¹ Gu nyima ya gilumbu gia gu hwima, mu gikhela gikhela gia gilumbu gia thomo gia phoso, Mariya wa gu magadala nu mariya yonu muko ejile mu tala majiamo. ² Mu mbala imoshi, mavu a nyiganele mu ngolo, wanjio mu moshi wa Fumu wa katugile gosa, wa bulumugile we jile mu phusa seso, wa di tumbigile hene. ³ Gu meso wa khalele mu sema, milele yenji ya khalele ya phembe-phembe ole mbundu ya phembe-phembe. ⁴ Masuta a khalele mu kengelela majiamo a vila woma wa vula a bwile hoshi ole athu a fwa. ⁵ Wanjio wa lezele akhetu egi: '" Bembenu gu vwa woma, mukunda ngu mu jiya egi mudi mu kamba Yesu, yonu wa hageye ha khulunji. ⁶ Gwa shi nji go haha uvi wa futumuga gu lufwa, mu phila a zwelele. Gizenu mu tale hama Fumu a hageye. ⁷ Gindenu mu phushi- phushi mu leze alongogi egi: Wa futumuga gu lufwa; ebuna wa mi diangela gu Galileya. Gwene mwa mbo mu mona. " Tala ngada nga khala nayo ha gu mi leza." ⁸ Hene akhetu ene a katugile gu majiamo mu phushi. A khalele nu woma wa vula uvi nu ga ndambu ga kiese. A vutugile mu phushi mukunda nu guya mu twala sango jia ndaga jia katuga gu balega. ⁹ Mu mbala imoshi, Yesu wa a zogele mu gisagumwisa nu a leza egi: " Mwa banda" Akhetu ene ejile mu phusana phene-phene nu mwene a mu kwatele mu malu nu fugama ha gu mu sambela. ¹⁰ Yesu wa a lezele egi: " Mu vi woma go. Gindenu mu leze aphangi 'ami aye gu Galileya; gwene a mbo ngu mona." ¹¹ Tangwa akhetu a katugile muya, masuta wanyi a khalele mu tala majiamo a yile gu dimbo mu hana sango gwa mafumu a nganga-nzambi ndaga jikima mu phila jia balegele. ¹² Tangwa mafumu a nganga-nzambi a kutanele nu mambuta a dibundu a di vishile a hwile masuta falanga jia vula, ebuna ¹³ a zwelele egi: " Mu zwela egi alongogi enji eji mu phipha a kuya mvumbi yenji tangwa ta kala gu tulo." ¹⁴ Gula fumu wa dimbo wa vwa ndaga yiyi, ta mbo mu tendudila mwa bonga-bonga etwe hakhetu, nganyi mwa mbo zula ndola go." ¹⁵ Hene masuta a zudile falanga jene, a kitile phila a zudile nswa. Ndaga yene ya phanzanele mu katshi dia bayuda ti nu magino. ¹⁶ Uvi alongogi wanyi kumi nu mumoshi a yile gu Galileya, ha mulundu unu Yesu a a lezele. ¹⁷ Tangwa a mu monele, a mu fugamele, uvi ako a khalele mu haga thembe. ¹⁸ Yesu wa phusanele wa a lezele egi: " Giyega gikima gia ngu hwiye gosa nu haha hoshia mavu. ¹⁹ Gindenu, mu kitule athu a ikanda ikima alongogi, mu a botige mu jina dia Tata, dia Mona nu dia Pheve-Santu. ²⁰ A longenu ha gu lemvuga gu ndaga jikima nga mi longele. Mu jiya egi, ngu di nenu ilumbu ikima ti nu suga ya thotho.