¹ Hene ufumu wa mu dilu mba ukhala ya gufuanegesa nu ana akhetu adi khenji ajiyilego mala kumi ago, azanguile minda yawo, ayile mutagana yala wa mahata. ² Mutano ya mukatshi diawo akhalele aheya, nu mutano ako akhalele atema. ³ Aheya, ha guzangula minda yawo, azanguilego maji (mafuta), ⁴ uvi atema azanguile maji, nu minda yawo, maji akhalele mu itutu (mbidigi) yawo. ⁵ Yala wa hugile ha guheta, ana akhetu agasue ahuidile nu abandele tulo. ⁶ Ha katshi dia phipha, akologele egi: Tala yala wa mahata, ndienu gu mutagana! ⁷ Hene ana akhetu adi khenji ajiyilego mala agasue azugile gu tulo, nu alemesele minda yawo. ⁸ Aheya awambelele anyi atema egi: Tuhanienu maji enu, ndaga minda yetu idi mujima. ⁹ Atema ateyele egi: Ndo; tushigo nu maji avula mukunda nu esue nu enue; uvi ndienu musumbe gudi athu anadiga maji, nu sumbenu mukunda nu enue. ¹⁰ Mukumbi diago ene ayile musumba, yala wa mahata wahetele, ana akhetu ago agudilonda anginyine nenji mu bugu dia mahata, nu gijidigo giajidigiwe. ¹¹ Hangima, ana akhetu ako adi khenji ajilego mala ahetele, nu azuelele egi: Fumu, Fumu, tuzuluile. ¹² Uvi muene watayele egi: Ngudi gumiwambela mu giamatshidia egi, ngushigo gumijiya. ¹³ Khadienu yagudilonda, ndaga ya mushigo mujiya nga lusugu, nga kumbi. ¹⁴ Mba gukhala gifua muthu mumoshi yago, wakhalele muya guwenda, watamegene enya mudimo enji, nu wahanene umonyi (ima) wenji. ¹⁵ Wahanene makuta (falanga jia gibende) gudi mumoshi, jiyadi gudi muko, nu imoshi gudi yagitatu, gudi yagasue ha luholo luenji, nu wayile. Hangima ¹⁶ yago wazanguile makuta atano wayile genji, nu wa jitshitshile mudimo, nu wahetele makuta ako atano holu dienji. ¹⁷ Luholo lumoshi luene, yago wazanguile makuta ayadi wahetele nji makuta ako ayadi holu dienji. ¹⁸ Yago wazanguile kuta dimoshi wayile nu wahagele wina mu mavu, nu wasuegele falanga jia fumu yenji. ¹⁹ Hangima dia masugu avula, fumu ya mudimo wajile (wavutugile), nu watamegene ha gutala luholo atshitshile mudimo nu makuta. ²⁰ Yago wazanguile makuta atano wasuenene, nu wabatele makuta ako atano, nu wazuelele egi: Fumu, wanguhanene makuta atano; tala, ngaheti makuta ako atano holu dienji. ²¹ Fumu yenji wazuelele egi: Idi yabonga, muenya mudimo watagana nu wabonga; wakhalele yagutagana gu ima yazonda, mba guguhana ima yavula; ngina mu gusuanguluga gua fumu yaye. ²² Yago wazanguile makuta ayadi wasuenene nji, nu wazuelele egi: Fumu, wanguhanene makuta ayadi; tala, ngaheti makuta ako ayadi holu dienji. ²³ Fumu yenji wazuelele egi: Idi yatagana, muenya mudimo wabonga; wakhalele yatagana gu ima yazonda, mba guguhana ima yavula; ngina mu gusuanguluga gua gua fumu yaye. ²⁴ Yago wazanguile khuta kuta dimoshi wasuenene hangima, nu muene wazuelele egi: «Fumu, Ngajile egi udi muthu wakola matangi, yago wanahela mbuto jiago watunyine gukuna, nu wanazangula umonyi wakonda mudimo. ²⁵ Ngavi woma, hene ngayile, nu ngasuegele kuta diaye mu mavu. Tala, kuta diaye diny'edi (didi).» ²⁶ Uvi fumu yenji ya mudimo watayele