1 Yesu wazogele mu inzo ya Nzambi nu wayile genji. Alandudi asuenene hehi nu muene ha gumudijiga luholo luatungiwe inzo ya Nzambi. 2 Uvi wawambelele egi: « Mushigo mumona ima yeyi yagasue? Mu giamatshidia ngudi gumiwambela, nga seso imoshi mba isadigo holu dia iko ishigo yagubuishiwa.» 3 Wa ditumbigile holu dia mulundu wa Olivie, alandudi ajile gudi muene yagudisuega nu amuhudeile egi «Tuwambele kumbi tshi ima yene mba iza. Itshi mba ikhala gijiyishilo gia guza guaye nu ima mba idijina gisugishilo gia mavu?» 4 Yesu watayele egi: « 5 Avula mba' aza mu jina diami nu guzuela egi: Ame ngudi Kilisto. Nu mba' alumbuisa athu avula. 6 Mba mutegelela (mbamuvua) athu muzuelela ita nu ndaga jia gihe-gihe jia ita; mukhadigo nu gudisagesa, ndaga ya ima yeyi yagasue idi nayo guza; uvi ishigo gisugishilo. 7 Ndaga ya dimbo dimoshi mba dizuga ha guluisa dimbo diko, nu ufumu umoshi mukunda nun ufumu uko, mba gukhala nu jinzala nu gudigita gua mavu mu ifundo yavula. 8 Uvi yagasue yeyi mba ikhala khuta gisendeselo gua musongo wa gubuta. 9 Nangima mba amihana malamba, nu mba amishiya; nu mba mukhala yagutunyiwa gudi athu a membo agsue, mukunda nu jina diami. 10 Hene nji avula mba afua, nu mba adihana gudi mbalagaji, mba adituna ene nu ene. 11 Azueledi a ndaga jia gumatuama avula mba azoga, nu mba adimba athu avula. 12 Nu, mukunda nu gubola mba gukhala yabalega guvula, gutshigina gua athu avula mba gubua madidi (gufutama). 13 Uvi muthu yago mba udindamana unu gu gisugishilo mba ukhala ya guhulushiwa. 14 Mbimbi ei ya bonga ya ufumu mba ilongewa mu mavu agasue, mukunda nu gutshitshila uthemua gudi membo agasue. Hangima gisugishilo mba giza (mba giheta). 15 Mukunda nu ngenyi, hago mba mumona gusebulula gua gikenene ginyi giasuelele muzueledi wa ndaga jia gutuama Daniele mutshitshiwa mu ifundo ya gijila (egi ago adi mutanga akotelese), 16 athu ago mu Yudeya mba alenga mu milundu, 17 muthu yago udi holu dia yangi gatulugago mu inzo yenji mukunda nu guzangula nga gima tshi, 18 nu muthu yago udi mu gilanga gavutugago gombo dienji ha guzangula mulele wenji. 19 Mukumbu gudi akhetu amavomo nu ago mba amunuisa mu masugu ene! 20 Lombienu mukunda egi gulenga guenu guhetigo mu kumbi dia mvula, nga mu lusugu lua gisabato. 21 Ndaga ya lamba mba dikhala diagubalega guvula mu luholo khenji lukhalele ndo sendese gisendeselo gia gifutshi (mavu) unu mamino, nu mba gukhadigo nji. 22 Gula masugu ene ashigo aguzondesa, nga thumba imoshigo mba ikhala ya guhuluishiwa; uvi mukunda nu athu ago aphonewe, masugu ene mba akhala aguzondesa. 23 Hene gula muthu mumoshi wamiwambela egi: «Tadienu, Kilisto udi haha, nga Kilisto udi gu khanda inyi, mu mutshiginago. 24 Ndaga akilisto nu azueledi a ndaga jia gutuama a mambo mba aza nu mba atshita ndaga jia gushimana jiakoma nu imona meso, hagula egi atotese njila yamatshidia gula luholo ludi guene, nga ene athu aphonewe. 25 Tadienu, ngamiwambela gutuama.» 26 Gula amiwambela egi: «Tadienu, Kilisto udi mu gibalala, muyigo; nga udi mu khombe imoshi, mutshiginago. 