¹ Hene Yesu wabatewe gudi Nyuma mu gibalala, mukunda nu gukhala yagulolewa gudi diabulu. ² Hangima dia gutuna gudia masugu makumi awana nu phipha makumi awana, nzala yamukhatele. ³ Muthu wakhalele gumulola, wasuenene, wamuwambelele egi: Gula udi Muna Nzambi, hana mukhuala egi maseso abue mapha. ⁴ Yesu wamutayele egi: Idi yagusonega egi: Muthu mba gajingilago khuta mapha, uvi mbimbi yagasue idi muzoga mu kano wa Nzambi. ⁵ Diabulu wamubatele gu dimbo dia gijila, wamuhagele holu dia gikombelelo, ⁶ nu wamuwambelele egi: Gula udi muna Nzambi, thenyiga nu udibishile hashi; ndaga idi yagusaonega egi: mba uhana mikhuala gudi anjelo enji mukunda nu aye; Nu mba agubata ha mago awo, hagula egi kulu waye ukhakhugago gu seso. ⁷ Yesu wamuwambelele egi: Idi nji yagusonega egi: Mba ulodigo Fumu, Nzambi waye. ⁸ Diabulu wamubatele nji holu dia mulundu wabalega guleha, wamudijinyine ufumu wa mavu agasue nu uhunyinyi wenji, ⁹ nu wamuwambelele: Mba nguguhana ima yagasue, gula wafugama nu wangukombelela. ¹⁰ Yesu wamuwambelele egi: Katuga, Satana! Ndaga idi yagusonega egi: Mba ukombelela Fumu, Nzambi yaye, nu mba umutshitshila khuta muene. ¹¹ Hene diabulu wamubembele. Nu tala, anjelo ajile gudi Yesu, nu amutshitshile mudimo. ¹² Yesu, havile egi Yone washiyiwe, wakatugile gu Galiliya. ¹³ Wakatugile gu Nzaleta, nu wajile mukhala gu Kapelanawuma, idi hehi nu nzadi, mu khanda ya Zabuloni nu Nefetali, ¹⁴ hagula egi ndaga yazuelele Esayi itaganesewe, muzueledi wa ndaga jia gutuama egi: ¹⁵ Thundu ya Zabulona nu Nefetali, yakhanda idi hehi nu nzadi, mu mavu ahasambua dia Yodani, Nu ya Galileya ya enya gudizalumuna, ¹⁶ thundu yeyi, yaditumbiga mu phipha, yamonyi muanya wakola; Nu holu dia ago akhalele aditumbiga mu mavu nu givule gia gufua. Muanya wazugile. ¹⁷ Sendese kumbi dinyi Yesu wasendesele gulongesa, nu guzuela egi: Balumunienu mitshima, ndaga ufumu wamudilu udi hehi. ¹⁸ Hakhalele muwenda mu khulugo ya nzadi ya Galeleya, wamuenene aphangi a mala muyadi, Simona, umutamegewa egi Phetelo, nu Andele, phangi'enji, akhalele mumba wanda mu meya; ndaga akhalele enya gulowa. ¹⁹ Muene wawambelele egi: Nguhatienu, nu mba ngumihaga enya gulowa athu. ²⁰ Hamoshi, abembele wanda, nu amuhatele. ²¹ Hadile akatuga nu ayile gualeha, wamuenene aphanji'a mala muyadi, Yokobo, muna Zebedeya, nu Yone, phanji'enji a yala, akhalele mu wato nu shawo Zebedeya, nu akhalele mulonda wanda wawo. watamegene, ²² nu hamoshi abembele wato nu shawo, nu amuhatele. ²³ Yesu wawendele mu Galileya gagisue, nu gulongesa mu ikombelelo, nu gulongesa mbimbi ihe-ihe ya ufumu, nu gusaga akhashi agasue nu ikata mukatshi dia thundu. ²⁴ Ndaga jienji jiamuanganene mu Siri yagasue, et amubatele athu agasue akhalele nu ukhashi numalamba a luholo nu luholo, enya ivule yabola; nu ikata; nu muene wasagele. ²⁵ Thnudnu imoshi yakoma yamuhatele, gu Galiliya, gu Dekapole, gu Yelusalema, gu Yudeya, nu ha sambua dia Yodani.