¹ Hene Gifumu gia gosa gia fwanana nu akhetu kumi wanyi a jiya go mala a zudile soga jia tshiya ha guya mu tagana yala yonu wa kwelele. ² Mu tano mu katshi diawo a khalele a unga mu tano ako a khalele a tema. ³ Wanyi a unga a zudile soga jia tshiya, a jimbidile gawo ha guzula mafuta. ⁴ Uvi wanyi a tema a zudile nzungu jia mafuta nu soga jiawo jia tshiya. ⁵ Yala yonu wa makwela wa shiphile ha guza, khungiawo a kima a bwile gu tulo. ⁶ Uvi mu katshi-katshi dia phipha, a vile dizwi dia kabugile mu ngolo egi: " Talenu! yala wa makwela mwenyowu muza! Gindenu ha gu mu tagana!" ⁷ Hene henyanyi akhetu akima a zugile gu tulo a yandigile gu londa soga jiawo jia tshiya. ⁸ Wanyi a unga a lezele wanyi a tema egi: " Tu hwenu ga ndambu ga mafuta enu mukunda soga jetu jia tshiya jidi mu jima!" ⁹ Uvi wanyi a tema a vutudile egi: " mbala iko a shi mu kuwa go mukunda n'etwe n'enwe, hene gindenu gwa athu wanyi a nu diga mudi sumbile ha khenu." ¹⁰ Tangwa a khalele muya mu sumba, yala wa makwela wa kumile, wanyi a khalele phene-phene a yile mu ngila nenji gu khinji ya makwela, enji mufulo wa kangeye. ¹¹ Gu nyima, wanyi a unga ejile mukuma a zwelele egi: " Fumu, fumu tu kangudile mufulo." ¹² Uvi mwene wa vutudile egi: " Ngu mu mi leza mu masonga egi, ngu shi mu mi jiya go." ¹³ Hene mu khala mu kengelela mwa bonga mukunda mushi mu jiya go gilumbu nu tangwa. ¹⁴ Mukunda mba ikhala gifwa tangwa muthu mu moshi wa tshiginile guya gu dimbo diko. Mwene wa tamegele athu enji a gisalo wa a hwile gimvwama gienji gikima. ¹⁵ Gwa mu moshi wa mu hwile phata jitano jia falanga, gwa muko phata jiyadi gwa muko nji phata imoshi. Muthu mukima wa zudile thalo mu phila ya gutema gwenji hene muthu mwene wa yile genji mu wenda. ¹⁶ Hene henyanyi, yonu wa zudile phata jitano wa ji vudishile wa zudile phata jiko jitano. ¹⁷ Giteso gi moshi yonu wa zudile phata jiyadi wa butishile jiko jiyadi. ¹⁸ Uvi muthu wa gisalo yonu wa zudile phata imoshi wa yile mu haga wina goshia mavu, hene a vumbigile phata ya falanga ya fumu wenji wa gisalo. ¹⁹ Gu nyima mwa vula, fumu wa athu a gisalo we jile mu vutuga wa a lombele a te maga a gisalo gienji. ²⁰ Muthu wa gisalo yonu wa zudile phata jitano jia falanga we jile nu phata jiko jitano wa zwelele egi: " Fumu, wa ngu hwile phata jitano. Tala, phata jiko jitano holu dia jinyi wa ngu hwile jiji." ²¹ Fumu wenji wa mu lezele egi: " Mwa bonga, udi wa muthu wa gisalo wa masonga! Udi nu masonga gu ima ya gabiyo; ngu mu gu haga ha gutala ima ya vula. Ngila mu kiese gia fumu waye." ²² Muthu wa gisalo yonu wa zudile phata jia falanga jiyadi we jile muzwela egi: "Fumu wa ngu hwile phata jiyadi jia falanga. Tala nga yiga phata jiko jiyadi holu dia jinyi wa ngu hwile." ²³ Fumu wenji wa gisalo wa mu lezele egi: " Mwa bonga sha, udi wa muthu wa gisalo wa masonga! Udi nu masonga mu ima ya gabiyo, ngu mu guhwa ima iko ya vula. Giza ngila mu kiese gia fumi'aye." ²⁴ Gu nyima, muthu wa gisalo yonu wa zudile phata imoshi ya falanga we jile enji wa zwelele egi: " Fumu, ngu mu jiya egi udi wa muthu mu moshi wa bala. Wa nu katula mabundu hama hanyi wa dile gu kuna ndo enji wa nu zula gaye