1 Hene, yesu a lezele gimvuga gia athu nu a longogi enji. 2 Wa zwelele egi: " alongi a shigo nu afalisaye adi mudi tumbiga ha gife gia Moyize. 3 Hene ndaga jikima adi mu mi leza ha gu kita, kitenu ndaga jiene nu gu ji lungisa. Uvi mu sadi go ngada mu phila adi mu kita. Mukunda adi mu zwela ndaga uvi ashi go mu ji salela. 4 Eya, adi mu jitshiga inemo ya phashi ha gu bata, adi mu i haga ha phanga jia athu ako. Uvi ene ha khawo a nu tshigina go gu tuphula munwe u moshi ha gu bata. 5 Adi mu kita ndaga jiawo jikima mukunda a moneye gwa athu. Mukunda adi mu sudiga tu mishete twa koma ha mbombo nu mu mago ha gudi tanina, enji adi mu iga malenda ha gu lehesa songi jia milele yawo. 6 A nu tshigina gudi tumbiga ha gife jia lukumu hama ha mu kitiya khinji; nu gudi tumbiga mu ife ya thomo mu katshi dia jinzo jia isambu, 7 nu gu tshigina gu hwiya mbote jia lukumu mu ibunga ya athu, nu gu tshigina a tamegeye egi Longi gwa athu. 8 Uvi enwe mwa jiyile go gudi tamegesa egi: " Longi", mukunda mudi nu Longi mu moshi, enji enwe mudi mwa aphangi. 9 Mu tamega go ata muthu mu moshi haha hoshia mavu egi shenu, mukunda mudi nu shenu mu moshi, yonu udi gosa. 10 Mu tshigina go athu a mi tamege egi " Longi", mukunda mudi nu Longi mu moshi, Kilisto. 11 Uvi yonu udi muthu wa koma mu katshi dienu mba udi mukhala muthu wenu wa gisalo. 12 Yonu mukima udi mudi tuphula mba udi mu bulumwishiya, yonu mba udi bulumwisa mba udi mu kandwishiya. 13 Uvi khenda jia vula gwa enwe a longi a shigo nu afalisaye, enwe enya mambo! Mudi mu kanga athu njila ya Gifumu gia gosa. Mukunda enwe ha khenu mba mushi mu ngila go, hene mushi go mu tshigina guhwa athu wanyi a mu tshigina gu ngila 14 njila."Khenda gwa enwe a longi a shigo nu afalisaye, enya mambo! mudi muya mu tambula ima gwa akhetu a mifidi." 15 Khenda gwa enwe, a longi a shi nu afalisaye, enya mambo! mukunda mudi muya mu wenda gu khanda ya muta wa mungwa-mungwa nu gu khanda ya mavu a kima ha gu longa muthu mu moshi mu moshi. Gula gudi nu muthu wa tshigina ha gu kituga muthu wa gimvuga gienu, mudi mu mu bwisa muthu yonu wa gu balega gu bola, wa fwana guya gu bilungi, mu phila yenu ha khenu. 16 Khenda gwa Enwe, mudi mu twameza athu a fwa meso, Enwe mwa nu zwela egi: " Gula Muthu mu batula giba mu jina dia inzo ya isambu gwa kitile go gima gia bola. Uvi yonu wa batula giba mu jina dia wolo wa inzo ya isambu wa feto lungisa giba giene." 17 Enwe, ikata enji ifwa meso! ikhi ya balega funu, wolo, to inzo ya isambu inyi ya nu kitula wolo wa phelegeta? 18 Enji, yonu mukima wa batula giba mu jina dia mesa a gimenga gwa kitile go gima. Uvi gula muthu wa batula giba mu jina dia makapho wanyi adi holo dia mesa a gimenga wa feto lungisa giba giene." 19 Enwe ifwa meso, ikhi idi ya balega funu, makapho to mesa a gimenga a mu kitula makapho a bonga? 