¹ Hamuenene thundu, Yesu wakandudgile ha mulundu; nu, hangima dia guditumbiga, alandudi enji asuenene hehi nu muene. ² Hangima, wazanguile imbimbi nu gualongesa egi: ³ Guzela muila gudi jiphuthu jia nyuma, ndaga ufumu wa mudilu udi wawo! ⁴ Guzela muila gudi athu adi nu gikenene, ndaga mba akhala agukukumudiwa masoji. ⁵ Guzela muila gudi athu ashigo nu gusuanguluga, ndaga mba aheta mavu! ⁶ Guzela muila gudi athu adi nu nzala nu luhungu lua giamatshidia, ndaga mba akhala yagukuta! ⁷ Guzela muila gudi enya khenda, ndaga mba aheta jikhenda! ⁸ Guzela muila gudi athu adi nu mitshima ilaphe, ndaga mba amona Nzambi! ⁹ Guzela muila gudi athu adi mukamba guhuima, ndaga mba atamegewa egi ana a Nzambi! ¹⁰ Guzela muila gudi athu adi mushiyiwa mukunda giamatshidia, ndaga ufumu wa mudilu udi wawo! ¹¹ Guzela muila mba gukhala nu enue, gula mba amisebulula, mba amishiya nu mba ata uthemua wabola gudi enue, mukunda nu ame. ¹² Khadienu nu gusuanguluga nu khadienu nu kiese giavula, mukunda gishimbigo gienu mba gikhala giakoma mu dilu; ndaga luholo lumoshi luene ashiyile azueledi a ndaga jiagutuama ajile gutuama dienu. ¹³ Mudi mungua wa hamavu. Uvi gula mungua watotesa gufula guenji, funu yenji itshi? Ushigo nji nu funu nu mba ubishidiwa honze, nu mba udiatewa gu malu a athu. ¹⁴ Mudi mueji (muanya) wa hamavu. Dimbo dimoshi diamusamba didi diaguhagewa holu dia mulundu nu diajiyilego gusuegewa. ¹⁵ nu analemesago muinda mukunda nu guhaga goshia mesa, uvi wanahagewa ha gifundo gianahagewa muinda, nu wene wana hana mueji gudi athu agasue adi monzo. ¹⁶ Egi mueji wenu uleme gutuama dia athu, hagula egi amone midimo yabonga, nu atumbuyise Shenu udi mudilu. ¹⁷ Mutangizago egi ngajile mukunda nu gushiya mikhuala nu azueledi a ndaga jiagutuama; ngajilego mukunda nu gushiya mikhuala, uvi mukunda nu gutagenesa mikhuala. ¹⁸ Ndaga, ngudi gumiwambela mu giamatshidia, gula dilu nu mavu abalegelego, mba gutotigo nga gagisono gamoshi nga gamufunda gamoshi ga mukanda, unu mba itagana. ¹⁹ Muthu yagasue mba ushiya nga gamoshi ga mikhuala yazonda, nu mba ulongesa gudi athu ha gutshita ngenyi, mba ukhala yagutamegewa egi mona yazonda ya mu ufumu wa mudilu; uvi muthu yago udi mutala mikhuala, nu udi mulongesa athu ha gu itala, muthu muene mba utamegewa egi mukulu mu ufumu wa mudilu. ²⁰ Ndaga, ngudi gumiwambela, gula giamatshidia gienu giabalegelego gia enya gusonega nu gia afalase, mba munginyigo mu ufumu wa mudilu. ²¹ Muavile egi awambelele akulu egi: Mba ushiyigo; muthu mba ushiya mba uhanewa ndola gudi jinzuji. ²² Uvi ame, ngudi gumiwambela egi muthu yagasue mba uvila phanji'enji khabu udi nayo guhanewa ndola gudi jinzuji; nga yago mba uwambela phanji'enji egi: Raca! udi nayo guhanewa ndola gudi nganga Nzambi ya gikombelelo; nu muthu yagasue mba uwambela phanji'enji egi: waheya! udi nayo guhanewa ndola ya tshuya tuakonda gisugishilo. ²³ Gula udi muhana mulambu waye gu gikombelelo, nu gula guene gunu watangiza egi udi gikembe nu phanji'aye, ²⁴ bemba mulambu waye gu gikombelelo, nu nda thomo udive nu