¹ Mu phila Yesu nu alongogi a khalele phene-phene nu Yelusalemi, a kumile gu dimbo dia Betefaze phene-phene nu mulundu wa mitshi ya ba olive. ² Yesu wa lezele alongogi egi: " Gindenu gu dimbo dia ha twama, tangwa mwa mbo kuma, mu mu mona muna phunda wa gu jitshiga. Mu jitululenu mu ngu batele nenji. ³ Gula gwa mi hula muthu egi mukunda nu ikhi mudi mu kita ngagi, mu lezenu egi: " Mwatha udi nayo funu nganyi udi gu mi bemba muza nayo." ⁴ Ndaga yiyi ya salamele mukunda nu gulungisama gwa ndaga ya sonegeye gu mukanda wa profeta egi: ⁵ " Lezenu mona mukhetu wa gu dimbo dia siyoni egi; tala Fumu wenu muthu wa hima udi mu mi jila wa di tumbiga holu dia gana ga phunda. ⁶ Alongogi a yile mu kita phila Yesu a zwelele ha gu kita. ⁷ A batele phunda nu gana, a bambele milele holu, hene Yesu a ngidile holu dia phunda yene. ⁸ Athu a vula a yandigile gu bamba milele mu njila, ako a khesele thango jia mitshi a bambele mu njila. A kitile ndaga jene mukunda nu lukumu lwa Yesu. ⁹ Gimvuga gia athu wanyi a khalele ha twama dienji a khalele muya nu gu zwela mu ndinga ya ngolo egi, " Lukumu lu khale gwa Muna Davidi" Nzambi a sagumune muthu yonu udi muza mu jina dienji. Ozana gosa gwa leha. ¹⁰ Tangwa a ngidile gu Yelusalemi dimbo dia nyiganele athu a khalele mu hula egi: "mukunda nu ikhi adi mu hwa muthu yogu lukumu lwa ngagi? ¹¹ Gimvuga gia athu a khalele muza mu hata a vutudile egi: " Yogu Yesu profeta mwenya gu Nazaleti wa katuga gu Galileya. ¹² Gu nyima Yesu wa ngidile mu inzo Nzambi. Wa kayele athu a kima a khalele mu diga mu inzo yene. Wa bishidile mesa wanyi athu a khalele mu sombegesela falanga nu gu phanza kiti jia athu wanyi a khalele mu diga phijio. Wa a lezele egi: ¹³ " Idi ya gu sonega egi: Gisapha giami gidi gia isambu; uvi enwe mwa gi kitula gisapha gia nzangi. ¹⁴ Ifwa meso nu athu a fwa malu ejile gwa Yesu mu inzo Nzambi; mwene wa khalele mu a belula. ¹⁵ Mambuta a nganga-nzambi nu alongi a shigo a monele ndaga jia gu yituga jinyi a kitile; nu mu phila a monele ana a mala a khalele mu kabuga mu ndinga ya ngolo mu katshi dia inzo nzambi egi, " lukumu lu khale gwa Kilisto, Muna Davidi. Ha gu mona nganyi a vile khabu jia vula mukunda a khalele go mu kwikila egi Yesu udi Kilisto. ¹⁶ Hene a mu hudile egi: " Keti udi mu vwa ndaga jiji ana mala wawa adi mu zwela? Yesu wa vutudile egi: " Eya, keti mwa tangele genu go ndaga jia sonegeye egi wa zudile lukumu gwa ana a mitumba nu gwa wanyi adi gu mayele a ginawo? ¹⁷ Yesu wa lezele alongogi enji ha gu katuga mu dimbo diene ha guya mu banda gu Betaniya. ¹⁸ Mu gikhela-gikhela, tangwa a khalele mu vutuga gu dimbo diene; nzala ya mu kwatele. ¹⁹ Wa monele mutshi umoshi wa mabundu a fige mu khelelego ya njila; wa phusanele phene-phene nu mutshi wene, uvi gwa monele go ata bundu di moshi kaka mayiji. Wa lezele mutshi wene egi: " Katuga henyaha mba ushi mu haga nji go ata bundu di moshi. Kaka hene henyanyi, mutshi wene wa umile. ²⁰ Mu gilumbu gwa hatele, tangwa alongogi a monele mutshi wene, a yitugile mwa vula hene a hudile egi: " phila khi mutshi wuwu wa uma mu mbala imoshi ngagi?" ²¹ Yesu wa a hwile mvutu egi: " Mu masonga, ngu mu mi leza egi, gula mudi nu lukwikilu enji mushi mu haga thembe go mwa jiya gu leza mulundu egi: " katuga di bishile mu muta," ndaga yene i feto salama. ²² Gima gikima mba mu lomba mu isambu, gula mudi nu lukwikilu mba mudi mu zula gima giene. ²³ Yesu wa yile mu ngila mu inzo ya isambu, mafumu a nganga-nzambi nu mambuta a gimvuga gia athu ejile mu phusana phene-phene nu mwene tangwa a khalele mu longa, hene a khalele mu zwela egi; mu giyega khi adi mu kita ndaga jia ngagi? Nanyi wa mu hwa giyega giene?" ²⁴ Yesu wa a vutudile egi: " Ngu mu mi hula muhu umoshi. Gula mwa hana mvutu, n'eme ngu