mabundu nu wanyi wa dile gaye guteta. ²⁵ Nga vile gami woma, hene nga yile gami mu swega phata yaye ya falanga hoshi mu mavu. Tala phata yaye ya falanga yiyi." ²⁶ Fumienji wa gisalo wa mu vutudile egi: " wa muthu wa bola enji wa molo, wa jiyile egi nga nu katula mabundu hama hanyi nga kunyile go. ²⁷ Nga wa yile mu haga phata yami ya falanga mu inzo ya nu bumbiya falanga mu phila egi ha gu vutuga gwami mba ngu zule phata yami ya falanga nu nuta holu." ²⁸ Mu tambulenu phata ya falanga i hwenu muthu yonu udi nu phata kumi. ²⁹ Mukunda yonu udi nu ima mba udi mu hwiya ima ya balegesa gu vula uvi, yonu gwa shi go nu gima mba udi mu tambudiya nu gabiyo ganyi adi nago. ³⁰ Bishilenu muthu wa gisalo wa phamba gonze, gunu mba a khala mu dila nu gudi sumana mazo." ³¹ Tangwa Muna Muthu mba eza mu vutuga mu khembo yenji nu ma wanjio akima, mba ukhala holo dia gife gia gifumu mu khembo. ³² Ikanda ikima mba idi bungisa gu twama dienji enji mba udi mu kapha athu ene nu ene mu phila mu tadi wa imeme a nu kapha mameme nu khombo. ³³ Mba udi mu haga mameme gu koko dia madia, khombo gu koko dia mahidi. ³⁴ Hene fumu mba u leza wanyi mba a khala gu koko dia madia egi: " Izenu enwe mwa hwiye lusagumunu gwa shami, mu zule gifumu gia londeye mukunda n'enwe katuga luyandigu lwa thotho. ³⁵ Mukunda nga khalele mu nzala mwa ngu hwile go ima ya gudia; nga khalele nu luhungu mwa ngu hwile go meya a gunwa; nga khalele mu wenyi mwa ngu yambele go; ³⁶ nga khalele thowa mwa ngu sudigishile go; nga khalele nu misongo mwa ngu sasele go; nga khalele mu bologo mwe jile go mu ngu tala." ³⁷ Hene athu a mitshima ya bonga mba a vutula egi: " Fumu, tangwa khi ta gu monele nzala hene twa dile gu guhwa go ima ya gudia? Nga ndo wa khalele nu luhungu ta gu nwishile go? ³⁸ Enji tangwa khi ta gu monele mu wenyi, hene twa dile gu gu yamba ndo? Nga ndo wa khalele thowa hene twa dile gu gu sudiga ndo? ³⁹ Enji tangwa khi wa khalele nu misongo, nga ndo mu bologo twa gu salesele go? ⁴⁰ Hene fumu a vutudile egi " Mu masonga ngu mu mi leza egi, gima gikima mwa kitile gwa muthu mukima yonu udi mu monega egi mona mutumba mu katshi dia a phangi, idi gwa eme mwa kitile." ⁴¹ Gu nyima wa lezele wanyi a khalele gu koko dienji dia gihidi egi: " Katugenu gu twama diami, enwe mwa shinjiye; gindenu mu tshiya tunu twa yidigiye mukunda nu satana nu ma wanjio enji, ⁴² mukunda nga khalele nzala uvi enwe mwa ngu hwile go ima ya gudia; nga vile luhungu uvi enwe mwa ngu hwile go, eya a gunwa; ⁴³ nga khalele mu wenyi uvi enwe mwa ngu yambele go; nga khalele thowa uvi enwe mwa ngu sudigishile go; nga khalele nu gu kata enji mu bologo uvi enwe mwa ngu salesele go." ⁴⁴ Hene mba adi mu vutula egi: "Fumu, tangwa khi ta gu monele udi nu nzala, nga ndo udi nu luhungu, nga ndo mu wenyi, nga ndo thowa, nga ndo nu gukata, nga ndo mu bologo, hene ta dile gu gusalesa ndo? ⁴⁵ Hene mwene mba u vutula egi: "Mu masonga ngu mu mi leza egi, inyi ikima mwa kitile go gwa mu moshi mu katshi ata yonu udi gabiyo, mwa salele go mukunda nu eme." ⁴⁶ Akima gawo mba adi muya mu phashi jia konda suga uvi wanyi mba a nunga mba adi mu zula monyo wa mvula ji kima."