phanji'aye; hangima, giza uhane mulambu waye. ²⁵ Divise muabonga nu mbalagaji yaye, hago udi muwenda nenji mu njila, hagula egi agufundigo gudi nzuji, nu egi nzuji aguhane gudi phulushi ha gugumba mu bologo. ²⁶ Ngudi guguwambela mu giamatshidia, mba uzogigo gula wahanenego (wafutilego) gitshinyi gia nguana. ²⁷ Muavile azuelele egi: Mba ustshitshigo uthambi. ²⁸ Uvi ame, ngudi gumiwambela egi muthu yagasue watala mukhetu ha gukamba gumubuisa mukaji'enji watshitshi gale uthambi nu muene mu mutshima wenji. ²⁹ Gula iso yaye idi mukunda nu aye gikhakhuishilo, dihalumune nu dibishile gualeha nu naye; ndaga idi yatagana hagula egi aye utotese gidiando gimoshi gia muila waye, nu muila waye wagasue ukhadigo wagubishidiwa mu tshuya. ³⁰ Nu gula koko waye wa madia udi ukunda nu naye gikhakhuishilo, dikoke nu dibishile haleha nu naye; ndaga idi yatagana mukunda nu aye ha gutotesa gidiando gimoshi gia muila, nu muila waye wagasue uyigo mu tshuya. ³¹ Yazuelewe egi: Muthu yagasue udi mukaya mukaji'enji amuhane mukanda wa gushiya mahata. ³² Uvi ame, ngudi gumiwambela egi muthu wakaya mukaji'enji, khuta mukunda nu uthambi, udi gumuhaga ha gutshita uthambi, nu gula muthu wawata mukhetu wakayewa mu mahata umutshita uthambi. ³³ Muavile nji egi azuelele gudi akulu egi: «Gudita ndo mukumbu uvi tshitenu gudi Fumu.» ³⁴ Henyaha, Gudilowa ndo nga mu dilu nga mu gife gia ufumu gia Nzambi, ³⁵ nga mu mavu ndaga adi gidiatelo gia Nzambi; nga mu Yelusalema ndaga didi dimbo dia Fumu Wakoma. ³⁶ Gudilowa ndo nga mun muto wenu hakhenu, ndaga mushigo yatagana ha gubuisa sanga jienu jimvi. ³⁷ Hago mudi muzuela, mbimbi yenu ikhale yatagana «Ai, ai» nga «Ndo, ndo». Yagasue idi muza hangima idi muza gudi Muthu wabola. ³⁸ Muavile azuelele egi: «Iso nu iso, nu dizo nu dizo.» ³⁹ Uvi ame ngudi gumiwambela egi, gukola matangi ndo gudi muthu wabola matangi; ha gifundo gia luholo lunu, muthu yagasue wamiwasa gu butu dia madia, muhagele nji butu dia gihidi. ⁴⁰ Nu gula muthu watshigina gugufunda mukunda nu gugutambula shimishi yaye, mubembele nji azangule nu gazawu gaye. ⁴¹ Muthu yagasue waguhana ndola ha gutshita midi imoshi ya metelo, mutshitshile ba metelo muyadi. ⁴² Hana gudi muthu udi gugulomba, nu gutuna ndo ha gusomba gudi muthu udi mutshigina gusomba gudi aye. ⁴³ Muavile azuelele egi: «Mba uzumba phanji'aye nu mba utuna mbalagaji yaye.» ⁴⁴ Uvi ame ngudi gumiwambela egi: «Zumbenu mbalagaji jienu nu lombienu Nzambi mukunda nu athu adi gumimonesa malamba, ⁴⁵ ngenyi mba mukhala ana a Shenu udi mu dilu. Ndaga wana zola tangua mukunda nu athu abola matangi nu athu abonga, nu wana nogesa mvula mukunda nu athu atagana nu ashigo atagana. ⁴⁶ Ndaga gula mudi muzumba khuta anyi adi gumizumba, itshi mba muheta gifua gishimbigo? Nga ene enya gufutisa gitadi anatshita ngenyi. Mudi nayo gutshita yagubalega ene. ⁴⁷ Nu gula mudi mumenega khuta aphanji'enu a mala, itshi mudi mutshita hene yabalega gubonga gudi athu ako? Nga ene ashigo enya gutshigina anatshita ngenyi. ⁴⁸ Hene mudi nayo gukhala yatagana, mu luholo Shenu udi gosa udi yatagana.