¹ Hago Yesu wakhalele mu bulumuga mu mulundu, thundu ya athu amuhatele. ² Tala, muenya hute mungoshi wayile gudi Yesu nu wafugamene ha mabongo gu matuamena enji nu guzuela egi: «Fumu, gula watshigina ngusage digute didi.» ³ Yesu wa sunuine koko guenji nu wamukuatele nu koko nu guzuela egi; «Ngatshigina, ukhale yagusagewa.» hugo dimoshi diene, muene wasagewe gu hute dienji. ⁴ Yesu wa muwabelele egi: «Batega kano waye guwambela nga muthu nu nda udi digige gudi ngambi ya Nzambinu uhane mulambu mu luholo ludi mutuma mukhuala wa Mose mukunda nu gukhala gijiyishilo.» ⁵ Hago Yesu wanginyine mu dimbo dia Kapelanahuma, fumu ya lukhama lua masalayi wamutogele. ⁶ Wamububile nu guzuela egi: «fumu, muenya mudimo wami udi yagubanda mu inzo mukunda nu misongo ya khonzo nu udi mumona malamba avula.» ⁷ Yesu wa muambele egi: «Ngudi muya gumbo diaye ha gumusaga.» ⁸ Uvi fumu ya lukhama wamutayele egi: «Fumu, ngushigo yatagana hagula egi aye ungine mu inzo yami, uvi zuela khuta mbimbi imoshi nu muenya mudimo wami udi mukhala ya gusagewa. ⁹ Ndaga ame nji ngudi muthu ya guhagewa gu uhunyinyi, nu ngudi nu masalayi (masuta) ago ngana hana mikhuala (tuma). Ngu wambela mumoshi "nda", nu udi muya; nu muko "giza," nu udi muza. Nu gudi muenya mudimo "tshita ngegi," nu udi mutshita.» ¹⁰ Hangima dia gumutegelela, Yesu wayitugile nu wawambelele athu akhalele gumuhata egi: «Ngudi gumiwambela giamatshidia, Khenji ngamonene ndo muthu nu gutshigina gua luholo lua ngegi gu Isalele. ¹¹ Ngudi gumiwambela, athu avula mba aza gu Esete nu Luesete nu mba akhala ha mesa nu Abalahama, Izaka nu Yakobo mu ufumu wa mudilu. ¹² Uvi ana a ufumu mba abishidiwa honze mu phipha, guene gunu mba gukhala idilo nu gukolotota mazo.» ¹³ Yesu wawambelele fumu ya lukhama egi: «Nda! mu luholo watshigina, ikhale yagutshitshiwa ngenyi.» Nu muenya mudimo wasagewe mu kumbi diene dinyinyi dimoshi. ¹⁴ Hago Yesu ahetele mu inzo ya Phetelo, wamuenene uko (bokilo) wa Phetelo yagubanda mukunda nu gundala. ¹⁵ Yesu wakhuatele koko wenji nu gundala guahuile. Hene, muene wazugile nu wasendesele gu atshitshila mudimo. ¹⁶ Hago gingueze giabuile, athu abatele gudi Yesu enya misongo nu ago akhalele nu ivule yabola, nu mu mbimbi imoshi guahua, wakayele ivule yabola, nu wasagele athu agasue akhalele mundala. ¹⁷ Mu ndaga yene, yataganesewe yago yazuelele muzueledi wa ima idi muza gumatuama Esayi: «Wazudile muene hakhenji misongo yetu nu wakhatesele ukata wetu.» ¹⁸ Hago Yesu wamuenene thundu ya mujetele, wahanene mukhuala ha guzauga sambua dia nzadi ya Galileya. ¹⁹ Nji muenya gusonega mumoshi wajile gudi Yesu nu wazuelele: «Longi, mba ngugutomba guagasue guago mba uya.» ²⁰ Yesu wamutayele egi: «Mikenge idi nu mawina nu tunjila tua gosa tudi nu yanzu, uvi Muna Muthu gashigo nu gifundo giaguhaga muto wenji.» ²¹ Munoshi ya alandudi wamuwambelele egi: «Fumu, nguhane njila ngudiangele guya mufunda shami.» ²² Uvi Yesu wamuwambelele: «Nguhate nu bemba enya gufua afunde jimvumbi jiawo.» ²³ Wakanduile mu wato (masuwa), nu alandudi enji amuhatele. ²⁴ Nu tala, guazugile fundji yakola hene wato (masuwa) akhalele aguzale nu meya. Nu muene, wakhalele yagubanda tulo. ²⁵ Alandudi asuenene hehi nu amuzugishile, nu azuelele egi: Fumu, tuhuluise, tudi mufua! ²⁶ Wawambelele egi: Mukunda nu itshi nu woma, athu adi enya gutshigina guazonda? Hene wazugile, wabalediele fundji (mahehe) nu meya, nu ahenene tedie. ²⁷ Athu ene akhalele mushimana: Nanyi ou, akhalele muzuela, gudi muene fundji (muhehe) nu meya adi gumutumaga? ²⁸ Hago ahetel ha sambua diko, mu mavu a Gadareniye, enya maluiyi muyadi, azogele gu malumba, ajile hatuama dienji. Akhalele nu khabu jiavula nu nga muthu gakhalelego nu phila ya gubalega hene. ²⁹ Nu tala, akologele: Gima tshi gidi gudi esue nu aye, Muna Nzambi? Waza haha mukunda nu gutumuenesa malamba gutuama dia kumbi? ³⁰ Guakhalele gutuama diawo nu shitu jia ngulu jiakhalele mubalega. ³¹ Givule giabola giatogele Yesu, nu guzuela egi: Gula watukaya, tutume mu shitu jia ngulu. ³² Wawambelele egi: Ndienu! Azogele, nu anginyine mu jingulu. Nu tala, shitu jiagasue jialengele phushi mu baba nu jiabuile mu meya, nu jiafile mu meya. ³³ Ago akhalele mujidisa alengele, nu ayile mu dimbo diamusamba muta maga ayagasue yabalegele nu yabuile gudi enya maluiyi. ³⁴ Hene dimbo diamusamba diagasue diazogele ha gutagana Yesu; nu, hadile amumona, amutogele ha gukatuga mu dimbo diawo.