¹ Gifumu gia gosa gidi gia fwanana nu muthu udi nu gilanga gienji, wa zogele nu gikhela gikhela ha gu zula athu a gisalo mukunda aye a bundule gilanga gia vinu. Gu nyima ya gudi visa nu athu ene a gisalo mu ndaga ya mbongo jia gu a futa mu gilumbu, ² wa a tumile mu gilanga gienji gia vinu. ³ Wa zogele mu tangwa dia tatu wa monele ako a khalele a konda gisalo. ⁴ Wa a lezele egi; " N'enwe nji gindenu mu gilanga, gima gikima gia bonga ngu mu mi hwa nagio. Hene a yile mu kita gisalo. ⁵ Wa zogele nji mu tangwa dia sambano nu dia uvwa, wa kitile kaka phila imoshi. ⁶ Mbala iko nji wa zogele mu tangwa dia kumi ni imoshi wa sangele ako, wa a hudile egi; " Mukunda nu ikhi mudi genu mwa hena ya konda gu kita ata gima mu gilumbu gia mvimba?" ⁷ A vutudile egi; " Mukunda gushi go nu muthu wa gu tu zula gu gisalo." Wa a lezele egi: " N'enwe nji, gindenu mu gilanga." ⁸ Mu tangwa dia gingweze, fumu wa gilanga wa lezele gaphita genji egi, ⁹ tamega athu a gisalo ha gu a futa katuga muthu wa suga ti gwa yonu wa thomo. Athu wanyi a zudiye gu gisalo mu tangwa dia kumi nu dimoshi ejile, konso muthu wa zudile phata imoshi ya falanga. ¹⁰ Tangwa athu a thomo a zudiye gu gisalo ejile a yindudile egi a mbo zula falanga jia gu balega, uvi a zudile nu ene konso muthu phata imoshi ya falanga. ¹¹ Gu nyima ya gu futiya, a yandigile gu bogutila fumu wa gilanga. ¹² A hudile egi, athu wawa ako a balegesa kaka tangwa dimoshi dia gisalo, uvi wa tu futa nawo giteso gi moshi, etwe ta mona phashi katuga gikhela goshia mwanya. ¹³ Uvi fumu wa gilanga wa vutudile gwa mu moshi mu katshi diawo egi, yala, nga mi kitile go ata gima gia bola. Keti ta di vishile go ha gu mi futa phata imoshi? ¹⁴ Zangulenu konso muthu kapho dienji mu katuge; mukunda idi gu tshigina gwami ha gu mi futa nu muthu wa suga giteso gi moshi. ¹⁵ Keti ngu shi gami nu nswa go ya gu salela ima yami mu phila nga tshigina? ¹⁶ To diso diaye didi mu vwa giphi mu phila ngu di mwa bonga? Mu phila yiyi muthu a suga mba u kituga muthu wa thomo, yonu wa thomo mba u kituga muthu wa suga. ¹⁷ Mu phila Yesu a khalele mu kanduga gu Yelusalemi; wa yile nu a longogi enji kumi nu muyadi. Mu njila, wa a lezele egi: ¹⁸ "Tala, mu phila tudi mu kanduga gu Yelusalemi, Muna muthu wa feto haneya gu mago a mafumu a nganga-nzambi nu gwa tulagi twa shigo. ¹⁹ Mba adi gu mu hana gu mago a athu a masumu mukunda a mu shiye, ha gu mu lela, gu mu kuphula fimbu nu gu mu hana ha khulunji. Uvi mu gilumbu gia tatu, mba udi mu futumuga. ²⁰ Gu nyima gina ana a Zebedeyo we jile gwa Yesu nu anenji; wa fugamele gu twama dia Yesu, wa mu lombele gima gi moshi. ²¹ Yesu wa mu hudile egi: " Ikhi udi mu tshigina?" Wa mu vutudile egi: " Hana giyega gwa anami muyadi ha gudi tumbiga, mumoshi gu koko diaye dia madia muko gu koko dia gihidi mu gifumu giaye. ²² Yesu wa mu vutudile egi: " Ushi mu jiya go gima udi mu lomba. Keti wa jiya gu nwa kopho mba ngu nwa? A mu lezele egi: " Eya mba tudi mu kita nganyi." ²³ Wa a lezele egi: " Ya kielega mwa jiya gu nwa kopho diene. Uvi gu ndaga ya gudi tumbiga gu koko diami dia madia nu dia gihidi, ishi eme go nga jiya gu hana giyega giene, uvi idi mukunda nu wanyi a yidigiye gwa Shami. ²⁴ Tangwa alongogi ako a vile nganyi, a vile khabu mukunda nu aphangi wanyi muyadi. ²⁵ Uvi Yesu wa a tamegele enji wa a lezele egi: " Mu jiye egi mafumu a aphagano adi mu zula giyega gia gingolo-ngolo, enji manene awo a nu zwela egi adi nu giyega holu diawo. ²⁶ Uvi ya jiyile go gu khala nganyi mu katshi dienu, mukunda konso muthu yonu udi nene mu katshi dienu wa feto khala muthu wenu wa gisalo; ²⁷ muthu yonu udi mu tshigina gu khala muthu wa thomo mu katshi dienu wa feto khala muthu wenu wa gisalo; ²⁸ kaka mu phila yene Muna Muthu gwe jile go mukunda athu a mu salele, uvi mukunda nu gu a salela nu gu a hwa lujingu ole mabula. ²⁹ Tangwa a zogele mu dimbo dia Yeriko, gibuga gia athu gia a hatele. ³⁰ Ifwa meso muyadi a khalele a di tumbiga mu khelelego ya njila; tangwa a vile egi Yesu wa khalele mu balega, a zugile a yandigile gu zwela egi, " Mwatha, Muna Davidi tu vile khenda." ³¹ Uvi gibuga gia athu gia khalele mu a balela, nu gu a leza a hene tedie. Uvi ene a khalele sha mu kabuga mu ngolo egi: " Mwatha, Muna Davidi, tu vile khenda. ³² Gu nyima Yesu wa maganele, wa a tamegele enji wa a hudile egi: "Ikhi mwa tshigina ngu mi kitile?" ³³ A mu vutudile egi: " Mwatha, ta tshigina egi meso etu a kanguge." ³⁴ Yesu wa vile khenda jia vula, wa kwatele meso awo. Kaka hene henyanyi meso awo a kangugile.