¹ Yesu wa zogele mu inzo ya Isambu wa yile genji. Alongogi enji ejile phene-phene nenji ha gu mu monesa phila inzo ya Isambu ya tungiye. ² Yesu wa a vutudile egi: " Keti mudi mu mona ndaga jiji jikima? Mu masonga ngu mu mi leza egi, ata seso di moshi mba dishi mu bega go holu dia seso diko akima mba a mu bwa." ³ Mu tangwa adi tumbigile ha mulundu wa mitshi ya ba olive, alongogi ejile mu mu mona mu giswegi a mu hudile egi: " Tu leze tangwa khi ndaga jiji mba ji salama. Idimbu khi mba i leza gu vutuga gwaye nu gu leza suga jia ndaga gi kima jia hoshia mavu?" ⁴ Yesu wa a vutudile egi: " Mu keba, muthu gu mi dimba ndo. ⁵ Mukunda a vula mba eza mu jina diami nu gu zwela egi: " Eme Kilisto, " enji athu a vula mba a tota. ⁶ Mba mudi mu vwa makelele a itumba nu itumba ya phila nu phila; mu digima go, mukunda ndaga jiene jikima ji feto salama, uvi mba ishi go mu khala ha suga ya ndaga. ⁷ Mukunda dimbo di moshi mba di mu lwisa dimbo diko, gifumu gi moshi mba gidi mu lwisa gifumu giko. Nzala mba idi mu ngila mavu mba a mu nyigana mu khanda jikima. ⁸ Uvi ndaga jiji jikima mba ji khala ha luyandigu lwa phashi jia gubuta. ⁹ Mba adi mu mi hana ha mago a athu ha gu mi shiya. Membo akima mba adi mu mi vweza mukunda nu jina diami. ¹⁰ A vula mba a shalumuga. Mba adi mudi vweza nu gudi menga mu katshi diawo. ¹¹ Ba profeta a vula a luvunu mba adi mu dimba athu a vula. ¹² Mukunda gikalulu gia gu kita ndaga jia bola mba gi mu bwa gia vula, nji gu tshigina gwa athu ako mba gudi mu bwa gwa leba. ¹³ Uvi yonu mba u kanga mutshima ti nu ha suga mba udi mu guluga. ¹⁴ Sango ya bonga ya gifumu mba idi mu longeya mu mavu akima, mukunda nu guta gimbangi mu mavu akima. Gu nyima mba khala suga jia ndaga jikima. ¹⁵ Hene, mu tangwa mba mu mona ndaga jia bola jinyi jia nu bata lufwa jinyi profeta Daniel a zwelele jia zuga ha gife gia santu (bemba muthu udi mu tanga a jiye), ¹⁶ wanyi mba a khala gu Yudeya mba a yandiga gu lenga gu milundu, ¹⁷ yonu udi gosa holu dia kangu dia gisapha mba gwa bulumuga go ha guza mu zula konso gima ginyi, ¹⁸ yonu mba mba u khala mu gilanga gwa vutuga go mu inzo yenji ha guza mu zula gazau genji. ¹⁹ Khenda gwa akhetu a mavumo nu gwa wanyi mba a khala mu nwisa ana mu ilumbu yene! ²⁰ Sambenu ha gu mona egi gu lenga gwenu gule gubwa ndo ha sungi ya gishiyo, nga mu gilumbu gia shigo. ²¹ Mukunda mu tangwa diene phashi mba ji khala jia balegesa guvula phashi ji moshi khanji ji bwa go katuga ha luyandigu lwa mavu ti nu magino enji phashi jiene mba jishi mu bwa nji go. ²² Gula ilumbu yene ishi go ya hihia, ata musunyi u moshi mba u guluga go; uvi mukunda nu wanyi a phoneye, ilumbu yene mba ikhala ya hihia. ²³ Hene gula muthu mu moshi wa mi leza egi: " Tala Kilisto udi haha, nga ndo Kilisto udi hanyi, mu kwikila go. ²⁴ Mukunda ba kilisto a mambo nu ba profeta a mambo mba a muza enji mba adi mu kita idimbu ya koma nu gu kita ndaga jia gu yituga, mukunda nu gu dimba gula phila idi gwene ata athu wanyi a phoneye. ²⁵ Tala, ngu mu mi temesa gu twama." ²⁶ Gula a mi leza egi: " Tala, Kilisto udi mu temu dia zala fufuta, muyi go gwene; nga ndo udi mu sugu imoshi ya bonga, mu kwikila go. ²⁷ Mukunda mu phila gweji