¹ Yesu wa a lezele ndaga mu ingana egi: ² " Gifumu gia gosa gidi gia fwanana nu fumu mu moshi wa khalele mu yidiga khinji ya makwela mukunda nu munenji wa yala. ³ Wa tumile athu enji a gisalo ha gu tamega wanyi a tamegeye gu khinji ya makwela, uvi a tunyile gawo ha guza. ⁴ Fumu wa tumile nji athu ako a gisalo enji wa zwelele egi: " Lezenu athu wanyi a tamegeya gu khinji egi: " Talenu, nga yidiga madia; nga shiya ngombe jiami nu twana twa ngombe twa mafuta enji ima ikima idi ya gu londa. Izenu gu khinji ya makwela." ⁵ Uvi athu ene akima a monele ndaga yene phamba. A yile konso muthu gu gilanga gienji, muko gu ndaga jienji jia gu diga. ⁶ Athu ako a kwatele athu a gisalo a fumu, a a monesele phashi nu gu a shiya. ⁷ Fumu wa vile khabu; wa tumile masuta enji ha guya mu shiya athu wawa a mubulu nu gu konda dimbo diawo nu tshiya. ⁸ gu nyima wa lezele athu a gisalo egi: " khinji ya makwela idi ya gu yidiga, uvi wanyi nga tamega a lungile go. ⁹ Hene, ndenu ha phanda njila tamegenu athu akima wanyi mwa mbo mona eze gu khinji ya makwela." ¹⁰ Athu a gisalo a yile mu ma bala-bala a tamegele athu akima a monele, a bola nu a bonga. Hene inzo ya makwela ya zalele nu athu a tamegeye. ¹¹ Mu tangwa fumu a ngidile ha gu tala athu a tamegele, wa monele muthu mu moshi wa sudigile go mulele wa khinji ya makwela. ¹² Fumu wa mu hudile egi: " Futa, phila khi wa ngidi haha wa konda gu sudiga mulele wa khinji?" Muthu mwene gwa vutudile go ata ndinga. ¹³ Gu nyima, fumu wa lezele athu a gisalo egi: " Jitshigenu mago nu malu a muthu yogu mu bishilenu gonze mu katshi dia phipha, gunu gudi nu gu dila nu gudi sumana mazo." ¹⁴ Mukunda a vula a tamegeye, uvi gabiyo a phoneye." ¹⁵ Gu nyima, afalisaye a yile mu londa fondo nu gu tela Yesu muheto ha gu mu kwata mu gu zwela gwenji. ¹⁶ A mu tumile alongogi awo, nu athu wanyi a gimvuga gia elode. A lezele Yesu egi: " Longi, tudi mu jiya egi wa nu zwela ndaga jia kielega nu gu longa njila ya Nzambi mu masonga. Wa nu tala go lukumu lwa muthu mukunda wa nu tala go phila athu a nu mona gu meso. ¹⁷ Hene tu leze ikhi udi mu yindula? keti tudi nu nswa ya gu futa gitadi gia Kayisala nga ndo?" ¹⁸ Uvi Yesu wa jiyile ngindu jiawo jia bola wa zwelele egi: " Enwe athu a mambo! Mukunda ni ikhi mudi mu ngu phaga? ¹⁹ Ngu lezenu gibende gi moshi gia mbongo mwa nu futila gitadi." A mu batele ga gibende ga moshi. ²⁰ Yesu wa a lezele egi: " Gifwanisu nu jina didi dia nanyi?" ²¹ A mu vutudile egi: " Ya Kayisala". Hene Yesu a zwelele egi: " Hanenu ima ya Kayisala gwa Kayisala, gwa Nzambi ima ya Nzambi." ²² Tangwa a vile nganyi, a yitugile. Gu nyima a mu bembele a yile gawo. ²³ Mu gilumbu giene, ba saduse ako wanyi a nu zwela egi gufutumuga gu thugu ejile gwa mwene. A mu hudile egi: ²⁴ " Longi, Moyize wa zwelele egi: " Gula muthu mu moshi wa fwa konda gu bemba ana, phanjienji wa feto kwela mukwetu yonu ha gu buta nenji ana." ²⁵ Gwa khalele nu aphangi a mala mu sambwadi. Wa thomo wa zudile mukwetu wa file wa konda gu bemba ata mona. Wa bembele mukwetu gwa phangienji. ²⁶ Gu nyima wa giyadi wa kitile giteso gi moshi; nu wa gi tatu, ti nu wa sambwadi. ²⁷ Gu nyima diawo mukwetu mwene wa file. ²⁸ Lulu ngagi tu leze, ha gufutumuga gwa athu mukwetu mwene mba u khala mukajia nanyi mu katshi dia aphangi wanyi sambwadi; mukunda khungiawo akima a mu zudile mu makwela?" ²⁹ Uvi Yesu wa vutudile nu gu zwela egi: " Mudi mu katshi dia gu jimbila, mukunda mushi mu jiya go ndaga jia sonegeye, nu gu konda gu jiya ngolo jia Nzambi. ³⁰ Mukunda ha gufutumuga gwa athu, makwela mba ashi mu khala go nu gu kwelesa mba gu khala go. Uvi mba tu khala ole ba wanjio gosa. ³¹ Uvi mukunda nu ndaga yinyi idi mu talela gufutumuga gwa athu wanyi a file, khanji mu tanga go ndaga yinyi Nzambi a zwelele egi: ³² " Eme nga Nzambi wa Abram, Nzambi wa Izaki, nu Nzambi wa Yakhobo?" Nzambi gwa shi go Nzambi wa athu a fwa, uvi udi Nzambi wa athu a monyo." ³³ Tangwa gimvuga gia athu a vile nganyi, a yitugile ha guvwa malongi ene. ³⁴ Tangwa afalisaye a jiyile egi Yesu wa kangele ba saduse kano, adi bungishile hama ha moshi. ³⁵ Mu moshi mu katshi diawo, muthu wa jiya shigo mwa bonga-bonga, wa mu hudile mwehu ha gu mu phaga egi: ³⁶ " Longi, shigo khi ya balega gu koma mu katshi dia shigo jikima?" ³⁷ Yesu wa vutudile egi: " Tshigina Fumu Nzambi waye mu mutshima waye ukima, mu monyo waye nu mu ngindu jaye." ³⁸ Yiyi idi shigo ya koma nu ya thomo mu katshi dia shigo jikima. ³⁹ Ya giyadi idi ya fwanana nu inyi idi: " Tshigina mukwenu phila wa nu di tshigina ha khaye." ⁴⁰ Mu katshi dia shigo jiji jiyadi hene ha kwata shigo nu ba profeta." ⁴¹ Mu phila afalisaye a khalele kaka adi bungisa, Yesu wa a hudile egi: ⁴² " Ikhi mudi mu yindula mukunda nu Kilisto? Udi muna nanyi?" A vutudile egi: " Muna Davidi." ⁴³ Yesu wa a hudile egi: " Phila khi Davidi, wa zala nu Pheve, udi mu mu tamega egi Fumu, tangwa adi mu zwela egi: ⁴⁴ " Fumu wa lezele Fumu wami egi: " Di tumbige haha gu khanda ya koko diami dia gi tata, ti nu tangwa nga mbo haga mbeni jiaye goshia malu aye?" ⁴⁵ Gula Davidi wa tamega Kilisto egi; " Fumu", phila khi mwene adi muna Davidi?" Ata muthu mu moshi gwa mu hwile go mvutu. ⁴⁶ Hene katuga gilumbu giene, ata muthu gwa phagele nji go ha gu mu hula miehu.