¹ Yesu wanginyine mu wato ha guya gu khanda iko nu wakhalele muya gu dimbo dienji dia masamba. ² Nu tala, ajile gumubatela muthu wa ndala misongo ya khonzo ya gubanda ha gitanda. Yesu, wamuenene gutshigina guawo, wazuelele gudi mueneya khonzo egi: Zangula ngolo, munami, gubola guaye gudi yagutotesewa. ³ Mukunda nu ngenyi, enya gusonega azuelele mu mitshima yawo egi: Muthu ou udi muvueza. ⁴ Nu Yesu, wajiyile matangi awo, wazuelele egi: Mukunda nu itshi mudi nu matangi abola mu mitshima yenu? ⁵ Ndaga, itshi idi yatagana, ha guzuela egi: Gubola guaye gudi guagutotesewa, nga guzuela egi: Zuga nu wenda? ⁶ Uvi, hagula mujiye egi Muna muthu udi nu guhuminyina gua gutotesa gubola holu dia mavu: Zuga, wazuelele gudi muenya khonzo, zangula gitanda giaye, nu ginda gumbo (gu inzo) diaye. ⁷ Nu wazugile, nu wayile gumbo dienji. ⁸ Hago thundu yamuenene ngenyi, yakhalele nu woma, nu atumbuishile Nzambi, wahanene gudi athu uhinyinyi wangenyi. ⁹ Hene hanyi akhalele muya gualeha, Yesu wamuenene muthu mumoshi yaguditumbiga ha gifunda gia enya gitadi, nu wakhalele mutamegewa egi Matayo. Wamuwambelele egi: Nguhate. Muthu muene wazugile, nu wamuhatele. ¹⁰ Hago Yesu wakhalele ha mesa mu inzo (monzo), tala, enya piblike avula nu enya khadilo diavula ajile ha mesa ene nu alandudi enji. ¹¹ Afalase amuenene ngenyi, nu azuelele gudi alandudi egi: mukunda nu itshi ndombi yenu gadi mudia nu enya piplike nu enya lujingu (khadilo) luabola? ¹² Yago Yesu wavile, wazuelele: Ishindo mukunda nu athu adi muabonga anakhala nu funu ya munganga, uvi enya gundala (misonga). ¹³ Ndienu, nu longugienu itshi idi muzuela: Ngana suanguluga gu gubonga, nu ndo gudi milambu. Ndaga ngajilego mutamega ago adi atagana, uvi enya gubola. ¹⁴ Hene alandudi a Yona Mubatiji ajile gudi Yesu, nu azuelele egi: Mukunda nu itshi esue nu afalase tudi mutuna gudia uvi alandudi aye ashigo mutuna gudia? ¹⁵ Yesu watayele egi: Mafuta a muenua mahata ajiya gukhala nu gikenene hago muenya mahata udi nayo? Masugu mba aza hago uenya mahata mba ukhala yaguzangudiwa, nu hene ene mba atuna gudia. ¹⁶ Gushigo nu muthu wanatunga mulele wa uhe-uhe nu gitemba (sanji) gikulu; ndaga giene mba gibawuga nu gitshinyi gia mulele, nu gubawuga mba gukhala guakoma. ¹⁷ Nji matombe ahe-ahe anambiwa ndo mu mabungu ukulu; ndaga, mabungu akulu mba abudiga, matombe mba abunduga, nu mabungu mba atota, uvi matombe ahe-ahe anambiwa mu mabungu ahe-ahe, nu matumbe nu mabungu mba adibamba. ¹⁸ Hago muene akhalele gu awambela mbimbi jieji, tala, fumu mumoshi wahetele, wafugamene gutuama dienji, nu wazuelele: Munami wamukhetu udi yagufua luenyelu; uvi giza, muhage mago aye, nu azuge. ¹⁹ Yesu wazugile, nu wamuhatele nu alandudi enji. ²⁰ Nu tala, mukhetu mumoshi wandala misongo yaguzoga mahatshi sendese mvula kumi nu jiyadi wasuenene hehi gungima dienji, nu wakhuatele songi ya mbambe ya mulele wenji. ²¹ Ndaga wakhalele muzuela mukatshi dienji egi: Gula ngakuata khuta mulele wenji, ngumukhala yagusagewa. ²² Yesu wabalumuine, nu wazuelele, hago wamumuenene: Zangula ngolo, munami wa mukhetu, gutshigina guaye guagusaga. Nu mukhetu muene wasagewe ha tangua diene. ²³ Hago Yesu wahetele gu inzo ya fumu, nu wamuenene abudi a mbinga nu thundu yakoma, ²⁴ wawambelele egi: Vutugienu, ndaga mona mukhetu gashigo yagufua, uvi muene udi gutulo. Nu amulele tola. ²⁵ Hago thundu yakayewe, wanginyine, wazanguile koko wa mona mukhetu, nu mona mukhetu wazugile. ²⁶ Malungu amuanganene mu khanda yagasue. ²⁷ Hakatugile gununu, Yesu wahatewe gudi athu afua meso muyadi, akhalele mukolologa egi: Tuvile jikhenda, Muna Davidi! ²⁸ Hago ahetele mu inzo (monzo), ifua meso asuenene gudi muene, nu Yesu wawambelele egi: Mudi mutshigina egi ngu itshite? Ayi, Fumu, amutayele ngenyi. ²⁹ Hene wa akhuatele gu meso, nu guzuela egi: Ikhale yagutshitshiwa mu luholo ludi gustshigina guenu. ³⁰ Nu meso awo akungugile. Yesu wa ahanene mukhuala wakola egi: Ditadienu ha gula nga muthu gajiyigo. ³¹ Uvi, hadile azoga, amuangene lukuma luenji mu mavu agasue. ³² Hakhalele muya, tala, abatele gudi yesu muenya givule giabola mumoshi gakhalelego muzuela. ³³ Givule giabola adile giakayewa, muenya kano wafua wazuelele. Nu thundu yashimanene nu guzuela: Khanji tuamuenego ndaga ya luholo luolu mu Isalele. ³⁴ Uvi afalase azuelele egi: Idi mu ngolo jia mona fumu ya givule giabola adi mukayale ivule yabola. ³⁵ Yesu wakhalele muwenda mu khanda jiagasue jia membo a masamba nu membo azonda, nu gulongesa mu ikombelelo, golongesa mbimbi ihe-ihe yabonga ya ufumu, nu gusaga misango yagasue. ³⁶ Hamuenene thundu, wavile jikhenda mukunda nu yene, mukunda yakhalele yaguhuila, gifua mameme (jiphanga) jidi jishigo nu mutuameji. ³⁷ Hene wawambelele alandudi enji: Gilanga gidi giakoma, uvi enya mudimo adi azonda. ³⁸ Lombienu (togienu) fumu ya gilanga hagula atume enya mudimo avula mu gilanga.