gweji gia nzaji gia nu sema katuga gu mazogelo a tangwa muya ti nu gu matotelo a tangwa, mu phila yene yinyi guza gwa Muna Muthu mba gu khala. ²⁸ Hama hanyi ha kima mba ha khala mvumbi jia mbiji, hama hene henyanyi tunjila tutu ikwanga-nzala mba idi bungisa hene. ²⁹ Gu nyima ya ilumbu yene ya phashi, tangwa mba di bwa phipha, ngonda mba ishi mu sema go, themwa mba ji katuga gosa mubwa hoshi, enji ngolo jia gosa mba jidi mu nyigana. ³⁰ Gu nyima gidimbu gia Muna Muthu mba gi zoga gosa, enji ikanda ikima ya hoshia mavu mba idi mudi tenda. Muna Muthu mba udi muza gosa mu katshi dia matuta nu ngolo nu lukumu lwa koma. ³¹ Tangwa ngunga mba i bula, mba udi mu tuma ba wanjio ha gu bungisa athu a phoneye mu miphephe iwana katuga songi nu songi iko ya gosa. ³² Hatenu dilongi dia mutshi wa fige. Mu tangwa thango jenji jia pha jia nu bwa lebelebe enji jia nu zola mayiji, mba mu jiya egi gishiyo gidi phene-phene. ³³ Giteso gi moshi, gula mba mwa mona ndaga jene jikima, mba mu jiya egi udi phene-phene, ha mufulo. ³⁴ Mu masonga ngu mu mi leza egi, khukho yiyi mba ishi mu balega go ti nu tangwa ndaga jiji mba ji lungisama. ³⁵ Gosa nu hoshi mba a balega; uvi ndinga yami mba i balega go ata ha zonda. ³⁶ Gu yinyi idi mu talela gilumbu nu tangwa didi, ata muthu gwa shi mu jiya go, ata ba wanjio gosa, ata nji Mona, uvi Tata ha khenji. ³⁷ Mu phila ya tangwa dia Nowa, mba ikhala nganyi ha guza gwa Muna Muthu. ³⁸ Mukunda kaka phila imoshi mba ikhala mu ilumbu inyi ya gu twama dia mvula ya gikudi ye jile mu tangwa diene athu a khalele mudia mu nwa, mu kwela nu gu hana anawo a akhetu nu a mala mu makwela ti nu mu gilumbu ginyi Nowa a ngidile mu masuwa. ³⁹ A jiyile go ata gima ti nu tangwa dia jile mvula ya gikudi ha gu a shiya. Hene guza gwa Muna Muthu mba gu khala nganyi. ⁴⁰ Hene a mala muyadi mba a khala mu gilanga; mu moshi mba u zangudiya, mu moshi mba u bembeya. ⁴¹ Akhetu mu yadi mba a khala mu kula mabundu, mu moshi mba udi mu zudiya muko mba udi mu bembeya. ⁴² Mu khala mudi keba, mukunda mushi mu jiya go gilumbu Fumu wenu mba eza. ⁴³ Uvi khalenu mu jiya egi gula fumia inzo udi mu jiya tangwa khi nzangi mba eza, mwene mba u khala mu langidila ha gu konda gubemba gisapha gienji gi phanzeye. ⁴⁴ Hene nji enwe mu khala mwa yilama, mukunda Muna Muthu mba udi muza mu tangwa dia gisagumwisa. ⁴⁵ Nanyi muthu wa gisalo wa masonga nu gutema yonu, gula fumu wenji wa mu haga ha gu tala inzo nu guhwa athu a gisalo ima ya gudia mu tangwa dia bonga? ⁴⁶ Guswanguluga gwa vula gwa muthu yogu wa gisalo gula fumu mba uza gu mu sanga udi mu kita nganyi tangwa mba eza mu vutuga. ⁴⁷ Mu masonga ngu mu mi leza egi fumu mba udi gu mu mu haga ha gutala ima yenji ikima. ⁴⁸ Uvi gula muthu wa gisalo wa bola wa yandiga gudi zwelela mwene hakhenji egi: " Fumu wami gwa shi go muza mu vutuga lulu ngagi", ⁴⁹ enji wa yandiga gu beta athu ako a gisalo, mudia nu gunwa nu athu wanyi a nu lauga matombe; ⁵⁰ fumu wa gisalo mba uza mu vutuga mu gilumbu ginyi athu a gisalo ashi go mu jiya, nu mu tangwa dinyi ene a shi go mu yindula. ⁵¹ Fumu wenji mba udi gu mu haga hama hanyi ha nu hageya athu a mbala ji yadi, gunu mba gu khala gudila nu gudi sumana mazo.