¹ Afalaze nu Asadiseye ajile gumulola nu gumuhula mukunda nu gu atshitshila ima ya gushimana idi muza gosa mu dilu. ² Uvi muene wawambelele egi: «Hago gingueze gianatagana, enue mudi muzuela egi: «kumbi didi mukhala diabonga, ndaga dilu didi diabenga.» ³ Nu mu gimenegena gia mutshiatshia mudi muzuela egi: «Mangino gudi mukhala nu mvula, ndaga dilu didi diabenga (diabenguluga) nu dila buita. Mudi mujiya gikuatshi gulondolola (gukotolesa) gifuanesa gia dilu, uvi muajiyilego gukotelesa ijiyilo gia kumbi. ⁴ Gindongo gimoshi giabonga nu bola nu gia uthambi gidi mukamba gijiyishilo, uvi gushigo (gushindo) nga gijiyishilo mba gimuhanewa, khuta jijiyishilo gia Yonasa.« Nji Yesu wakatugile nu wayile genji. ⁵ Hago alandudi ahetele mu sambua diko, abuitshile mitshima ha guzangula mapha. ⁶ Yesu wawambelele egi: «Ditadienu muabonga gudi gihemba gia mapha gia afalase nu Asadiseye.» ⁷ Alandudi atangijile ene hakhawo nu azuelele egi: «Idi mukunda tuazudile ndo mapha.» ⁸ Yesu wajiyile ndaga yene, wazuelele: «Enue, enya gutshigina guazonda, mukunda nu itshi mudi mutangiza mukatshi dienu egi idi mukunda nu tuazudilego mapha! ⁹ Enue khenji mukotelesa ndo nu guwunguluga mapha atano mukunda nu guvula gua athu inunu itano, nu ihombolo gutshi muanonene? ¹⁰ Nu mushigo muwunguluga mapha sambadi a mapha akhapewe athu inunu iwana nu guvula gua ihombolo imuanonene? ¹¹ Mukunda nu itshi muakotelesele go egi ngamiwambelele go mukunda nu mapha? Ditadienu nu tunienu gihemba gia mapha gia Afalase nu gia Asadiseye. ¹² Hene ajiyile egi wa alombelego ha gutuna gihemba gia mapha gianambiwa mu mapha uvi ha gutuna malongo a Afalase nu Asadiseye. ¹³ Hago Yesu wajile mu khanda ya Sezale ya Filipe, wa lombele gudi alandudi: «Athu adi muzuela mukunda nu muna muthu egi udi nanyi? ¹⁴ Amutayele egi: «Ako adi muzuela egi udi Yone - Mubatishi, ako egi udi Eliya, nu ako egi udi Yelemi, nu nga mumoshi ya azueledi a ndaga jia gumatuama.» ¹⁵ Wawambelele: «Uvi enue, mudimuzuela egi ngudi nanyi?» ¹⁶ Simona - Phetelo wa tayele egi: «Udi Kilisto, Muna Nzambi udi nu monyo.» ¹⁷ Yesu watayele: << Guzela muila gudi nu aye, Simona muna Yonase, ndaga ishigo muila nu mahatshi aguwambela ndaga yeyi, uvi Shami udi mu madilu. ¹⁸ Ngudi gugu wambela nji egi udi Iseso, nu holu dia seso yene mba ngutunga Ekelejiya yami. Mifulo ya galunga (malumba) mba iyibalegago jingolo. ¹⁹ Mba guguhua saphi jia Ufumu wa madilu. Yagasue yago mba ujitshiga holu dia mavu mba ikhala nji yagujitshigiwa mu dilu, nu yagasue mba ujitulula holu dia mavu mba ikhala nji yagujitulula mu dilu. ²⁰ Hene Yesu wawambelele alandudi enji egi muwambela go nga muthu egi muene udi Kilisto. ²¹ Hugo diene dinyi, Yesu wasendesele guwambela alandudi enji egi udi nayo guya gu Yelusalema, mumona malamba avula ha mago a akulu; ngambi jia Nzambi nu enya gusonega, egi udi nayo gushiyiwa nu mba uzugishiwa gu gufua mu masugu atatu. ²² Hene Phetelo wamuzudile mu khanda nu wamutunyishile egi: «Ndaga yeyi ikhale gualeha nu aye, Fumu, ndaga yeyi igutshitshiwa ndo.» ²³ Uvi Yesu wabalumugine nu wawambelele Phetelo: «Hangima diaye, Satana! Udi iseso ya gikhakhuishilo mukunda nu ame, ndaga ushindo nu gikenene mu ima ya Nzambi, uvi mu ima ya athu.» ²⁴ Hene Yesu awambelele alandudi enji: << Gula muthu watshigina gungulandula, udi nayo gudituna muene hakhenji, guzangula mutshi wenji wa gudikikisa nu gungulandula. ²⁵ Ndaga nga muthu tshi watshigina guhuluisa monyo wenji mba udi gu utotesa, nu muthu yagasue watotesa monyo wenji mukunda nu ame mba uwuheta. ²⁶ Ndaga itshi mba ikhala nu funu gudi muthu gula waheta mavu agasue uvi watotesa monyo wenji? Itshi yago muthu wajiya guhana ha gusumba monyo wenji? ²⁷ Ndaga Muna Muthu mba uza mu lukuma lua Shenji nu anjelo enji. Nji mba ushimbidiga muthu yagasue muluholo lua midimo yenji. ²⁸ Ngudi gumiwambela mu giamatshidia, gudi nu ako a mukatshi dienu, mba ashindo mulola gufua, gula amuenene ndo Muna Muthu muza mu ufumu wenji.