¹ Hangima, Yesu wawambelele thundu nu alandudi enji. ² Wazuelele egi: « Enya gusonega nu afalese adi guditumbiga ha gife gia Mose. ³ Ngenyi, nga itshi adi gumituma ha gutshita, itshitenu nu ihagenu mu midimo. Uvi muhatigo gutshita giawo. Ndaga adi muzuela ima yene, uvi ashigo gu ihaga mu midimo. ⁴ Diago, adi muhaga ginemo gianema giakola ha gubata, nu adi muhihaga ha jiphanga jia athu. Uvi ene akhawo ashigo mutshigina gunyigisa nga muno wawo umoshi mukunda nu gubata. ⁵ Adi mutshita ndaga jiawo jiagasue mukunda nu akhale yagumonewa gudi athu. Ndaga adi mulonda manjianga aleha ago adi musudiga, nu adi mukomesa songi jia milele yawo. ⁶ Atshigina ifundo yagudiangela mu mawano, nu ife yagudiangela mu jinzo jia Nzambi, ⁷ nu gukolesewa lumene mu mafundo a munjila, nu gutamegewa egi "Rabbi" gudi athu. ⁸ Uvi mushigo nayo gutshigina gutamegewa egi « Rabbi », ndaga mudi nu longi mumoshi, nu agasue, mudi aphangi a mala. ⁹ Nu gutamaga ndo nga muthu ashi a mavu egi Shami, ndaga mudi nu shenu mumoshi, nu udi mu dilu ¹⁰ Amitamega go egi «Longi », ndaga mudi nu longi mumoshi, Kilisto. ¹¹ Uvi yago udi mukuluphi (mbuta) mukatshi dienu mba ukhala muenya mudimo wenu. ¹² Muthu yagasue mba udi kanduisa mba ukhala yagubulumuishiwa, nu muthu yagasue mba udi bulumusa mba ukanduishiwa. ¹³ Uvi lamba diavula gudi enue, enya gusonega nu afalase, enya khenda jia gabutu! Mudi mubatega (mukanga) ufumu wa mu dilu gudi athu. Ndaga mushigo gu ungina enuen hakhenu, nu mushigo muhana njila nji gudi ago adi nayo gungina ha gungina. ¹⁴ (isono ikulu yabalega gubonga yanabuisa njila 14, iko ana lunda njila hangima dia njila 12). «Lamba diavula gudi enue enya gusonega nu afalase, enya khenda jia gabutu! ndaga mudi mumonesa ndumbu (akhetu agafunda) malamba » ¹⁵ Malamba avula gudi enue, enya gusonega nu afalase, enya khenda jia gabutu! Ndaga mudi muya holu dia nzadi nu holu dia mavu mukunda nu abalumuna athu mitshima. Nu hago adi mubalumuna mutshima, mudi gumubuisa mahugo ayadi mona wa malamba ashigo nu suga, luholo enue hakhenu mudi. ¹⁶ Lamba diavula gudi enue, atuameji a ifua meso, enue mudi muzuela egi: «Muthun yagasue udi muta muzo mu inzo ya Nzambi gatshitshilego nga gima. Uvi muthu yagasue wata muzo mu wolo wa inzo ya Nzambi udi yagujitshigiwa gudi muzo.» ¹⁷ Enue, athu aheya ashisgo mumona! Itshi idi yabalega gukoma, wolo, nga inzo ya Nzambi ya phelegetesele wolo? ¹⁸ Nu, «Muthu yagasue wata muzo gu mesa a Nzambi gastshitshilego gima. Uvi nga mthu tshi mwata muzo mu mulambu udi gu mesa a Nzambi udi yagujitshigiwa gudi muzo.» ¹⁹ Enue mudi ifua meso, itshi idi yabalega gukoma, mulambu nga mesa a Nzambi adi muphelegetesa mulambu? ²⁰ Ngenyi, yago udi muta muzo ha mesa a Nzambi udi muta muzo ha mesa a Nzambi nu ima yagasue idi holu dienji. ²¹ Nu yago udi muta muzo mu inzo ya Nzambi udi muta muzo mu inzo ya Nzambi nu gudi muthu udi mujinga mu inzo ya