¹ «Musampbesago milonga nu mba mukhadigo ya gusambesewa. ² Ndaga mba asambesa mu luholo muakhalele musambesa; nu giteselo muanatshitshila mukunda nu gutesa, giteselo gimoshi giene mba gimitesewa. ³ Nu mukunda natshi udi mutala gagisuasua ga muangu gadi mu iso ya phanjiaye ya yala, uvi ushigo mumona gitshinyi gia mutshi gidi mu iso yaye? ⁴ Gikhuatshi wajiya guwambela phanjiaye ya yala egi: "Giza ngugukatule gagisuasua ga muangu gadi mu iso yaye", uvi aye udi nu gitshinyi gia mutshi mu iso yaye? ⁵ Enya mambo! Katula thomo gitshinyi gia mutshi gidi mu iso yaye nu wajioya giwa gumona muabonga mukunda nu gukatula muangu udi mu iso ya phanjiaye ya yala. ⁶ Muhanyigo ima idi ya yabonga gudi jimbua nu mubishilago makuta enu a ibende gudi ngulu; ndaga, jiajiya gudiata gu ikanzo yajo, hangima jibalumuga gudi enue ha gumisasumuna mu idiando. ⁷ Lombienu nu mba imihanewa; Kambienu, nu mba mumona; kokodienu, nu mba amizuluila. ⁸ Ndaga muthu yagasue udi mulomba wana hanewa, nu muthu yagasue udi mukamba wana heta; nu muthu udi mukokola, mba amuzuluila. ⁹ Mukatshi dienu mba gukhala nu muthu yago, gula munenji ya nyala wamulomba gitshinyi gia dimpha, muene wajiya gumuhana iseso? ¹⁰ Gula walomba ishuyi, muene wajiya gumuhana nyoga? ¹¹ Ngenyi, gula enue mudi athu abola, muajiya guhana ima yabonga gudi anenu, na gikhuatshi Shenu udi gosa gajiyilego guhana genji ima yabonga gudi athu ago adi gumulomba ba? ¹² Muguzuela guabonga, ima yagasue mudi mutshigina egi athu imitshitshile, enue nji mudi nayo gu itshita gudi ene; ndaga idi mukhuala nu azueledi a ndaga jia gutuama. ¹³ Ginyenu ha mufulo wazonda, ndaga wakoma udi wazanzumuga nu udi njila idi mubata gu gubola (gumuanga), nu athu avula adi mubalega hene hanyi. ¹⁴ Ndaga mufulo wazonda udi njila imubata gu monyo nu athu azonda adi guheta. ¹⁵ Khadienu nu gutema gudi azueledi a ndaga jia gutuama amambo adi muza gudi enue gifua imeme, uvi mu giamatshidia adi isupha idi nu nzala. ¹⁶ Mba muajiya gu mabundu awo. Ana hela mabundu a reze gu mitshi ya nga fige gu mitshi ya shaladoni? ¹⁷ Luholo lumoshi luene, mitshi yagasue yabonga yana haga mabundu abonga, uvi mutshi wabola wana haga mabundu abola. ¹⁸ Mutshi wabonga wajiyilego guhaga mabundu abola, nga mutshi wabola wajiyilego guhaga mabundu abonga. ¹⁹ Mutshi wagasue ushigo muhaga mabundu abonga udi wagukokewa nu gumbiwa ha jigo. ²⁰ Luholo lumoshi, mba muajiya gu mabundu awo. ²¹ Ishigo athu agsue adi gungutamega egi: "Fumu, Fumu", mba angina mu ufumu wa mu dilu, uvi idi khuta athu ago adi mutshita gutshigina gua Shami udi mu dilu. ²² Athu avula mba anguwambela mu lusugu luene egi, "Fumu, Fumu, tuazuelego ndaga jia gutuama mu jina diaye, tuakayelego ivule yabola mu jina diaye nu tuatshitshilego ndaga jiagushimana mu jina diaye? ²³ Hene mba nguawambela diago egi: " Ngushigo gumijiya! Ndienu gualeha, enue mudi mutshita gubola!" ²⁴ Ngenyi, muthu yagasue udi mutegelela mbimbi jiami nu udi gujitshitshila mba ukhala gifua muthu wa ngambi udi mutunga inzo yenji holu dia seso. ²⁵ Mvula yanogele, mita yazalele nu funji yajile, uvi inzo yene yabuilego, ndaga inzo yene yakhalele yagutunga holu dia seso. ²⁶ Uvi muthu yagasue udi mutegelela mbimbi jiami nu gashigo gujitshitshila mba ukhala gifua muthu mumoshi waheya watungile ino yenji holu dia fuluguta. ²⁷ Mvula yanogele, mita yazalele, fundji yajile nu inzo yene yabuile nu yakhalele diago yagumuangewa.» ²⁸ Kumbi diago Yesu wamanesele ha guzuela jimbimbi jiene, thundu yakhalele yagukuatewa gu malongo enji, ²⁹ ndaga wakhalele gualongesa gifua muthu mumoshi udi nu guhinyinyi uvi akhalelego gifua anya gusonega.