¹ Kumbi diago Yesu nu alandudi enji asuenene hehi nu Yelusalema nu ahetele mu dimbo dia Betefaje hehi nu ngumba ya Olivie. ² Hangima, Yesu watumine alandudi muyadi nu gu awambela egi: «Ndienu mu dimbo didi gumatuama, nu mudi mumona mu hugo dimoshi gabalu gamoshi gagujitshiga nu gana ga gabalu gifundo gimoshi Jijituludienu nu ngabatelenu najio. ³ Gula muthu mumoshi wamiwambela gima gimoshi mukunda nu jiene, mumuwambele egi: "Fumu udi najio funu, nu muthu muene udi gumibemba mu hugo dimoshi diene ha guya najio."»». ⁴ Hene, yahetele mukunda nu yago yazuelele muzueledi a ndaga jidi muza gumatuama ha gutagana. Wazuela egi: ⁵ «Wambela muna mukhetu wa gu Siyona: " Tala, Fumu yaye udi muza gudi aye, Watagana nu holu dia gabalu nu holu dia gana ga gabalu gamoshi".» ⁶ Hene, alandudi ayile nu atshitshile gifua luholo Yesu watumine. ⁷ Abatele gabalu nu gana ga gabalu, Ajihagele milele (malopho) yawo nu Yesu waditubigile holu dia milele. ⁸ Athu avula a mukatshi dia thundu akhalele mutanda milele yawo mu njila nu ako akhalele mukoka (muhalumuna) thango jia mitshi nu akhalele gujitanda mu njila. ⁹ Thundu jiakhalele mudiangela Yesu nu jiago jiakhalele gumuhata jiakhalele mukolologa egi: «Ozana gudi Muna Davidi! Guhuima gudi yago udi muza mu jina dia Fumu! Ozana gudi yago udi gosa guabalega guleha! » ¹⁰ Hago Yesu ganginyine mu Yelusalema, Dimbo diamusamba diagasue diakhalele muyituga nu gudihula egi: «You nanyi?» ¹¹ Jithundu jiatayele egi: «You udi Yesu, muzueledi ya ndaga jia gumatuama wa gu Nazaleta mu Galileya.» ¹² Hangima, Yesu wanginyine mu gikombelelo. Muene wakayele athu agasue akhalele musumba nu mudiga mukatshi dia gikombelelo nu wabundudile mesa a enya falanga nu ifundo ya enya gudiga tkhulumbia (mayembe). ¹³ Wawambelele egi: «Idi yagusonegewa egi: " Inzo yami mba itamegewa egi inzo ya gukombelela" uvi enue muayibuisa gifundo gia enya gukuya.»» ¹⁴ Hene, athu afua meso nu ikata ajile gudi muene mukatshi dia gikombelelo nu wa asagele. ¹⁵ Uvi hago mafumu a jinganga Nzambi nu enya gusonega amuenene ima yeyi yagushimana Yesu atshitshile nu hago avile ana mukolologa mu gikombelelo nu guzuela egi: «Ozana gudi Muna Davidi» Avile jikhabu jiavula. ¹⁶ Amuwambelele egi: «Udi mutegelela athu yago adi muzuela? Yesu wawambelele egi: «Ai, uvi enue khenji mutangele genu ndo egi: "Mu kano wa ana nu wa ana anonda, udi muzugisa (muzola) gutumbuisa guamatshidia?» ¹⁷ Hangima, Yesu wabembele nu wazogele mu dimbo dia musamba mukunda nu guya gu Betani nu gubalegesa phipha guene. ¹⁸ Hene, mu gimenegena, hago muene avutugile mu dimbo dia musamba, wavile nzala. ¹⁹ Hamuenene mutshi wa fijie mukhulugo ya njila, wayile nu wasangelego nga bundu khuta mayiji. Wawambelele mutshi wa fijie egi: «Mba uyimigo nga bundu.» Nu hugo diene dinyi, mutshi wa fijie wayimigine. ²⁰ Hago alandudi amuenene ngenyi, ashimanene nu guzuela egi: « Gikhuatshi mutshi wa fijie wadiyimigina mu hugo dimoshi?» ²¹ Yesu watayele egi: « Mu giamatshidia, ngudi gumiwambela, gula mudi nu gutshigina nu gula mushigo muhaga giphapha, mba mutshitigo khuta yago yatshitshiwa gudi mutshi wa fijie, uvi mba muzuela gudi mulundu egi: "Vumbumuga nu dibishile mu nzadi," nu yene mba itshitshiwa. ²² Yagasue mba mutoga (mulomba) mu gukombelela nu gutshigina, mba mu iheta.»» ²³ Hago Yesu wakhalele mungina mu gikombelelo, mafumu a jinganga Nzambi nu akulu a gikanda ajile gudi muene hago muene akhalele mulonga nu azuelele egi: << Mu uhinyinyi udi mutshita ndaga jieji nu nanyi waguhanene uhinyinyi ou. ²⁴ Yesu watayele egi: «Ngudi nji gumihula muhu umoshi. Gula