mu mi leza gula idi mu giyega gia nanyi ngu mu kita ndaga jiji. ²⁵ Mbotiga ya Yowani, ya katugile gwi? Gosa to gwa athu? A yandigile gudi hula egi: gula ta vutula egi, gosa, u mu tu leza egi; mukunda nu khi mwa dile gu kwikila ndo? ²⁶ Uvi gula ta vutula egi gwa "athu," gimvuga gigi gia athu gi mu tu bendumugila mukunda athu a nu zwela egi Yowani wa khalele profeta." ²⁷ Hene a hanele mvutu gwa Yesu egi: " tu shi mu jiya go guma gwa zudile Yowani Mbotiga giyega." Yesu wa a lezele egi: " n'eme nji ngu shi mu mi leza go mu giyega gia nanyi ngudi mu kita ngada jiji. ²⁸ Ikhi mudi mu yindula? Muthu mumoshi wa khalele nu anenji muyadi; wa yile gwa mona wa thomo wa mu lezele egi; " munami nda magino u kite gisalo mu gilanga." ²⁹ Mona mwene wa mu vutudile egi: " Ngu shi muya go." Gu nyima ya ga tangwa wa yile. ³⁰ Muthu mwene wa yile gwa mona wa giyadi wa mu lezele giteso gimoshi. Mona yogu wa vutudile egi: " Ngu mu ya ngu kite, " uvi gwa yile genji go. ³¹ Nanyi mu katshi dia ana wawa muyadi wa kitile luzolo lwa shawo? A vutudile egi: " Mona yonu wa mbuta." Yesu wa a lezele egi: " Mu masonga ngu mu mi leza egi athu ako ule tulagi twa nu futisa itadi nu akhetu a ndumbu wanyi mwa nu mona egi adi enya masumu mba adi mu diango ngila mu Gifumu gia Nzambi. ³² Ngu mu mi leza ngagi egi ata tangwa Yowani Mbotiga ejile mu mi jiyisa phila ya gujinga mu lunungu, mwa kwikile go sango yenji. Haha ngagi, afutisi a itadi nu akhetu a ndumbu ene a kwikile gwa mwene hene a baludile njila jiawo jia masumu. Ata mwa a monele phila a baludile mitshima enwe mwa kwikile go gwa Yowani. ³³ Vwenu gingana giko. Gwa khalele nu muthu mumoshi wa khalele nu gitshidi gienji gia mavu, wa kunyile gilanga gia vinu, wa mbile luphango, gu nyima wa hagele wina dia gu kamela vinu, wa tungile gisapha gia leha mukunda nu gu langidila gilanga, gu nyima wa hanele gilanga giene gwa athu a gisalo. Gu nyima wa yile gu dimbo di moshi gwa leha. ³⁴ Sungi ya gu katula ima mu gilanga ya dile ya kuwa wa tumile athu a gisalo gwa athu a gilanga mukunda aye a zule ima ya mu gilanga. ³⁵ Athu a gisalo gia gilanga a kwatele athu a gisalo a tumiye, a betele mumoshi, muko a mu shiyile, muko nji a mu namanesele nu maseso a mu kayele. ³⁶ Mu mbala ya giyadi fumu wa gilanga wa tumile nji athu ako a vula a gu balega wanyi a thomo, uvi a beteye giteso gi moshi. ³⁷ Gu nyima fumu wa gilanga wa tumile munenji wa yala, mwene wa zwelele egi: " Adi mu jitisa munami nu gu muhwa ga ndambu ga kapho diami dia ima." ³⁸ Tangwa athu a gisalo gia gilanga a monele mona mwene, adi lezele egi: Fumia gifugo mweniowu. Tshiyenu tu mu shiye mukunda gifugo gi tu batugile. ³⁹ Hene a mu kwatele, a mu zolele mu gilanga a mu shiyile. ⁴⁰ Lulu ngagi, gula fumia gilanga weza ikhi mba a kita gwa athu a gisalo a gilanga? ⁴¹ Athu a zwelele egi: " Fumu wa gilanga mba udi mu shiya athu a gisalo a gilanga, ebuna mba udi mu hana gilanga gwa athu ako, wanyi mba a mu hwa ima ya gilanga mu sungi ya gu katula ima mu gilanga. ⁴² Yesu wa a lezele egi: " Khanji mu tanga genu go ndaga jia sonegeye egi: " seso dinyi dia bishidiye gwa athu a khalele mu tunga diene dia katugile seso dia ha khomo? Seso diene dia katugile gwa Fumu didi gima gia gu yituga gu meso etu. ⁴³ Hene mu phila mwa ngu tuna, ba yuda mba a shi mu khala nji go gikanda gia Nzambi. Mba udi mu khala Nzambi wa athu wanyi a shi go ba yuda wanyi adi mu kita luzolo lwenji. ⁴⁴ Muthu mba u bwa holu dia seso diene mba udi mu sasumuga, yonu seso diene mba di bwila mba udi mu sasumuga. ⁴⁵ Tangwa mafumu a nganga-nzambi nu afalisaye a vile ingana yene a jiyile egi wa khalele mu a zwelela. ⁴⁶ Uvi konso tangwa a tshiginile gu mu kwata, a khalele mu vwa woma wa athu, mukunda a khalele mu jiya egi Yesu udi profeta.