¹ Yesu wawambelele luko mu ishima nu guzuela egi: ² << Ufumu wa mu dilu udi gifua (wadifuana) fumu mumoshi wakhalele mulonda wano wa mahata mukunda nu munenji ya yala. ³ Watumine enya mudimo enji ha gutamega athu ago akhalele yagutamegewa mukunda nu mahata, uvi atshiginyinego guza. ⁴ Fumu watumine luko enya mudimo ako nu guzuela egi: "Wambelenu ago adi yagutamegewa: « Tadienu, ngalonda gudia guami gua mumuanya; ngombe jiami jia alume nu ngombe jiami jia mitumba jia maji jiashiyiwa nu ima yagasue idi yagolonda. Gizenu gu wano wa mahata.»" ⁵ Uvi athu ene amuzanguilego nu ginemua. Ayile gawo ako gu ilanga, ako mu ndaga jiawo. ⁶ Ako akhatele enya mudimo wa fumu, a asagesene nu a ashiyile. ⁷ Fumu wavile jikhabu; watumine masalayi enyi ha gushiya mbundudi jiene nu gukonda dimbo diawo tshuya. ⁸ Hangima wawambelele enya mudimo wenji egi: "Mawano adi hehi, uvi ago adi yagutamegewa akhalelego yagutagana ha guza. ⁹ Hene, ndienu mu phambu nu tamege athu avula ago mudi musanga nawo ha guza gu wano wa mahata." ¹⁰ Enya mudimo ayile mu jinjila nu abungishile athu agasue ago asangele, abola nu abonga. Hene, inzo ya mahata yakhalele yaguzala nu athu amegewe. ¹¹ Uvi hago fumu anginyine ha gutala athu atamegewe, wamuenene muthu mumoshi gakhalelego yagusudiga mulele wa wano. ¹² Fumu wamuhudile: "Futa, gikhuatshi wanginyi haha yagutuna gusudiga mulele wa wano?" Nu muthu muene gavutudilego nga mbimbi. ¹³ Hene, fumu wawambelele enya mudimo egi: "Jitshigienu mago nu malu a muthu ou nu mubishidienu honze (hanze) halabui, guene gunu mba gukhala idilo nu gukolotota mazo." ¹⁴ Ndaga avula adi yagutamegewa, uvi azonda adi agutombewa (aguphonewa).» ¹⁵ Hangima, Afalesa ayile mu gudivisa luholo luagutela Yesu muheto mu mbimbi jienji hakhenji. ¹⁶ Atumine gudi muene alandudi awo, agudibungisa nu enya Elodiene. awambelele Yesu egi: « Longi, tudi mujiya egi udi muzuela ya giamatshidia nu udi mulongesa njila ya Nzambi mu giamatshidia. Ushigo muzangula nga mbimbi ya muthu nu ushigo mubua khanda imoshi mukatshi dia athu. ¹⁷ Hene tuwambele, itshi udi mutangiza?: idi yagutshiginyishiwa mu mikhuala ha gufuta gitadi gudi Sezare nga ndo? » ¹⁸ Uvi Yesu wajiyile gubola guawo nu wazuelele egi: « Enya khenda jia gabutu! Mukunda nu itshi mudi gungulola? ¹⁹ Ngudijigienu lufalanga lumoshi lua gitadi.» Amudijigine lufalanga lumoshi. ²⁰ Yesu wawambelele egi: « Gifanegesa nu jina giegi gidi gia nanyi? » ²¹ Amuwambelele egi: « Gidi gia Sezare ». Hene, Yesu wawambelele egi: « Hanyienu gudi Sezare ima idi ya Sezare nu Gudi Nzambi ima idi ya Nzambi.» ²² Hago avile ngenyi, akhalele mudihula (mushimana). Hangima amubembele ha guya genji. ²³ Lusugu luene lununu, enya sadiseye ako anazuela egi gushigo nu guzuga gu gufua ajile gudi muene. Amuhudile egi: ²⁴ << Longi, Mose wazuelele egi: "gula muthu mumoshi wafua uvi nu gubuta mona ndo, phanjienji udi nayo guwata (guzula mu mahata) mukaji'enji mukunda nu gumubutshila ana." ²⁵ Guakhalele nu aphangi a mala sambadi. Wagudiangela wabembele mukaji'enji gudi phanjienji. ²⁶ Hangima phanjienji wagiyadi watshitshile luholo lumoshi; nji ya tathu, unu phanji a yala wa sambadi. ²⁷ Hangima diawo, mukhetu nji wafile. ²⁸ Henyaha tuwambele, ha guzuga gu gufua, mukhetu ou mba ukhala mukaji a nanyi mukatshi dia aphangi amala; ndaga agasue amuhagele mu mahata? » ²⁹ Uvi Yesu watayele nu wawambelele egi: «Mudi mukatshi dia gujimbila, mukunda mushigo mujiya nga yasonegewe, nga ngolo jia Nzambi. ³⁰ Ndaga ha guzugishiwa gu gufua, mba gushigo mukhala nu mahata nu mba gushigo mukhala nu gutumiwa gu mahata. Uvi, adi gifua anjelo mu dilu. ³¹ Uvi mukunda nu yago idi mutalela guzugishiwa gu gufua, khenji mutangele ndo yago Nzambi azuelele egi: ³² "Ngudi Nzambi wa Abalahama, Nzambi wa Izaka, nu Nzambi wa Yakoba?" Nzambi gashigo nzambi wa enya gufua, uvi Nzambi wa enya monyo.» ³³ Hago thundu yavile ngenyi, ashimanene (ayitugile) mukunda nu malongo enji. ³⁴ Hago afalase avile egi Yesu (wa huenesele tedie) wabatshile kano wa asadiseye, ene adibungishile. ³⁵ Mumoshi ya mukatshi diawo, nganga mukanda wa mikhuala, wamuhudile muhu umoshi mukunda nu gumulola: ³⁶ « Longi, mukhuala tshi udi wagubalega gukoma mukatshi dia mikhuala yagasue? » ³⁷ Yesu wamutayele egi: « "Tshigina (Zumba) Fumu Nzambi nu mutshima waye wagasue, nu monyo waye wagasue, nji nu matangi aye agasue. ³⁸ Wene udi mukhuala wakoma nu wagudiangela. ³⁹ Nu mukhuala wagiyadi udi wadifuana nu wagudiangela: "Tshigina (Zumba) phanjiaye gifua (luholo) wana guditshigina aye hakhaye." ⁴⁰ Mu mikhuala yeyi iyadi gudi muzoga mikhuala yagasue nu azueledi a ndaga jia gumatuama. ⁴¹ Ndaga afalase akhalele nji yagudibungisa, Yesu wa ahudile. wazuelele: « Itshi mudi mutangiza mukunda nu Kilisto? Udi muna nanyi?» ⁴² Amutayele egi: « Muna Davidi. » ⁴³ Yesu wawambelele: «Gikhuatshi Davidi, nu nyuma, udi gumutamega egi: ⁴⁴ "Fumu wawambelele Fumu wami egi": "Ditumbige ha khanda yami ya gitata, unu ngutshita ambalagaji aye idiatelo."?» ⁴⁵ Gula Davidi watamega Kilisto, egi "Fumu", gikhuatshi muene wajiya gukhala munenji? » ⁴⁶ Nga muthu gataganenego ha gumuwambela nga mbimbi, sendese lusugu luene, nga muthu ndo walolele (waphagele) nji gumuhula mihu.