¹ Mu kumbi dinyi, Elode tetaleka, havile athu muzuelela Yesu, wawambelele enya mudimo wenji egi: ² Idi Yona Mubatiji! Wazuga gu gufua, nu mukunda nu ngenyi hene adi mutshita ndaga jia gushimana. ³ Ndaga Elode, muene wakhatele Yone, wamujitshigile ngonji nu wamumbile mu bologo, mukunda nu Elodiase, mukaji'a Filipo, phanjienji, ⁴ ndaga Yone wamuwambelele egi: Ishigo yatagana ha guzangula mukaji'enji mu mahata. ⁵ Watshiginyine gumushiya, uvi wakhalele muvua woma wa thundu, mukunda wakhalele mumona egi Yone udi muzueledi ya ndaga jia gumatuama. ⁶ Hene, mukumbi diago akhalele mutshita wano wa ivo gia gubutuga gua Elode, mona Elodiase wa mukhetu wakinyine muanda mukatshi dia athu atamegewe, nu Elode wasuangulugile, ⁷ mu gusuanguluga guenji wadilogele ha gumuhana gima giagasue mba alomba. ⁸ Mu gutuma gua ginenji, mona mukhetu wazuelele egi: Nguhane luenyelu, holu dia longa, muto wa Yone - Mubatiji. ⁹ Fumu wavile gikenene, uvi, mukunda nu gudiloga nu athu atamegewe, wahanene mukhuala ha gumushiya nu guhana muto wenji gudi mona, ¹⁰ nu watumine athu muya mushiya Yone mu bologo. ¹¹ Muto wenji wabatawe holu dia longa, nu wahanewe gudi mona mukhetu, muene wa ubatele gudi ginenji. ¹² Alandudi a Yone ajile muzangula mvumbi yenji, nu ayifundjile. Nu ayile wawambela Yesu. ¹³ Havile ngenyi, Yesu wayile ha sambua mu wato, mukunda nu guya mukhala muene hakhenji mu khanda ya gibalala; nu thundu, yajiyile, yazogele mu dimbo dia masamba nu yamuhatele mu malu. ¹⁴ Hago muene azogele mu wato, wamuenene thundu yakoma, nu khenda jiamukhatele mukunda nu yene, nu wasagele akhashi. ¹⁵ Hago ingueze yabuile, alandudi asuenene hehi nu muene, nu azuelele egi: Gifundo giegi gidi giayigimina, nu kumbi didi diabalega, vutula thundu, hagula egi iye mumembo, mukunda nu gusumba madia. ¹⁶ Yesu watayele egi: Ishigo mutshigina guya; ihanenu enue hakhenu madia. ¹⁷ Uvi alandudi amuwambelele egi: Tudi khuta nu mapha atano nu jishui jiyadi. ¹⁸ Nu muene wawambelele egi: Jienu nawo. ¹⁹ Wambelele thundu ha guditumbiga mu muangu, wazanguile mapha atano nu jishui jiyadi, nu, tubuile meso gosa, watumbuishile Nzambi. Hangima, wabatuile mapha nu wahanene gudi alandudi, akaphele gudi thundu. ²⁰ Agasue adile nu akutile, nu abatele misanda kumi nu iyadi yazala nu itshinyi yakhalele musala. ²¹ Ago adile akhalele mu mutango wa athu midi itano, katula akhetu nu ana. ²² Nu gumanesa gudia ngegi, watumine alandudi enji hagungina mu wato nu ha guzawuga mu sambua gutuama dienji, hago hakhalele muene muvutula thundu. ²³ Hago hamanesele guyivutula, wakandugile holu ndia mulundu, mukunda nu gukombelela muene hakhenji; nu, ingueze yabuile, wakhalele hakhenji. ²⁴ Wato, wakhalele mukatshi na katshi dia meya, fundji yahanene gitembo; ndaga muhehe wakhalele muza khanda nu khanda. ²⁵ Mu kumbi dia nguana dia gimenegena, Yesu wahetele gudi ene, wakhalele muwenda holu dia meya. ²⁶ Hago alandudi amumuenene muwenda holu dia meya, woma wa akhuatele, nu azuelele egi: Idi gimbombi! Nu, mu woma wawo, ambile indanda. ²⁷ Yesu wawambelele egi: Muvigo woma, you ame! ²⁸ Phetelo wamuwambelele egi: Fumu, kana idi aye, hana mukhuala ha gula egi nguze gudi aye holu dia meya. ²⁹ Nu muene wazuelele egi: Giza! Phetelo wazogele mu wato, nu wawendele holu dia meya, ha guya gudi Yesu. ³⁰ Uvi, hamuenene muene egi fundji yakhalele yakola, wavile woma; nu, wasendesele gushuga, wakologele egi: Fumu, nguhuluise! ³¹ Mu hugo dimoshi Yesu wasunuine koko wenji, wamukhuatele, nu wamuwambelele egi: Muthu ya gutshigina guazonda, mukunda natshi (nu itshi) wavi woma? ³² Nu anginyine mu wato, nu fundji yahuile. ³³ Athu ago akhalele mu wato ajile mufugama ha tuama dia, Yesu, nu azuelele egi: Udi ya diago Muna Nzambi. ³⁴ Hangima dia guzawuga muta, ajile mu mavu a Jenezaleta. ³⁵ Athu a dimbo diene, hadile ajiya Yesu, atumine ngenji mu khanda jiagasue, nu abatele gudi muene akhashi agasue. ³⁶ Amulombele ha gukhuata khuta mbebe ya mulele wenji. Nu athu agasue akhuatele mulele wenji akhalele ya giusagewa.