¹ Mutshitshigo ndaga jiatagana gutuama dia athu mukunda nu gumonewa gudi ene, ngenyi mba ushigo muheta gishimbigo gudi Shaye udi mu dilu. ² Ngenyi hago udi muhana mulambu, gubula ndo ngenze, gifua hanatshita enya mambo mu ikombelelo nu mubalabala, hagula egi athu anemese. Mu giamatshidia, ngudi guguwambela, adi gale aguheta gishimbigo giawo. ³ Mukunda nu enue, hago mudi muhana milambu, koko wenu wa mahidi ujiyigo yago koko madia didi mutshita, ⁴ hagula egi mulambu wenu ukhale wa mumafumbe. Hene Shenu wana tala mu mafundo amafumbe mba umihana gishimbigo gienji. ⁵ Nu hago mudi musamba, mukhadigo gifua enya mambo, ndaga ene anatshigina gusamba mumolu mu ikombelelo nu mu khomo ya balabala, mukunda akhale yagumuenewa gudi athu. Mu giamatshidia, ngudi gumiwambela egi, adi gale yaguheta gishimbigo giawo. ⁶ Uvi enue, kumbi mudi musamba, ginyenu mu sugu yenu, jidigienu mufulo wenu, nu sambienu Shenu udi mu gifundo gia mafumbe; ngenyi Shenu udi mumona mu mafumbe mba udi gumihana gishimbigo gienu. ⁷ Nu hago mudi musamba, guvutula ndo mbimbi jiavula jiagituhu, gifua muanatshita athu ashigo enya gutshigina, mukunda anatangiza egi Nzambi mba udi guavila gula azuela ima yavula. ⁸ Mukunda nu ngenyi, mukhadigo gifua ene, ndaga Shenu udi mujiya itshi mudi nayo funu hatuama ene mumulombe. ⁹ Ngenyi, sambienu ngegi: «Shetu udi mu dilu, jina diaye dikhale diagunemesa. ¹⁰ Egi ufumu waye uze. Egi matangi aye akhale agutshita hashi gifua mu dilu. ¹¹ Tuhane gudia gua mangino. ¹² tuvile jikhenda mukunda nu gobola guetu, gifua esue tuanavila khenda athu ako anagututshita gubola. ¹³ Gutubembe ndo mu gulolewa, uvi tuhuluise ha mago muthu wabola.» (ndaga gudi aye guene gudi, guhuiminyina nu ngolo nu ginemua mukunda nu masugu agasue, idi ngenyi!) ¹⁴ Ndaga gula muavila athu ako khenda mukunda nungubola guawo, Shenu udi gosa mba udi nji gumivila khenda. ¹⁵ Uvi gula mushigo muvila athu ako jikhenda mukunda nu gubola guawo, Shenu mba ashigo nji gubola guenu. ¹⁶ NGenyi nji, gula mudi mutuna gudia, mukhadigo nu phala ya gikenene gifua muanatshita enya mambo, ana balumuna jiphala jiawo mukunda athu a amone egi adi mutuna gudia. Mu giamatshidia, ngudi gumiwambela egi, adi gale aguheta gishimbigo giawo. ¹⁷ Uvi enue, hago mudi mutuna gudia, diwasenu maji mu muto nu zuenu meya gu phala, ¹⁸ hagula egi mudijinago gudi athu egi mudi mutuna gudia, uvi khuta gudi Shenu udi ha gifundo giamafumbe. Nu Shenu, hadi gumimona mu mafumbe, mba udi gumihana gishimbigo. ¹⁹ Mukambigo umonyi wavula ha mavu wawa gunu thuguthugu nu ukelengenye wajiya guhubolesa, gunu nzangi jiajiya gungina nu gukuya. ²⁰ Ha gifundo gia ngenyi, zangudienu umonyi mu dilu gunu nga thuguthugu nga ukelengenye wajiyilego gu ubolesa nga nzangi gajiyilego gungina ha gukuya. ²¹ Ndaga ha ngifundo gidi umonyi waye, hene nji hadi nu mutshima waye. ²² Iso idi mwinda wa muila. Gula iso idi yabonga, muila wagasue udi waguzala nu mueji. ²³ Uvi gula iso didi diabola muila wagasue udi waguzala nu phipha! Nganyi, gula mueji udi mukatshi diaye udi diago phipha, luholo tshi phipha yenji idi? ²⁴ Gushigo nu muthu wajiya gutshitshila mafumu muyadi, ndaga mba utuna mumoshi nu mba uzumba muko, nga mba utumaga gudi mumoshi nu mba ushaga gudi muko. Muajiyilego gutshitshila Nzambi nu umonyi hamoshi. ²⁵ Hene ngudi gumiwambela egi, mukhadigo nu gikenene mukunda nu monyo wenu, nga mukunda nu yago mba mudia nga mba munua. (nga mukudna nu muila wenu, yago mba musudiga). Ndaga ya monyo ushigo yagubalega gudia, nu muila yagubalega milele? ²⁶ Tadienu tunjila tua gosa! Tuanakuna ndo nga guhela mabundu, nu tuana suega ndo mbuto mu mikala, uvi Shenu udi gosa wana tudisa. Mushigo yagubalega funu gudi tunjila? ²⁷ Nanyi ya mukatshi dienu gula wahaga gikenene wajila gulunda nga lusugu lumoshi gu monyo wenji? ²⁸ Na mukunda natshi mudi muhaga gikenene mukunda nu gusudiga guenu? Tangizenu gudi ivunza ya ilanga, gikhuatshi yanakula; yana tshita ndo mudimo, yana tunga ndo milele. ²⁹ Uvi ngudi gumiwambela nga muene Salomoni mu uhinyinyi wenji gasudigilego yagubalega mumoshi ya mukatshi diayo. ³⁰ Gula Nzambi udi musudigisa givunza gia mu gilanga gidi mangino nu hamene mba gikhala gia gumbiwa ha jigo dia tshuya, na gikhatshi mba gamisudigisago, enue, athu adi nu gustshigina guazonda? ³¹ Mukhadigo nu gikenene nu guzuela egi: «Itshi mba tudia?» nga, «Itshi mba tunua» nga, «Itshi mba tusudiga?» ³² Ima inyi yanakhala yagukambewa gudi athu adi ashigo enya gutshigina; Shenu udi gosa udi mujiya ndaga jiagasue mudi najo funu. ³³ Kambienu thomo ufumu nu giamatshidia; nu ima iko yagasue mba ikhala yagumihanewa. ³⁴ Mukhadigo nu gikenene mukunda nu lusugu lua hamene, ndaga lusugu lua hamene mba lukhala nu gikenene gienji. Ha lusugu ludi mutagenesa lamba dienji.