¹ Masugu asamano abalegele, Yesu wazudile Phetelo, Yakobo, nu Yona phanji'enji, nu wayile nawo mu khanda holu dia ngumba (mulundu) yaleha. ² Yesu wabumugile gu meso awo. Phala yenji yahenyene gifua tangua, nu milele yenji yaphelegetele gifua muanya. ³ Nu tala, Mose nu Eliya amuenegene, akhalele muta maga nu muene. ⁴ Phetelo wawambelele Yesu egi: «Fumu, idi yabonga mukunda nu esue gukhala haha. Gula watshigina, ngudi mutunga mikhanda (isasa) itatau, umoshi mukunda nu aye, umoshi mukunda nu Mose, nu umoshi mukunda nu Eliya.» ⁵ Hakhalele muene nu guzuela, tala, tuta dimoshi diakhalele muhenya dia atshigile, dijui (mbimbi) imoshi yazogele mukatshi dia tuta nu guzuela egi: «Tala Munami ngatshigina muavula yago ngana suangulugila. Muvilenu.» ⁶ Hago alandudi avile ngenyi, abuile phala jiagufulumiga ha mavu nu akhalele nu woma wavula. ⁷ Hene Yesu wajile, wa akhuatele nu wazuelele: «Zugienu, mukhadigo nu woma.» ⁸ Atalele gosa uvi amuenenego nga muthu khuta Yesu. ⁹ Hago akahalele mutuluga (sambuluga) ngumba (mulundu), Yesu wawambelele egi: «Mu wambelago nga muthu ima muamonyi unu Muna Muthu mba akhala yaguzuga gu gufua.» ¹⁰ Alandudi ene amuhudile: «Mukunda nu itshi enya gusonega mikanda anazuela egi idi yatagana Eliya aze thomo?» ¹¹ Yesu wa atayele: «Mu guzuela guabonga, Eliya mba uza nu mba uhaga ima yagasue mu fundo dienji. ¹² Uvi ngudi mumiwambela: Eliya wajile gale, uvi gamujiyilego. Hene, amutshitshile yagasue akhalele mutshigina. Luholo lumoshi luene, Muna Muthu mba umona malamba ha mago awo.» ¹³ Hene akotesele egi muene wakhalele muzuela mukunda nu Yona Mubatiji. ¹⁴ Hago abalumuine gudi thundu, muthu mumoshi wajile gudi Yesu, wafugamene ha mabongo gutuama dienji ¹⁵ nu wazuelele egi: << Fumu, vuila munami ya yala jikhenda, muene wana ndalaé gikonyi nu wanamona malamba avula. Maugo ako, wana bua mu tshuya, nu mu meya. ¹⁶ Ngaji n'enji gudi alandudi aye uvi ene gataganelego ha gumusaga. ¹⁷ Yesu wamutagele egi: «Gindongo giakola matangi (gishigo nu gutshigina) nu gia unzangi, mba ngukhala n'enu mahugo guvula gutshi? mahugo gusthi ngudi nayo ya guzangula ginemo gienu? Jienu n'enji gudi ame haha.» ¹⁸ Yesu wabalele givule giabola nu giazogele gudi muene. Mona yala wasagewe mu kumbi diene dinyi diago. ¹⁹ Angima alandudi ajile hehi nu Yesu mu mafumbe nu azuelele: «Mukunda nu itshi esue tuataganenego gugikaya?» ²⁰ Yesu watayele egi: «Idi mukunda nu gutshigina guene guazonda. Ndaga ngudi gumiwambela mu giamatshidia, gula mudi nu gutshigina guazonda gifua lumbale lua mutalade, muatagana ha guwambela mulundu ou wabalega guleha egi "katuga haha nu nda gunu" wene mba ukatuga nu gushigo nu ndaga mbayimikolela ha gutshita. ²¹ Uvi giuvule gia muho ou gianakaluga khuta ha gukombelela nu gujila madia. ²² Akhalele ene gu Galileya, Yesu wawambelele alandudi enji: «Muna Muthu mba hanewa ha mago a athu; ²³ nu mba amushiya, nu mumasugu atatu mba uzuga gu gufua.» Alandudi avile gikenene giavula. ²⁴ Hago adi aheta gu Kaphelanawuma, athu akhalele mukungula milambu (gitadi) ya demi-shekele mukunda nu gikombelelo ajile gudi Phetelo nu azuelele egi: «Longi dienu gashigo muhana mulambu (gitadi) ya demi-shekele?» ²⁵ Wamutayele egi: «Ayi udi muhana.» Hago Phetelo wanginyine mun inzo, Yesu wazanguile muthu ya gudiangela mbimbi nu wamuwambelele egi: «Itshi udi mutangiza Simona, mafumu a ha mavu, anazangula milambu nga gitadi? Ya athu awo nga a anjiejia?» ²⁶ Hago Phetelo watayele egi: «anjienjia» Yesu wamuwambelele egi: «Ngenyi, athu awo adi yagukatuiya ha gulambula. ²⁷ Uvi mukunda nu gutuna gutshita gubola gudi enya gulambula gitadi, nda gu meya ajima (nzadi), umbe wago nu akhuate ishui ya gudiangela; hago wambo tuwula kano wenji, mba umona shekel imoshi. Uyizangule nu uyilambule gudi enya gulambula gitadi mukunda nu aye nu ame.»