¹ Tangwa Yesu a manesele guta ndaga yene, wa katugile gu Galileya ha guya gu khanda ya gu Yudeya gu balega muta wa koma wa Yolodani. ² Gimvuga gia athu a vula a mu hatele ebuna wa khalele mu a belula. ³ A falisaye ejile gu mu mona ha gu mu yunza mu masunga nu gu mu hula egi:" Keti shigo idi mu hwa muthu nswa ha gu tuna mukajenji mu makwela ata mukunda nu konso ndaga?" ⁴ Yesu wa vutudile egi: " Khanji mu tanga go egi katuga ha luyandigu egi phila khi mwene a gangele yala nu mukwetu? ⁵ Wa zwelele nji egi: " Mukunda nu nganyi, yala mba u bemba shenji nu Ginenji ha gu kangama nu mukajenji, mba adi mu kituga mwila umoshi. ⁶ Hene mba a khadi muyadi uvi mba a kituga mwila umoshi, mukunda nu nganyi gima ginyi Nzambi a vugisa muthu gu gi kapha ndo. ⁷ A mu hudile egi: " mukunda nu ikhi Moyize a hanele swa gwa ha gu hana mukanda wa gu shiya dibala nu gu kaya mukhetu?" ⁸ Wa a vutudile egi:" Mukunda nu gu kolesela gwenu gwa mitshima, Moyize wa mi hwile nswa ha gu shiya makwela nu akajenu uvi ha luyandigu, ya khalele go nganyi." ⁹ Ngu mu mi leza egi: " Yonu mukima wa shiya makwela nu mukajenji katula kaka mukunda nu uthambi, waya mu kwela mukhetu muko, mwene wa kita uthambi; muthu yonu wa kwela mukhetu wa tunyiye mu makwela udi mu kita uthambi. ¹⁰ Alongogi a lezele yesu egi: " gula mukwala udi gwa yala mukunda nu mukhetu, ishi mwa bonga go ha gukwela." ¹¹ Uvi Yesu wa a lezele egi: " Ishi go athu akima a jiya gu tshigina malongi wawa, kaka wanyi a hwiye nswa ha gu a tshigina. ¹² Mukunda gudi nu athu a butugile ishita, gudi nu ako adi bwisa ishita mukunda nu gifumu gia gosa. Muthu yonu wa tshigina ha gu hata malongi wawa a tshigine. ¹³ Gu nyima a mu batele ana a mitumba mukunda a a hage mago nu gu a sambela, uvi alongogi a khalele mu a balela. ¹⁴ Yesu wa a lezele egi: " Bembenu ana a mitumba eze gwa eme mu a kangi njila go, mukunda gifumu gia gosa gidi gia athu wanyi adi a fwanana nawo." ¹⁵ Wa a hagele mago, gu nyima, wa katugile hene. ¹⁶ Muthu mumoshi we jile gwa Yesu wa mu hudile egi: " Longi, gima khi gia bonga nga jiya gu kita ha gu zula monio wa mvula nu mvula? ¹⁷ Yesu wa mu vutudile egi: " Mukunda nu khi udi mu ngu hula gima gia bonga? Gi moshi gidi gia bonga, uvi gula wa tshigina gu ngila mu lujingu, hata shigo." ¹⁸ Muthu mwene wa mu hudile egi: " Shigo khi? Yesu egi: " Gu shiya ndo, gu kita uthambi ndo, gu kuya ndo, gu ta gi themwe gia mambo ndo, ¹⁹ jitisa shaye nu ginaye, tshigina phangiaye phila wa nu di tshigina." ²⁰ Mona yala mwene wa mu lezele egi: " Ndaga jiji jikima nga nu ji jitisa; ikhi iko nga jiya gu khala nayo funu"? ²¹ Yesu wa mu lezele egi: " Gula udi mudi mona egi wa muthu wa bonga, nganyi diga ima yaye ikima udi nayo enji kaphela a sugami, nganyi mba udi mu zula ima ya vula gosa. Gu nyima iza ngu hate." ²² Uvi tangwa mona yala mwene a vile ndaga yene ya zwelele Yesu, wa katugile hene nu khenda, mukunda wa khalele muthu mu moshi wa khalele nu ima ya vula. ²³ Yesu wa lezele a longogi enji egi: " Mu masonga ngu mu mi leza egi, idi phashi jia vula gwa mvwama ha gu ngila mu gifumu gia gosa. ²⁴ Enji, ngu mu mi leza egi, mbiji yiyi chamo ya jiya gu balega ha ga wina ga shindani, uvi ishi go nu phila gwa mvwama ha gu ngila mu gifumu gia Nzambi. ²⁵ Tangwa a longogi a vile nganyi, a yitugile enji a zwelele egi: " Nanyi wa jiya gu guluga?" ²⁶ Yesu wa a talele enji wa zwelele egi: " Gima ginyi athu a jiyile go gu kita gwa Nzambi gia feto salama." ²⁷ Hene Phetelo a mu vutudile egi: " Tala, ta bemba ima yetu ikima ta gu hata; ikhi mba tu zula?" ²⁸ Yesu wa a lezele egi: " Mu masonga ngu mu mi leza egi, enwe mwa ngu hati mu tangwa dia lubutugu lwa pha tangwa Muna Muthu mba a khala wa di tumbiga ha gife gia lukumu, N'enwe nji mba mudi tumbiga holu dia lukumu kumi nu muyadi, ha gu sambesa ikanda kumi nu iyadi ya gu izalayele. ²⁹ Muthu mu kima wa bemba jinzo jenji, aphangienji a amala nu a akhetu, shenji, ginenji, anenji nga ndo ilanga yenji mukunda nu jina diami, mba udi mu zula ima holu dia khama nu gu zula gifugo gia lujingu lwa mvula nu mvula. ³⁰ Uvi a vula wanyi adi athu a thomo mu tangwa didi mba adi mu khala athu a suga, a vula wanyi adi athu a suga mba adi mu khala athu a thomo.