20 Hene, yonu wa batula giba mu jina dia mesa a gimenga wa batula giba mu jina dia mesa a gimenga nu mu jina dia ima ikima idi holu dia mesa ene. 21 Enji yonu wa batula giba mu jina dia inzo ya isambu wa batula mu jina dia inzo yene nu mu jina dia yonu wa nu jinga mwene. 22 Yonu wa batula giba mu jina dia gosa wa batula giba mu jina dia Nzambi nu mu jina dia yonu wadi tumbiga holu dia gife gia gifumu. 23 Khenda gwa enwe, alongi a shigo nu afalisaye, enwe athu a luvunu! mukunda mwa nu hana ga ndambu ga moshi ga makapho mu katshi dia ga ndambu kumi ga mayiji wanyi a nu hana lengo dia bonga, nu dia aneti nu kumini, uvi enwe mwa nu zweza ndaga jidi nu funu mu katshi dia shigo (Masonga, khenda nu lukwikilu). Jiji ndaga nga mwa kitile konda gu mona ndaga jiko phamba. 24 Enwe a twameji a meso a fwa, mudi mu yungula jinji uvi mudi mu minya mbiji jiji shamo. 25 Khenda gwa enwe, alongi a shigo nu afalisaye, enya luvunu! Mukunda wanu wova kopho nu malonga kaka gonze, uvi mu katshi adi a zala nu ima ya vula mwa nu tambula mu gingolo-ngolo. 26 Mu falisaye wa meso a fwa, udi mu wova ha thomo mu katshi dia kopho nu katshi dia longa, mukunda i phelegete gonze. 27 Khenda gwa Enwe, alongi a shigo nu Enwe afalisaye, enya luvunu! mukunda mwa fwanana nu majiamo a kungudiya luphemba, ha gu monega a bonga gonze, uvi mu katshi a zala nu mikuwa ya athu a file nu ima ikima ya mvindu. 28 Mu phila imoshi, enwe nji mudi mu monega athu a bonga gonze, uvi mu katshi mudi mwa zala nu luvunu nu ima ikima ya bola. 29 Khenda gwa Enwe, alongi a shigo nu afalisaye athu a luvunu! mukunda mudi mu tunga majiamo a athu a masonga. 30 Mwa nu zwela egi: " Gula nga ta jingile mu ilumbu ya a shetu, nga ta dibungishile go nawo ha gu mwanga menga a ba profeta." 31 Nganyi mudi mu ta gimbangi gienu hakhenu egi mudi mwa ana a wanyi a shiyile ba profeta. 32 Hene, Enwe salenu gisalo ginyi a shenu a yandigile. 33 Enwe mudi mwa nioga, mwa fwanana nu iwuta, phila khi mwa jiya gu lenga ndola ya gu bilungi? 34 Mukunda nu nganyi, nga mi tumila ba profeta, nu athu a tema nu alongi a shigo. Mba mudi mu shiya ako mu katshi diawo nu gu haga ako holu dia khulunji. Mba mudi mu beta ako nu fimbu mu katshi dia jinzo jienu jia isambu, nu gu hata ako ha gu a monesa phashi mu dimbo nu dimbo. 35 Gikuma giene menga a athu wanyi a masonga mba adi mu bwa holu dienu, katuga menga a Abel muthu wa masonga, ti nu gu menga a Zakari, muna Baraki, yonu mwa shiyile ha katshi dia hama ha santu nu mesa a gimenga. 36 Mu masonga, ngu mu mi leza egi, ndaga jiji jikima mba jidi mu bwila athu a khukho yiyi. 37 Yelusalemi, Yelusalemi, eye wa nu shiya ba profeta nu gu kwemba athu wanyi a nu gu tumiya maseso! mbala gutshi nga tshiginile gu bungisa anaye, mu phila suswa ya nu bungisa tu nenji moshia mavuji enji, uvi wa tshiginile go. 38 Tala, gisapha giaye gia bega gi thugu. 39 Mukunda nga mi lezele egi, mba mu ngu monyi nji go katuga tangwa didi, ti nu di tangwa mba mu zwela egi: " Muthu yonu udi muza mu jina dia Fumu a zule Lusagumunu."