¹ Mu kumbi diene dinyi, alandudi ajile gudi Yesu nu azuelele: «Nanyi udi yagubalega gukoma mu ufumu wa mudilu?» ² Yesu watamegene hehi nu muene mona mumoshi ya galenge (wazonda) nu wamuhagele mukatshi diawo ³ nu wazuelel: «Giamatshidia ngudi gumiwambela, gula mushigo mubalumuga, nu mushigo mubua gifua ana azonda, mba munginyigo mungina nga luholo tshi mu ufumu wa mudilu. ⁴ Mukunda nu ngenyi, wagasue wadibulumuisa gifua mona uo wazonda, muene udi wabalega gukoma mu ufumu wa mudilu. ⁵ Nu wuthu yagasue udi muzangula mumoshi ya ana wawa azonda mu jina diami, udi gunguzangula ame. ⁶ Uvi wagasue udi mutuma mumoshi ya ana wawa azonda adi angutshigina ha gutshita gubola, idi yabalega gubonga gumujitshiga nu iseso yakoma mu shingo nu gumumba mu kianga. ⁷ Mukumbu gudi enya hamavu mukunda nu makumbi amalamba! Ndaga idi yatagana hagula egi ima yeyi ihete, uvi mukumbu gudi muthu yago ima yeyi mba iza mukunda nu muene! ⁸ Gula koko waye nga kulu waye udi mukunda nu aye gikhakhuishilo, ahalumune nu ubishile gualeha nu aye. Idi yabalega gubonga mukunda nu aye ha gungina mu ufumu wa mudilu nu kogo wagitshinyi nga kulu wagitshinyi, uvi ukhale yagumbiwa ha jigo dia tshuya nu mago mayadi nga malu mayadi. ⁹ Gula iso diaye didi gikhakhuishilo, dikahule nu udibishile gualeha nu aye. Idi yabalega gubonga mukunda nu aye ha gingina mu ufumu wa mudilu nu iso imoshi uvi hagukhala yagubishidiwa mu thsuya tua mayilago nu meso aye ayadi. ¹⁰ Temienu, ha gula enue musegululago mungoshi wa ana wawa azonda natala ya ngudi mumiwambele egi angelo awo mudilu anatala masumu agasue phala ya tala udi mu dilu. ¹¹ Ndaga ya Muna Muthu wajile ha guhuluisa adi agutota. ¹² Itshi mudi mutangiza? Gula muthu udi nu imeme (phanga) lukhama nu gula gimoshi giatota, muene gashigo mubemba iko makumi divua nu divua holu dia mulundu ha guya mukamba gimoshi ginyi giatotshi ba? ¹³ Nu gula wagimona, giamatshidia ngudi gumiwambela, udi musuanguluga muavula mukunda nu giene yagubalega imeme iko makumi divua nu divua yago ishigo ya gutota. ¹⁴ Luholo lumoshi luene, ishigo gutshigina gua Shenu udi mudilu egi mumoshi ya ana wawa azonda atote. ¹⁵ Gula phanj'aye wagutshita gubola, nda, umuwambele gujimbila guenji enue muyadi, gula waguvila, wamubingi (wamunungi). ¹⁶ Uvi gula gashigo muguvuila, zangula (zula) muthu mumoshi nga muyadi a aphanji'aye a mala ha gula egi mu kano wa athu muyadi nga mathemua mutatu, giamatshidia gikhale. ¹⁷ Nu gula watuna guavuila, ubate ndaga yene gudi ekelejiya. Gula watuna guvila ekelejiya, Akhale gifua muphanyi nga gifua mulambudi wa gitadi (malambu). ¹⁸ Giamatshidia ngudi mumiwambela, yagasue imbamujitshiga holu dia mavu mba ikhala yagujitshigiwa mudilu n yagasue imbamujitulula holu dia mavu mba ikhala yagujituludiwa mu dilu. ¹⁹ Ngudi gumiwambela luko egi, gula muyadi a mukatshi dienu adivuisa holu dia mavu mukunda nu gima gimoshi giago adi mutoga, mba idi mukhala ya guahuiwa gudi Shami udi mu dilu. ²⁰ Ndaga ha gifundo gidi athu muyadi nga mutatu adibungisa mu jina diami, ngudi mukatshi diawo.» ²¹ Hene, Phetelo wajile nu wazuelele gudi Yesu egi: «Fumu, mahugo guvula gutshi ngajiya gutotesela phanji'ami hago gadi mutshita gubola gudi ame?» ²² Yesu wamuwambelele egi: Nga zuelelego gudi enue egi mahugo sambadi, uvi unu makumi sambadi nu sambadi mahugo sambadi. ²³ Ngenyi ufumu wa mu dilu udi wadifuana nu fumu mungoshi watshigine gutanga ima yenji hamoshi nu enya mudimo enji. ²⁴ Hasendesele muene gutanga, amubatele muenya mudimo mungoshi wakhalele nu fuga ya midi kumi ya makuta (falanga). ²⁵ Uvi Ndaga ya muthu ou gakhalelego nu gima giagufuta, fumienji wahanele mukhuala egi amudige muene nu mukaji'enji, anenji nu ima yenji yagasue mukunda nu gushimbiga (gufuta) mukudi. ²⁶ Ngenyi muenya mudimo unu wafugamene hemabongo enji, wamububile egi: "fumu, ukhale nu guhumigina gudi ame unu mba ngugushimbiga mukudi waye wagasue. " ²⁷ Hene fumu ya muenya mudimo uo, wamuvuidile jikhenda, wamubembele nu wamukatuile mukudi wenji. ²⁸ Uvi muenya mudimo ou hazogele nu wasangele muthu mumoshi ya mukatshi dia enya mudimo wakhalele nu mukudi (fuga) wenji wa lukhama lua falanga. Wamukhuatele, wamukamene ha munginyo nu wazuelele: "Shimbiga mukudi wami." ²⁹ Uvi futa dienji ya mudimo wabuile hashi nu gumububila egi: Khalu nuguhumigina gudi ame nu mba ngudi gugushimbiga mukudi." ³⁰ Uvi muenya mudimo yagudiangela watunyine; uvi wayile gumumba mu bologo unu mba gashimbiga mukudi wenji. ³¹ Hago mafuta enji a mudimo amuenene ngenyi, avuile jikhenda jiavula; ayile gudi fumu yawo ya mudimo nu amutele maga a yagasue yatshitshile muenya mudimo. ³² Hene fumu ya mudimo watamegene muenya mudimo nu wamuwambelele egi: "Aye, muenya mudimo wabola, ame ngagutotesela mukudi waye wagasue mukunda wangububila. ³³ Wajiyilego gukhala nu jikhenda mukunda nu futa diaye ya mudimo jikhenda luholo luago ame ngaguvuila jikhenda? ³⁴ Fumu ya mudimo wavuile jikhabu jiavula, wamuhagele ha mago a enya shidi unu mba gasshimiga mukudi wenji wagasue. ³⁵ Idi nji ngenyi Shami ya gosa mba gamitshitshila gula yagasue ya mukatshi dienu mba gatuna gutotesela phanji'enji ya yala nu mutshima wenji wagasue.»