muangu wambele, ame nji ngudi gumiwambela uhinyinyi tshi ngudi mutshitshila ima yeyi. ²⁵ Gubatijiwa gua Yone (guakatugile gudi nanyi?) mu dilu nga gudi athu?» Adihudile ene nu ene nu guzuela egi: « Gula tuazuela egi "mu dilu", udi gutwambela egi: « Mukunda nu itshi muatunyine gumutshigina?» ²⁶ Uvi gula tuazuela egi "gudi athu" tudi muvua woma wa thundu mukunda agasue adi muzangula Yone gifua muzueledi wa ndaga jia gumatuama.» ²⁷ Hene, Atayele gudi Yesu nu guzuela egi: «Tushigo mujiya.» Muene nji wawambelele egi: " Ngushigo nji gumiwambela uhinyinyi tshi ngudi mutshitshila ndaga jieji. ²⁸ Uvi itshi mudi mutangiza? Muthu mumoshi wakhalele nu ana a mala muyadi: « wayile gudi yagudiangela» nu wazuelele egi: «Munami ya yala, nda utshite mudimo mu gilanga gia vino mangino. ²⁹ Mona wamutayele egi "Ngushigo mutshita" uvi hangima, wabalumuine matangi, nu wayile."» ³⁰ Nu muthu muene wayile gudi munenji ya yala wa giyadi (ngiadi) nu wazuelele gima gimoshi giene. Mona yala watayele nu wazuelele egi: "Ngudi muya tata" uvi gayilego. ³¹ Nanyi ya mukatshi dia ana amala muyadi watshitshile gutshina gua shenji?» Azuelele egi: "Ya gudiangela." Yesu wawambelele egi: « Mu giamatshidia, ngudi gumiwambela, enya gulambula (alambudi a) gitadi nu jithambi mba adiangela gutuama diene ha gungina mu ufumu wa Nzambi. ³² Ndaga, Yone wajile gudi enue mu njila ya tagana, uvi muamutshiginyine ndo, uvi enya gulambula gitadi nu jithambi amutshiginyine. Nu enue, hago muamuenene ngenyi, muabulumuinego mitshima yenu hangima mukunda nu gutshigina.» ³³ Venu gishima giko: " Guakhalele nu muthu mumoshi, fumu ya givulu. Wakunyine vino, watungile gikonde (luphango) mu khulugo yenji, wahagele (waphundjile) wina, watungile inzo yaleha ya gutalela nu wagihanene gudi enya gutala vino ha gufuga. Hangima, wayile gumbo diko. ³⁴ Hago kumbi dia gukatalu mabundu diataganene, watumine enya mudimo ako gudi muenya vino mukunda nu guzangula mabundu. ³⁵ Uvi enya gutala vino akhuatele enya mudimo, a akuphuile, ashiyile mumoshi nu abatshuile (kokele) muko muto. ³⁶ Fumun ya gilanga watumine nji enya mudimo ako avula ya gubalega agudiangela, uvi enya gutala vino a atshitshile luholo lumoshi luene. ³⁷ Hangima dia ngenyi, fumu ya gilanga watumine munenji diago nu guzuela egi: "Mba adi gumuhana lujitu gudi munami." ³⁸ Uvi hago enya gutala vino amuenene mona, azuele ene nu ene egi: «Tala phingua: izenu, tumushiyenu nu tuzangudiene umonyi." ³⁹ Hene amukhuatele, amubishidile honze ya gilanga gia vino, nu amushiyile. ⁴⁰ Henyaha, hago fumu ya gilanga mba gaza, itshi mba atshita gudi enya gutala gilanga gia vino?" » ⁴¹ Amuwambelele egi: "Mba ushiya jiphutu jiene mu luholo luabalega bubola nu hangima mba uhana gilanga gia vino gudi enya gutala gilanga gia vino ako, athu ago mba amuhana shinda dienji dia mabundu mu kumbi dia gukatula mabundu. ⁴² Yesu wawambelele egi: << khenji muatangele genu ndo mu mukanda egi: "Seso yago enya gutunga inzo abishidile diene diahagewe ha kunji. Yeyi yajile gudi Fumu nu idi yabalega gubonga ha meso enu"? ⁴³ Mukunda nu ngenyi ngudi gumiwambela, ufumu wa Nzambi mba umitambuiwa nu mba uhanewa gudi enya dimbo didi muhana mabundu enji. ⁴⁴ Muthu yagasue udi mubua holu dia seso yene mba ukhala yagumuangewa mu jimbambu. Uvi, yago yene mba ibuila, mba ukhala ya gutshiatshiumuna."» ⁴⁵ Hago mafumu a jinganga Nzambi nu afalase avile mbimbi jiene, ajiyile egi wakhalele muzuela mukunda nu ene. ⁴⁶ Hago atshiginyine gumukhuata, avile woma wa thundu mukunda athu akhalele gumumona gifua muzueledi wa ndaga ji agumatuama.