, yesu wa lezele gibuga gia athu egi: " Mwe'ji nu itshidi ya mitshi nu phogo jia khusa ha gu ngu kwata ule nga nzangi? Nga khalele ilumbu ikima nga di tumbiga mu katshi dia inzo ya isambu mu longa, uvi mwa ngu kwatele go. ⁵⁶ Uvi ndaga yiyi ya salama mukunda nu gu lungisama gwa ndaga ba profeta a sonegele." Hene henyanyi alongogi akima a mu bembele hene a lengele. ⁵⁷ Wanyi a kwatele yesu a mu batele gwa kayifa fumu wa Nganga-Nzambi, gunu gwa khalele alongi a shigo nu ma mbuta adi bungisa. ⁵⁸ Phetelo wa khalele mu hata gwa leha- leha ti nu mu luphango lwa fumu wa nganga-nzambi. Wa ngidile mu luphango wadi tumbigile mu khelelego ya masuta a nu langidila ha gu tala ndaga mu phila jia mbo balegela. ⁵⁹ Ma fumu a nganga-nzambi nu athu a gimvuga a khalele mu kamba phila ya gu mbila yesu mambo, mukunda nu gu mu shiya. ⁶⁰ Uvi a monele go ata gima, ata ndaga jia mambo jia vula jia zweleye. Gu twama athu mu yadi ejile ⁶¹ a zwelele egi: " Muthu yogu wa zwelele egi "Nga jiya gu phanza inzo yiyi ya Nzambi ha gu itunga mu ilumbu itatu." ⁶² Fumu wa nganga-nzambi wa zugile enji wa zwelele egi: " Ushi mu vutula go ata gima?" Ndaga khi jiji athu wawa adi mu gu tela gimbangi? ⁶³ Uvi, yesu wa henele tedie. Fumu wa nganga-nzambi wa mu lezele egi: " Nga guhwa nswa mu jina dia Nzambi wa monyo ha gu tu leza gula udi wa Kilisto, Muna Nzambi." ⁶⁴ Yesu wa mu vutudile egi: " Wa zwela eye ha khaye. Uvi ngu mu gu leza egi, mba udi mu mona Muna Muthu wadi tumbiga gu koko dia madia dia ngolo jia katuga mu matuta a gosa." ⁶⁵ Hene fumu wa nganga-nzambi a taudile mulele wenji enji wa zwelele egi: " Wa shingana! Keti tudi nji nu funu ya gimbangi? Talenu, mwa vwa hakhenu phila a shingana. ⁶⁶ Ikhi mudi mu yindula?" A vutudile egi: " Ta tshigina a shiyiye." ⁶⁷ A yandigile gu mu tshila mate gu meso, gu mu beta mbata, ⁶⁸ nu gu zwela egi: " tondolola kilisto nanyi wa gu beta?" ⁶⁹ Phetelo wadi tumbigile hoshi honze mu mbandanzo, mona gisalo mu moshi wa mukhetu we jile gwa mwene enji wa zwelele egi: " N'eye wa khalele nu yesu mwenya gu galileya." ⁷⁰ Uvi mwene wa tunyile gu twama dia athu akima egi: " ngu shi gami mu jiya go ikhi udi mu zwela." ⁷¹ Tangwa a khalele muya gu khanda ya mufulo wa gu zogela, mona gisalo muko wa mukhetu wa mu monele hene a lezele wanyi a khalele hene egi: " Muthu yogu wa khalele nu Yesu wa gu nazaleti." ⁷² Hene a mu tunyile mbala iko nu gudia giba egi; " ngu jiya go muthu mwene." ⁷³ Gu nyima dia ga tangwa, wanyi a khalele hene a monele hene a lezele phetelo egi: " idi ya kielega n'eye udi mu moshi wa mu katshi diawo; mukunda gifwanisu giaye gi mu gu funda." ⁷⁴ Hene a yandigile gu a bubila nu gudia giba egi: " Ngu jiya gami go muthu mwene." Hene henyanyi, kolombolo dia didile. ⁷⁵ Phetelo wa yibugile ndaga jia mu lezele yesu egi: " Gu twama kolombolo di dile, mba udi mu ngu tuna mbala ji tatu." Hene a zogele wa yandigile gu dila mu ngololo.