1 Mu lusugu lumoshi luene, Yesu wazogele monzo, nu waditumbigile mukhulugo ya muta. 2 Thundu yakoma yadibungishile mu khulugo yenji, wanginyine mu wato, nu waditumbigile. Thundu yagasue yakhalele mumagana mu khulugo ya muta. 3 Wakhalele gu awambela ndaga jiavula mu ishima, nu wazuelele egi: Mukunyi mumoshi wazogele mukunda nu gukuna. 4 Hakhalele muene mukuna, ndambu ya mbuto yabuile mukhulugo ya njila: tunjila tuajile, nu tua idile. 5 Ndambu iko yabuile holu dia seso, guakhalelego nu mavu avula: jiakudile gandambo mukunda gahetelego mavu avula, 6 uvi, kumbi diazogele, nu diajimiginyishile mukunda jiakhalelego nu miji. 7 Ndambo iko yabuile mukatshi dia miya: miya yakudile, nu yajilangele. 8 Ndambo iko yabuile mu mavu abonga: yahagele mabundu, lukhama lumoshi lua mabundu, jiko makumi asamano, jiko makumi atatu. 9 Yago udi nu matshui aguvua ave. 10 Alandudi asuenene, nu amuwambelele egi: Mukunda natshi udi gu awambela mu ishima? 11 Yesu wavutudile egi: Ndaga ya muahuwe luholo lua gukotelesa ndaga jidi, jiagusuega mu ufumu wa mudilu, uvi yahuwego ene. 12 Ndaga ya udi nayo mba uhuiwa iko, ngenyi mba uzala nu ima, uvi udi gashigo nayo mba utambudiwa yene ndambo gadi nayo. 13 Hene ngudi guawambela mu ishima, mukunda ha gutala ashigo mumona ndo, nu haguvua ashigo muvua ndo nga gukotelesa. 14 Nu mukunda nu ene gudi mutagenesewa ndaga jia gutuama jia muzuedi wa ndaga jia gutuama Izaya: Mba muvua gu matshui enu, nu mba mukotelesago; Mba mutala nu meso enu, nu mba mumonyi ndo. 15 Ndaga ya mutshima ya athu wawa udi wakola; akolesa matshui awo, nu abatega meso awo hagula gumona nu meso awo, guvua ndo nu matshui awo, gukotelesa ndo nu mutshima wawo, Gubalumuna ndo mutshima wawo, nu hagula ngule gu asaga ndo. 16 Uvi gusuanguluga gudi meso enu mukunda adi mumona, nu matshui enu mukunda adi muvua! 17 Ngudi gumiwambela mu giamatshidia, azuedi a ndaga jia gutuama avula nu enya giamatshidia akambele gumona imudi mumona uvi ayimuenene ndo, akambele guvua imudi muvua, uvi ayivile ndo. 18 Enue venu gikoteselo gia gishima gia mukunyi. 19 Hadi muthu muvua mbimbi jia ufumu nu gashigo mukotelesa ndo, muthu wabola udi muza nu udi mukatula yago yakunyiwe mu mutshima wenji: muthu muene udi yago waheti mbuto mu khulugo ya nzila. 20 Yago wahetshi mbuto holu dia seso, udi yago udi muvua mbimbi nu guyitaya muphushi nu gusuanguluga, 21 uvi gashigo nu miji muene hakhenji, gashigo nu gukolesela nu hadimuza gubanjinyiwa nu gumuenesewa malamba mukunda nu mbimbi, na udi mubua. 22 Yago wahetshi mbuto mukatshi dia miya, udi yago udi muvua imbimbi, uvi ndaga jia ha mavu nu iheho ya umonyi idi mukuata mbimbi inyinyi, nu ishigo muyima mabundu. 23 Yago wahetshi mbuto mu mavu abonga udi yago udi muvua mbimbi nu udi gu ikotelesa; udi muyima mabundu iko lukhama lumoshi, iko makumi asamano, iko makumi atatu. 24 Watele gishima giko, nu wawambelele egi: Ufumu wa mudilu udi mufezegesewa nu muthu wakunyine mbuto yabonga mu gilanga gienji. 25 Uvi, hadi athu agubanda, mbalagaji wajile, wakunyine muangu wabola mukatshi dia mbuto yabonga nu wayile genji. 26 Hadile mbuto yakula nu yayima mabundu, muangu wabola nji wazogele mukatshi. 27 Enya mudimo wa fumu ya inzo ajile gumuwambela egi: Fumu, wakunyine ndo mbuto yabonga mu gilanga ba? Na gui gudi muza muangu wabola? 28 Wa avutudile egi: Mbalagaji watshitshi ngenyi. Nu enya mudimoi amuwambelele egi: Watshigina tshiye nu guvuza muangu wene? 29 Muene egi ndo, ndaga ya ha mudi muvuza muangu wabola, muajiya guvuza nji mbuto. 