¹ Hago Yesu gamanesele jimbimbi, wakatuile gu Galileya, nu wayile mu khanda ya Yudeya ha sambua dia muta wa Yodani. ² Thundu yavula yamuhatele nu wasagele enya misongo awo. ³ Afalase ajile gudi muene, amulolele nu guzuela egi: «Idi yagutshiginyishiwa gudi yala ha gushiya mahata nu mukaji'enji mukunda nu ndaga tshi ba?» ⁴ Yesu watayele nu guzuela egi: «Enue khenji muatangele genu ndo egi yago wafugile unu gisendeselo, watshitshile yala nu mukhetu? ⁵ Nu wazuelele nji egi: " Idi mukunda nu ngenyi, yala mba ubemba shenji nu ginenji nu mba uya musanga mukaji'enji, nu ene muyadi mba abua thumba mumoshi?" ⁶ Hene, gashigo luko muyadi, uvi thumba imoshi. Ngenyi, yago Nzambi wabungisa, muthu gayikaphumuna go.» ⁷ Afalase amuwambelele: «Mukunda nu itshi Mose adi gutuhana mukhuala ha guhana mukanda wa gushiya mahata nu gumubemba?» ⁸ Muene wawambelele egi: «Idi mukunda nu gukola gua mitshima, Mose amihanene njila ya gushiya mahata a akajienu uvi gu gisendeselo, yakhalelego ngenyi.» ⁹ Ngudi gumiwambela: «Muthu yagasue washiya mahata nu mukaji'enji khuta (katula) mukunda nu uthambi nu wahaga (wawata) mukhetu muko, watshita uthambi. Nu muthu yago wazula mu mahata mukhetu watunyiwe mu mahata udi mutshita uthambi.» ¹⁰ Alandudi awambelele Yesu egi: «Gula idi luholo lunu lua yala gudi mukhetu, ishigo yatagana (yabonga) ha guwata.» ¹¹ Uvi Yesu wawambelele: «Ishigo egi athu agasue ajiya gutshigina malongo awa, uvi khuta athu ago idi yahanewa njila ha guyitshigina. ¹² Ndaga gudi nu phingua ahangewe sendese mu vumo dia ginenji. Nu gudi phingua jiko jidi ngenyi mukunda nu athu, nu gudi phingua jiko jiadidigile ene hakhawo mukunda nu ndaga ya ufumu wa mudilu. Egi yago udi yatagana ha guzangula malongo wawa, a azangule.» ¹³ Hene ana ako azonda amubatewe hagula egi Yesu a ahage mago nu gukombelela mukunda nu ene, uvi alandudi atunyine. ¹⁴ Uvi Yesu wazuelele egi: «Bembenu ana anzonda nu muatunyisago ha guza gudi ame, ndaga ufumu wa mudilu udi wa athu adi gifua ene.» ¹⁵ Yesu wahagele mago, nu hangima, wayile genji. ¹⁶ Muthu mumoshi wajile gudi Yesu nu wazuelele egi: «Fumu, gimatshi giabonga ngajiya gutshita mukunda nu guheta monyo wa mayilago? ¹⁷ Yesu wamuwambelele egi: «Mukunda nu itshi udi gunguhula gima gidi giabonga? Gimoshi gidi giabonga, uvi gula udi mutshigina gungina mu monyo, hata mikhuala.» ¹⁸ Muthu muene wamuhudile: «Mikhuala tshi?» Yesu wamuwambelele egi: «Gushiya ndo, gutshita ndo uthambi, gu kuya ndo, gutshita ndo uthemua wabola, ¹⁹ Nemesa shaye nu ginaye, nu tshigina athu ako gifua wana guditshigina aye hakhaye.» ²⁰ Muvuala wamuwambelele egi: «Ngatshiti ima yagasue inyi. Itshi iko ngajiya gukhala nayo funu?» ²¹ Yesu wamuwambelele egi: «Gula watshigina gukhala yatagana, ngenyi diga ima yaye, nu uyihane gudi jiphutu, nu mba ukhala nu umonyi mu dilu. Hangima, giza nu unguhate.» ²² Uvi hago muvuala wa yala avuile ndaga yazuelele Yesu, wayile nu gikenene (keya-keya) ndaga wakhalele nu ima yavula. ²³ Yesu wawambelele alandudi enji egi: «Mu giamatshidia ngudi gumiwambela, idi lamba mukunda nu mumonyi ha gungina mu ufumu wa mudilu. ²⁴ NJi, ngudi gumiwambela, idi yaleba diago mukunda nu gabalu ha gungina mu hululu (wina) dia ndongo, uvi yakola mukunda nu mumonyi ha gungina mu ufumu wa mudilu.» ²⁵ Hago alandudi avuile ngenyi, akhalele yitugile muavula nu azuelele egi: «Nanyi giwa wajiya gukhala yaguhuluga?» ²⁶ Yesu wa atalele nu wazuelele egi: << Idi yakola gudi athu uvi gudi Nzambi ima yagasue idi yaleba.» ²⁷ Hene, Phetelo watayele nu wamulezele egi: «Tala, esue tuabembele yagasue mukunda nu guguhata, itshi mba ikhala luendu luetu? ²⁸ Yesu wa awambelele egi: «Giamatshidia ngudi gumiwambela, enue muanguhatele, mu lukhama lua mvula ludi muza, hago Muna Muthu mba gakhala yaguditumbiga ha gife gienji gia ufumu, enue nji mba mukhala yaguditumbiga holu dia ife ya ufumu kumi nu iyadi, musambesa (muzunza) iphuta kumi nu iyadi ya Isalele.» ²⁹ Muthu yagasue wabembele jinzo jienji, aphanji'enji amala, aphanji'enji a akhetu, ginenji, anenji nga gilanga mukunda nu jina diami, mba uheta ha lukhama lua mahugo nu mba uheta monyo wamayilago. ³⁰ Uvi avula a ago adi agudiangela mamino mba akhala athu agisugishilo, nu avula adi agisugishilo mba akhala athu agudiangela.