egi: «Muenya mudimo wabola nu wagimonya, wajiyile egi nganahela mbuto jiago ngatunyine gukuna. ²⁷ Mukunda natshi watunyi guhaga makuta ami mu inzo ya falanga unu mbanguvutuga, nga ngaheti kuta diami nu malugulugu holu dienji. » ²⁸ Mutabudienu kuta diene nu dihanenu gudi muenya mudimo udi makuta kumi. ²⁹ Ndaga, yago udi nayo, mba ulundiwa yavula. Uvi, yago gashigo nayo, nga gandambo gadin nayo mba gamutambudiwa. ³⁰ Bishidienu muenya mudimo wagituhu honze hala bui, gunu gudi idilo nu gukolotota mazo. » ³¹ Hago Muna Muthu mba gaza mu lutumbu luenji nu ajelo agasue khungi nenji, hene, mba uditumbiga ha gife gienji gia lutumbu. ³² Membo a ha mavu agasue mba adibungisa hatuama dienji nu mba ukaphumuna athu, gifuanegesa nu mubambi ya imeme wana kaphumuna imeme nu khombo. ³³ Mba uhaga imeme gu khanda ya gitata, nu khombo gu khanda ya mahidi. ³⁴ Hene (Muatha) Fumu mba uwambela ago adi khanda ya koko wenji wa gitata egi: « Jienu enue muakhalele yagusagumuna gudi Shami, zaludienu ufumu walondewe mukunda nu enue sendese gisendeselo gia gifutshi (mavu). ³⁵ Ndaga ngakhalele nu inzala nu enue muanguhanene madia; ngakhalele nu luhungu nu enue muanguhanene yagunua; ngakhalele munjienjia nu enue muanguzanguile; ³⁶ ngakhalele thowa nu enue muangusudigile milele; ngakhalele mukhashi nu enue muangusagele; ngakhalele mu bologo nu enue muejile gungukuatesa. ³⁷ Hene atagana mba ataya egi: « Fumu, kumbi tshi wakhalele nu inzala nu esue tuanguhanene madia? wakhalele nu luhungu nu esue tuanguhanene yagunua? ³⁸ Nu hugo tshi wakhalele munjienjia nu esue tuaguzanguile? wakhalele thowa nu esue tuangusudigile milele; ³⁹ Nu hugo tshi wakhalele mukhashi nu esue tuagusagele? wakhalele mu bologo nu esue tuejile gudi aye? ⁴⁰ Nu Fumu mba utaya egi: « Mu giamatshidia ngudi gumiwambela, yagasue muatshitshile gudi mumoshi ya muykatshi dia ana wawa azonda ya aphanjiami a mala, idi gudi ame mua itshitshile.» ⁴¹ Hangima mba uwambela gudi athu ago mba akhala gu khanda ya koko wenji wa mahidi egi: << Katugienu hehi nu ame, muashinjiwe (muatewe mukumbu); ndienu mu tshuya tuakonda gisugishilo tuahagewe mukunda nu diabulu nu anjelo enji, ⁴² Ndaga ya ngakhalele nu inzala nu enue muanguhanenego madia; ngakhalele nu luhungu nu enue muanguhanenego yagunua; ⁴³ ngakhalele munjienjia nu enue muanguzanguilego; ngakhalele thowa nu enue muangusudigilego milele; ngakhalele mukhashi nu enue muangusagelego; ngakhalele mu bologo nu enue muejilego gungukuatesa. ⁴⁴ Hene ene mba amutaya egi: « Fumu, kumbi tshi tuagumuenene nu inzala, nga wakhalele nu luhungu, nga wakhalele munjienjia, nga wakhalele thowa, nga wakhalele mukhashi; nga wakhalele mu bologo nu esue tuejile gudi aye ha gugukuatesa? ⁴⁵ Hene, Fumu mba utaya egi: « Mu giamatshidia ngudi gumiwambela, yagasue muatunyine gutshita gudi mumoshi ya mukatshi dia ana wawa azonda, idi gudi ame muatunyine guyitshita. » ⁴⁶ Athu wawa mba azangula ndola yakonda gisugishilo nu atagana mba azangula monyo ushigo nu gisugishilo. »