30 Jibembienu jikule hamoshi unu mu lusugu lua guhela, nu hakumbi dia guhela, mba nguwambela ahedi egi: Vuzenu gale muangu wabola nu ukangienu mu itungu mukunda nu gu ukonda tshuya, uvi bungishenu jimbuto mu mukala wami. 31 Watele gishima giko, wazuelele egi: Ufumu wa mu dilu udi wagufezegesewa nu lumbale lua kamba luazangudile muthu mukuna mu gilanga gienji. 32 Ludi lumbale luagubalegela guzonda mukatshi dia jimbale; uvi, hago yakudile, luabalegele ivunza nu yabuile mutshi wakoma, hene tunjila jia gosa jiajile mukhala mu thango jienji. 33 Watele gishima giko egi: Ufumu wa mu dilu udi wagufezegesewa nu gihemba gia mapha ginyi mukhetu mungoshi wazudile nu wambile mu ibutshilo itatu ya phupha unu gunu photo - photo yanda thuphuga yagasue. 34 Yesu wawambelele thundu ndaga eji jiagasue mu ishima, nu wkhalele guawambela ndaga jiagasue mu ishima, 35 ha gutagenesa ndaga yazuelele muzuedi wa ndaga jia gumatuama egi: Mba ngutugula jano diami mu ishima, mba nguzuela ndaga jiagudisuega sendese guafugiwe mavu. 36 Hene wavutudile thundu, nu wanginyine monzo. Alandudi asuenene hehi nu muene, nu azuelele egi: Tulondolole gishima gia muangu wabola wa mugilanga. 37 Watayele egi: Yago udi mukuna mbuto jiabonga, udi Muna muthu; 38 gilanga, gidi mavu (gifutshi); mbuto jiabonga, jidi ana a mu ufumu, muangu wabola, idi ana a ndunge jiabola; 39 mbalagaji yago wajikunyi, udi diabulu; mbuto, jidi gisugishilo gia mavu; akunyi, adi anjelo. 40 Uvi, gifua luholo luago luana vujiya muangu wabola nu wanambiwa ha jigo dia tshiya, mba ikhala luholo lumoshi luene mu lusugu lua gisugishilo gia mavu. 41 Muna muthu mba utuma anjelo enji, mba avuza ima yabola mu gilanga gienji nu ago anatshita gubola: 42 nu mba abishila mu wina wa tshuya tuabala, gunu mba gukhala idilo nu gukolotota mazo. 43 Uvi athu atagana mba akhala gifua muanya mu ufumu wa shawo. Yago udi nu mutshui mukunda nu guvua ave. 44 Ufumu wa mudilu udi nji wagufuanegesa nu umonyi wa gusuega mu gilanga. Muthu wa uheta (umona) udi gu usuega; nu, mu gusuanguluga guenji, udi muya mudiga ima yenji yagasue, nu udi musumba gilanga giene. 45 Ufumu wa mudilu udi nji wagufuanegesa nu muenya umonyi udi mukamba maseso a ndando. 46 Wamuenene seso ya ndando imoshi yabalega ndando; nu wayile mudiga ima yenji yagasue, nu wa isumbile. 47 Ufumu wa mudilu udi nji wagufuanegesa nu wanda wambiwe mu muta nu wakhatele jishui jia luholo nu luholo. 48 Hago wazalele, alowi awunan, ene; nu, aditumbigine mu khelego ya muta, ambile mu khombe yawo jinyi jiakhalele jiabonga, nu abishidile jinyi jiakhalele jiabola. 49 Mba ikhala luholo, lumoshi luene mukunda nu gisugishilo gia mavu. Anjelo mba aza mukaphumuna athu abola nu athu adi atagana, 50 nu mba abishila mu tsuya tuabala, gunu mba gukhala idilo nu gukolotota mazo. 51 Muakotoluesa ndaga jieji jiagasue? -Ai, atayele ene. 52 Nu wawambelele egi: Mukunda nu ngenyi, muenya gusonega yagasue wanalongesa yago idi mutala ufumu wamudilu udi yagufuanegesa nu fumu ya inzo imoshi udi muzangula mu umonyi wenji ima ihe - ihe nu ima ikulu. 53 Hago Yesu wanesene mbimbi jinyi, wayile khanda iko. 54 Hago wayile mu mavu enji, wakhalele mulongesa mu gikombelelo, mu luholo lumoshi egi muthu yagasue wakhalele muvua malongo enji wakhalelele mushimana nu guzuela egi: Guyi gudi muza ungambi nu ndaga jia gushimana jia luholo lulu? 55 Gashigo muna muenya mabaya? Madiya gashigo ginenji? Yakoba, Yozefi, Simona nu Yudeya, ashigo aphanjienji a mala? 56 nu aphanji'enji a akhetu ashigo agasue mukatshi dietu? Guyi gudi gumuza gua ndaga jieji jiagasue? 57 Wakhalele mukunda nu ene seso ya gikhakhuishilo. Uvi Yesu wawambelele egi: Muzueledi wa ndaga jia gutuama wanakhala yagusebulula khuta mu inzo yenji. 58 Gatshitshilego ndaga jiagushimana jiavula ha gifundo giene, mukunda nu gukola mitshima yawo.