Nzambi. ²² Nu yago udi muta muzo mu dilu udi udi muta muzo mu gife gia ufumu wa Nzambi nu gudi yago udi yaguditumbiga holu dia gife gia ufumu giene. ²³ Malamba avula gudi enue, asonegi nu afalese, enya khenda jia gabutu! Ndaga enue mudi muhana dikumi dia mente, dia anete nu dia kimine, uvi mudi mubemba ndaga jiabalega funu mu mikhuala (mulonga wa tagana, guvila jikhenda nu mukhuala). Uvi, idi ima yene mudi nayo gutshita, nga gubemba ndo gima giko. ²⁴ Enue, atuameji a ifua meso, enue mudi muphona gana ga gikeku uvi mudi muminya ngombe. ²⁵ Malamba avula gudi enue, asonegi nu afalese, enya khenda jia gabutu! Ndaga enue mudi mukomba hanze (honze) ya kopha nu longa, uvi mukatshi, mudi yaguzala nu unzangi nu gubalegesa. ²⁶ Afalase afua meso, komba yagudiangela (thomo) mukatshi dia kopha nu longa, angima hanze (honze) habue (haze) nji halaphe. ²⁷ Malamba avula gudi enue, asonegi nu afalese, enya khenda jia gabutu! Ndaga enue mudi gifua malumba ambiwa mukubu ulaphe, adi mumuenega abonga gu gutala hanze, uvi ago mukatshi dienji adi aguzala nu ibozo (mikuwa) ya mvumbi nu ima yagasue yabola. ²⁸ Luholo lumoshi luene, enue nji mudi mumuenewa muatagana gudi athu a hanze, uvi mukatshi dienu mudi yaguzala nu khenda jia gabutu nu gubola. ²⁹ Malamba avula gudi enue, asonegi nu afalese, enya khenda jia gabutu! Ndaga enue mudi mutunga malumba a azueledi a ndaga jia gumatuama nu mudi mumba mikubu mu malumba a athu atagana. ³⁰ Mudi muzuela egi: « Gula nga tuakhalele mu masugu a atata etu, nga tuabunduilego mahatshi a azueledi a ndaga jia gumatuama nu ene. » ³¹ Ngenyi, mudi muta uthemua udi gumishiya milonga enue hakhenu egi mudi ana a athu ago ashiyile azueledi a ndaga jia gumatuama. ³² Ngenyi, mudi muzalesa luendu lua ashenu. ³³ Mudi nyoga, mu ndonga ya vambu (giwuta), gikhuatshi muajiya gulenga gusambesewa gua tshuya tushigo nu gisugishilo? ³⁴ Mukunda nu ngenyi, tadienu, ngamitumina azueledi a ndaga jia gumatuama, jingambi nu enya gusonega. mba mushiya nu mba muhaga ako ha mutshi wa gudikikisa. Nu mba mukuphula ako mu ikombelelo yenu, nu mba mu ahata mu membo a musamba. ³⁵ Gisugishilo giengi gidi egi holu dienu mba habua mahatshi agasue a athu ashigo mujiya ndaga ago mba ashiyiwa ha mavu sendese gudi Abele muthu watagana, unu gudi Zakaliya, muna Balashi, yago muashiyile ha katshi na katshi dia mesa a Nzambi nu giphelegeteselo. ³⁶ Mu giamatshidia, ngudi gumiwambela, ima yeyi yagasue mba itagana mu gindongo giegi. ³⁷ Yelusalema, Yelusalema, aye udi mushiya azueledi a ndaga jiagumatuama jiagasue nu udi mubatula miminyo ya ago ngatumine gudi aye! Mahugo gutshi ngatshiginyine gubungisa anaye, gifua susua yanabungisa anenji mu mahambu, uvi muayitshiginyine go. ³⁸ Tadienu, inzo yenu idi yawuma (yagituhu). ³⁹ Ndaga ngudi gumiwambela, mba mungumonyigo luko, unu mba muzuela egi: «Guzela muila gukhale gudi yago udi muza mu jina dia Fumu.»