¹ Hene afalase nu enya gusonega ajile gu Yelusalema ha gumona yesu, nu azuelele egi: ² Mukunda natshi alandudi aye adi mukulula mikhuala ya mambuta? Ndaga ashigo muwova mago, hago adi mudia. ³ Muene wateyele egi: Nu enue, mukunda natshi mudi mukulula mikhuala ya Nzambi mukunda nu gikulu gienu? ⁴ Ndaga Nzambi wazuelele egi: Nemesa shaye nu ginaye; nu: Yago udi mushinza shenji nga ginenji mba ukhala yagushiyiwa. ⁵ Uvi enue, mudi muzuela egi: Yago udi muwambela shenji nga ginenji egi: Gima ngakhala nayo guguhana gidi mulambu gudi Nzambi, ⁶ ishigo ha gunemesa shaye nga ginaye. Mudi mubuisa ngenyi mbimbi ya Nzambi mukunda nu gikulu gienu. ⁷ Mudi enya mambo, Ezayi wazuelele muabonga ndaga jia gumatuama mukunda nu enue, hago wazuelele egi: ⁸ Thundu yeyi idi gungunemesa ha kano, Uvi mutshima wenji udi gualeha nu ame. ⁹ Adi gungunemesa yagituhu, hadi mulon, gesa ndaga jidi mikhuala ya athu. ¹⁰ Watamegene thundu hehi nu muene, nu wayiwambelele egi: Venu, nu kotolesenu. ¹¹ Ishigo yago idi mungina mu kano idi mubolesa muthu; uvi yago idi muzoga mu kano, yene idi mubolesa muthu. ¹² Hene alandudi asuenene, nu amuwambelele egi: Wajiyi egi afalase akhala ya guhagewa mu lamba gudi mbimbi jiago avi? ¹³ Watayele egi: Mutshi wagasue shami ya gosa gakunyinego mba ukhala ya guvujiwa. ¹⁴ Abembienu: adi ifofo (ifua meso) adi mutuameza ifua meso; gula gifua meso udi mutuameza gifua meso giko, mba abua agasue muyadi mukatshi dia wina. ¹⁵ Phetelo, wazanguile mbimbi, wamuwambelele egi: Tukotoluese mbimbi yeyi. ¹⁶ Nu Yesu wazuelele egi: Nu enue, mudi nji ashigo nu gutema? ¹⁷ Mushigo mukotelesa egi ima yagasue idi mungina mu kano idi muya mu kundu, hangima idi mubishidiwa mu wina? ¹⁸ Uvi yago idi muzoga mu kano idi muza gu mutshima, nu yene idi mubolesa muthu. ¹⁹ Ndaga idi gu gumutshima gudi muza matangi abola, umbundudi, uthambi, ndaga jiabola, unzangi, uthemua wa mambo, gusebulula. ²⁰ Tala ima idi mubolesa muthu; uvi gudia yakonda guwova mago, ishigo mubolesa muthu ndo. ²¹ Yesu, wayile khanda iko, wayile gu khanda ya Tila nu Sidona. ²² Nu tala, mukhetu mumoshi ya gu Kana, wakugile gu khanda yene, wamuwambelele mangololo egi: Nguvile jikhenda, Fumu, Muna Davidi! Munami ya mukhetu udi yagomenesewa malamba gudi givule giabola. ²³ Muene gamutayelego nga mbimbi imoshi, nu alandudi enji asuenene, nu amuwambelele egi: Mukaye, ndaga udi muhaga mukolologa hangima dietu. ²⁴ Muene watayele: Ngatumiwe khuta gudi imeme ya inzo ya Isalele yatota. ²⁵ Uvi muene wajile mufugama ha tuama dienji, nu guzuela egi: Fumu, nguhuluise! ²⁶ Muene watayele egi: Ishigo yatagana ha guzangula mapha a ana, nu ha guabishila gudi tuana tua jimbua. ²⁷ Muene wazuelele egi ayi, Fumu, uvi ana a jimbua anadia itshinyi yanabua gu mesa a fumu yenji. ²⁸ Hene Yesu wamuwambelele egi: Mukhetu, gutshigina guaye gudi guakola, ikhale yagutshitshiwa mu luholo luago udi mutshigina. Nu, mu kumbi diene dinyi, munenji ya mukhetu wakhalele yagusagewa. ²⁹ Yesu wakagile khanda yene, nu wajile hehi nu muta wa gu Galile. Hakandugile muene gu mulundu, waditumbigile. ³⁰ Hene thundu yasuenene hehi nu muene, yakhalele nu ikata, ifua meso, tutabu, enya maluiyi, nu akhashi avula. Ahagele ha malu enji, nu muene wasagele; ³¹ thundu yamuenene ha gumona egi tutabu tuazuelele, egi enya maluiyi asagewe, egi ikata yawendele, egi ifua meso yamuenene; nu thundu yatumbuishile Nzambi ya Isalele. ³² Yesu, watamegene alandudi enji, wazuelele egi: Ngudi nu gikenene mukunda nu thundu yeyi; ndaga tala tudi nawo masugu atatu, nu ashigo nga gima gia gudia. ngajiyilego guavutula nu nzala, hagula egi akhadigo guleba gua mila mu njila. ³³ Alandudi amuwambelele egi: Gikhuatshi tuajiya guheta mapha avula a gudisa thundu yeyi yakoma mu gibalala? ³⁴ Yesu wawambelele egi: Mapha gutshi mudi nawo? Sambadi, atayele ene, nu gandambo ga jishui. ³⁵ Hene wawambelele thundu ha guditumbiga mu mavu, ³⁶ wazanguile mapha sambadi nu jishui, nu, hangima dia gutumbuisa Nzambi, wabatshuile nu wahanene gudi alandudi enji, ene a aaphele gudi thundu. ³⁷ Agasue adile nu agukutshile, nu hangima abatele misanda yazala nu itshinyi yaselele. ³⁸ Athu ago adile akhalele ha mutango wa midi nguana, katula akhetu nu ana. ³⁹ Hangima, wavutuile thundu, wanginyine mu wato, nu wayile gu khanda ya Magadana.