27 Ndaga fifuanegesa nu mueji wa mvula wanazoga gu Esete nu guanalema unu gu Luwesete, ngenyi nji mba gukhala guza gua Muna Muthu. 28 Gunu gudi jimvumbi jia shitu (mbiji), guene nji mba gukhala nu khuiyi. 29 Hangima dia masugu ene a malamba agubalega guvula, tanua mba dibua dilabui, ngonda mba itotesa mueji wenji, themua mba jibua, nu ngolo jia mudilu mba jibuishiwa. 30 Hene mba hazoga ijiyishilo ya Muna Muthu gosa, nu ikanda yagasue ya ha mavu mba ikhala nu gikenene. Mba imona Muna Muthu muza mu matuta gosa nu ngolo nu lutumbu luakoma. 31 Mu gingungu gia mondo, mba utuma anjelo enji mukunda nu gubungisa athu ago aphonewe a khanda jiwana jia muhehe, gu gisugishilo gia dilu unu gisugishilo giko. 32 Zagudienu longo dia mutshi wa fijie. Hago thango jianabua jialeha nu jianahaga mayiji, mba mujiya egi gishiyo gidi hehi. 33 Luholo lumoshi luene, hago mba mumona ndaga jieji jiagasue, mba mujiya egi muene udi hehi, ha mufulo. 34 Mu giamatshidia ngudi gumiwambela, gindongo giegi mba gibalegago unu ndaga jieji mba jiheta (jiza). 35 Dilu nu mavu mba abalega, uvi mbimbi yami mba ibalegago. 36 Uvi yago idi mutala lusugu nu kumbi, gushigo nga muthu udi mujiya, nga anjelo mu dilu, nga Mona, uvi khuta Tata hakhenji. 37 luholo lumoshin luene nu masugu a Nowa, ngenyi nji mba gukhala guza gua Muna Muthu. 38 Ndaga ya, luholo lua masugu ene anyi gutuama dia mvula yakola athu akhalele mudia nu gunua, gudiwata nu guhana anawo a akhetu nu a mala mu mahata unu lusugu Nowa wanginyine mu wato. 39 Ajiyilego nga gima gimoshigo unu mvula yanogele nu yashiyile agasue. Ngenyi nji guza gua Muna Muthu mba gukhala. 40 Hene mala muyadi mba akhala mu gilanga, mumoshi mba uzangudiwa, nu muko mba ubembewa. 41 Akhetu muyadi mba akhala mutua mu ginu gimoshi, mumoshi mba uzangudiwa nu muko mba ubembewa. 42 Khadienu nu utaledi wenu, ndaga mushigo mujiya lusugu luago Fumu yenu mba gaza. 43 Uvi jiyenu egi gula ffumu ya inzo wajiyile kumbi diago nzangi mba iza, nga wakhalele nu utaledi wenji nu nga gabembelego nzanga ha gukuya inzo yenji. 44 Mukunda nu ngenyi mudi nayo gukhala yatagana, ndaga Muna Muthu mba uza ha kumbi dinyi mushigo mujiya. 45 Muenya mudimo tshi watagana nu wa ngambi, gula gfumu yenji wamuhaga mu inzo yenji, mukunda nu guhana madia mu kumbi dia tagana? 46 Mba ukhala muenya mudimo wagusuanguluga gula fumu ya inzo wamusanga nu gutshuita luholo luamutumine hago muene mba aza. 47 Mu giamatshidia ngudi gumiwambela egi fumu ya inzo mba umuhaga ha gutala ima yenji yagasue. 48 Uvi gula muenya mudimo mumoshi wabola udi mutangiza egi: «Fumu yami gashigo muza luenyelu », 49 nu wasendesa guwasa enya mudimon ako, gudia nu gunua nu enya gulawuga matombe, 50 fumu yenji mba uza mu lusugu lunu muenya mudimo mba gajiyigo, nu mu kumbi dinyi mba gajiyigo. 51 Fumu yenji mba umukoka mu idiando nu mba uhaga ndola yenji luholo lumoshi louene nu athu adi enya mambo, gunu mba gukhala idilo nu gukolotota mazo.