¹ Ngenyi, ufumu wa mudilu udi gifua fumu ya mavu mumoshi wazogele mu gimenegena gia mutshiatshia mukunda nu guzula athu gu mudimo wa gilanga. ² Hangima dia gukhala ya gudivuisa nu enya mudimo mukunda nu gishimbigo gia lusugu, muene watumine gu gilanga gienji. ³ Wazogele ha ngima dia makumbi atatu nu wamuenene luko (nji) enya mudimo ako akhalele ashigo nu gima gia gutshita ha gifundo gia zando. ⁴ Muene wawambelele egi: «Enue nji, dienu gu gilanga, nu yagasue yatagana mba ngudi gumihua.» Hene ayile mutshita mudimo. ⁵ Wazogele nji ha mu kumbi dia samano nu luko ha kumbi dia divua, nu watshitshile luholo lumoshi luene. ⁶ Hugo diko dimoshi mu kumbi dia kumi nu imoshi, wazogele nu wasangele athu ako adi ashigo nu gima gia gutshita, wawmbelele egi: «Mukunda nu itshi muaditumbiga haha yakonda gima giagutshita lusugu luagasue (luamundu)?» ⁷ Ene amutayele egi: «Idi mukunda muthu gashigo ya gutuhana mudimo.» Wawambelele egi: «Enue nji, dienu mu gilanga.» ⁸ Hago ingueze yabuile, fumu ya gilanga wawambelele gaphita genji: «Tamega enya mudimo nu ahane gishimbigo sendesa gudi yagisugishilo unu gudi yagudiangela (yathomo).» ⁹ Hago enya mudimo ago azanguwe gu mudimo mu kumbi dia kumi nu dimoshi ahetele, mumoshi nu mumoshi a mukatshi diawo azanguile gishimbigo giawo. ¹⁰ Hago enya mudimo ago azanguwe gu mudimo agudiangela ahetele, akhalele mutangiza egi adi muzangula gishimbigo giagubalega uvi ahanewe mumoshi nu mumoshi a mukatshi diawo gishimbigo gimoshi giene. ¹¹ Hangima dia guzangula gishimbigo giawo, adi nyemenene mukunda nu fumu ya gilanga. ¹² Azuelele egi: «Enya mudimo agisugishilo atshitshi mudimo khuta kumbi dimoshi uvi watuhana gishimbigo guvula luholo lumoshi, esue tua mona malamba sendese gimenegena ha muanya.» ¹³ Uvi fumu ya mudimo watayele gudi mumoshi ya mukatshi diawo egi: «Futa, gushigo gugutshita nga gubola gumoshi ndo. Muakhalelego ya gudivuisa nu ame mukunda nu gishimbigi gimoshi?» ¹⁴ Zangudienu yago idi mukunda nu enue nu gindienu; ngatomba ha guhana gudi enya mudimo azanguiwe gu gisugishilo gishimbigo gimoshi giene nu enue. ¹⁵ Ngushigo nu uhinyinyi wa gutshita yago ngudi mutshigina mukunda nu umonyi wami? Nga enue mudi nu giphi mukunda ngudi muenya gudizalumuna? ¹⁶ Hene muthu ya gisugishilo mba ukhala ya gudiangela nu muthu ya gudiangela mba ukhala ya gisugishilo. mikanda yabalega gubonga ikulu yanabemba: «Avula adi yagutamegewa, uvi azonda adi agutombewa.» ¹⁷ Yesu wakhalele mukanduga gu Yelusalema, wa zanguile alandudi enji kumi nu muyadi ha guya nenji. Mu njila, wawambelele: ¹⁸ «Tadienu, tudi mukanduga gu Yelusalema nu Muna Muthu mba ukhala ya guhanewa gudi mafumu a jinganga Nzambi nu gudi enya gusonega. Mba adi gumubatshuila milanga ha gufua ¹⁹ nu mba adi gumuhana gudi athu ashigo enya gutshigina mukunda nu gumulela tola, gumukhupula nu gumuhaga ha mutshi wagudikikisa. Uvi mu lusugu lua thatu, mba uzuga gu gufua.» ²⁰ Hangima gina ana a Zebede wajile gudi Yesu nu anenji. Muene washiugile gutuama dia Yesu nu wamutogele gima gimoshi. ²¹ Yesu wamutayele: «Itshi udi mutshigina?» Muene wamuwambelele egi: «Hana mukhuala hagula egi anami muyadi akhale aguditumbiga, mumoshi gu koko waye wa madia muko gu koko waye wa gihidi mu ufumu waye.» ²² Uvi Yesu wamutayele: «Ushigo mujiya yago udi mutoga. Enue mudi yatagana ha gunua tshopo diago ngudi nayo gunua?» Ene amuwambelele: «Tudi yatagana.» ²³ Muene wawambelele egi: «Diago, tshopo diami, mba mudi gu inua. Uvi mukunda nu guditumbiga gu koko wami wa madia nu wa mahidi, ishigo ame ngudi nayo guhana mukhuala uvi idi mukunda nu ago yene yalondewe gudi Shiami.» ²⁴ Hago alandudi kumi nu muyadi avile ndaga yene, avile gubola mukunda nu aphanji muyadi a mala. ²⁵ Uvi Yesu wa atamegene gudi muene nu wazuelele: << Udi mujiya egi mafumu a athu ashigo nu gutshigina anuhuminyina holu diawo, nu athu adi nu funu yavula anutshita uhinyinyi holu diawo. ²⁶ Uvi ishigo nayo gukhala ngenyi mukatshi dienu. Uvi muguzuela guabonga, Yago udi mutshigina gukhala holu dia ako mukatshi dienu udi nayo gukhala muenya mudimo yenu. ²⁷ Nu yagasue watshigina gukhala yagudiangela mukatshi dienu udi nayo gukhala muenya mudimo yenu, ²⁸ Ngenyi Muna Muthu gajilego mukunda nu gutshitshiwa mudimo, uvi mukunda nu gutshita mudimo nu guhana monyo wenji gifua mulambu wa athu avula. ²⁹ Guazogele gu Yeliko, ithundu yakoma nu yamuhatele. ³⁰ Nu ifua meso muyadi akhalele yaguditumbiga ha khanda ya njila. Hago avile egi Yesu udi mubalega, akologele nu guzuela egi: «Fumu, Muna Davidi, tuvile jikhenda.» ³¹ Thundu yakhalele gu abalele nu guzuela egi khadienu tedie uvi akologele nji muavula: «Fumu, Muna Davidi, tuvile jikhenda.» ³² Hene Yesu wamagenene, wa atamegene nu wa ahudile: «Itshi mudi mutshigina egi ngutshite mukunda nu enue?» ³³ Amuwambelele: «Fumu, egi meso etu amone.» ³⁴ Hene, Yesu, yaguzala nu jikhenda, wakhatele meso awo. Hene hanyanyi, ahetele gumona nu amuhatele (amutombele).