¹ Mu kumbi dinyi, Yesu wabalegele mu gilanga gia bule mu lusugu lua sabato. Alandudi enji, avile nzala, nu asendesele guhalumuna bule nu gudia. ² Afalase hamuenene ene ngenyi, amuwambelele egi: Tala, alandudi aye adi mutshita ndaga mikhuala idi mutuna mu lusugu lua sabato. ³ Uvi Yesu wa'avutuile egi: Muatangelego ndaga jia tshitshile Davidi, kumbi dia vile muene nzala, nu athu akhalele nu muene; ⁴ Luholo tshi ganginyine mu gikombelelo, nu wadile mapha a milambu, ago adi gashigo nayo gudia, nga athu akhalele nenji, nu akhalele khuta mukunda nu nganga-Nzambi. ⁵ Nga, muatangelego mu mikhuala egi, masugu a sabato, nganga-nzambi jidi mukulula mikhuala mu gikombelelo, uvi ene gujiya ndo? ⁶ uvi, ngudi gumiwambela, haha gudi nu gima gia gubalega gikombelelo gukoma. ⁷ Gula nga mudi mujiya gikoteselo gia: Ngana suanguluga nu gufuila gua khenda, uvi milambu ndo, nga muana fisa milonga ndo gudi athu ashigo nu ndaga. ⁸ Ndaga Muna muthu udi fumi'ya sabato. ⁹ Ha katugile muene hene, Yesu wanginyine mu gikombelelo. ¹⁰ Nu guakhalele muthu mungoshi muene nu koko gua gimigina. Ahudile Yesu egi: Idi ya gutshiginyishiwa ha gusaga muthu mu lusugu lua sabato ba? Ya khalele mukunda nu guya gumufunda. ¹¹ Muene wa'avutuile egi: Nanyi mukatshi dienu wajiya gukhala nu gimeme gimoshi ha gimoshi nu giabua mu wina mu lusugu lua sabato, gajiyilego gu gizola mu wina? ¹² Muthu gashigo ya gubalega gimeme gu ndando! Idi ya gutshiginyishiwa ha gutshita ndaga jia bonga mu masugu a sabato. ¹³ Hene gawambelele muthu muene egi: Sununa koko guaye. Wasunuine koko, nu guakolele diago gifua koko guko. ¹⁴ Afalase azogele, nu adibungishile ha gukamba luholo lua gumushiya. ¹⁵ Uvi Yesu wajiyile ndaga yene, na walengele khanda iko. Athu avula amuhatele. Wasagele akhashi agasue, ¹⁶ nu wa'atunyishile mangololo ha guwambela athu, ¹⁷ ha gula egi ndaga jia zuelele Izaya muzuedi wa ndaga jia gutuama, jitaganesewe. ¹⁸ Tadienu muenya mudimo wami yago nga tombele, muthu yami ya guzumba yago mutshima wami wana suangulugila. Mba nguhaga givule giami holu dienji, nu mba ulongesa giamatshidia ha mavu. ¹⁹ Mba gashigo gudibinda ndo, ²⁰ mba gashigo mukologoga ndo, nu gushigo nga muthu mba uvua diji dienji mu balabala. Mba gashigo mubogola tumitshi tuazonda, Nu mba gajimigo tshuya tudi mufengetela, unu gunu mba gabingisa giamatshidia. ²¹ Nu mavu agasue mba ahaga mutshima mu jina dienji. ²² Hene amubatele gifofo giakhalele nu diabulu nu mbobo, nu wamusagele, hene mbobo gazuelele nu gamuenene. ²³ Thundu yagasue yashimanene nu guzuela egi: Yowu gashigo muna Davidi? ²⁴ Afalase, havile ndaga yene, azuelele egi: Muthu yowu udi mukaya madiabulu nu Belezebula, fumu ya madiabulu. ²⁵ Ndaga ya Yesu wakhalele mujiya matangi awo, wawambelele egi: Ufumu wagasue udi wagudikhaphumuna, udi wagulebesewa, nu dimbo dijima diagasue nga inzo yagasue idi yagudikaphumuna yajiyilego gukhala luko. ²⁶ Gula Satana udi mukaya Satana, udi yagudikaphumuna muene hakhenji; luholotshi ufumu wenji wajiya gukhala luko? ²⁷ Nu gula ame ngudi mukaya diabulu nu Belezebula, anenu, anu gu akaya nu nanyi? Hene mba akhala manzuji enu. ²⁸ Uvi, gula ngudi mukaya diabulu nu givule gia Nzambi, ngenyi ufumu wa Nzambi waza gudi enue. ²⁹ Nga ndo, luholo tshi muthu gajiya gungina monzo ya muthu wabala nu gukuya ima yenji, gula gadiangelego gumujitshiga? hanyi hene hajiya muene gukuya monzo yenji. ³⁰ Yago gashigo nu ame gashigo mukuaku'ami, nu yago gashigo gudibungisa nu ame udi gudiyila. ³¹ Hene ngudi gumiwambela egi: Gubola guagasue nu luweyi luagasue mba gutotesewa gudi athu, uvi luweyi gudi givule giabonga mba gushigo mutotesewa. ³² Muthu yagasue wafeta Muna muthu, mba adi gumutotesela; uvi muthu yagasue mba ufeta givule giabonga, mba ashigo gumutotesela nga luenyelu nga mu ivo idi muza. ³³ Nga zuelenu egi mutshi udi wabonga nu bundu dienji didi diabonga, nga zuelenu egi mutshi udi wabola nu bundu dienji nii didi diabola; ndaga ya mutshi wanajiyiwa gu bundu dienji. ³⁴ Vungu dia nyoga, luholotshi muajiya guzuela ndaga jiabonga, uvi enue mudi athu abola? Ndaga ya idi guzala gua mutshima hene kano guana zuela. ³⁵ Muthu wabonga udi muzola ima yabonga mu phungu yenji, nu muthu wabola udi muzola ndaga jiabola mu phungu yenji yabola. ³⁶ Ngudi gumiwambela egi: Mu lusugu lua gusophesewa, athu mba ahudiwa gu mbimbi jiagituhu jiagasue jiakhalele muzuela. ³⁷ Ndaga mu mbimbi jiaye mba ukhala yaguhuluishiwa, nu mu jimbimbi jiaye mba ufishiwa milonga. ³⁸ Hene enya gusonega nu afalase ako azanguile mbimbi, nu azuelele egi: Ndombi, tuatshigina gumona ndaga jia gushimana. ³⁹ Muene wawambelele egi: Gindongo giabola nu gia uthambi gidi mulomba ndaga jia gushimana; mba gushigo gumihuwa ndaga jia gushimana jiko khuta jiago jia muzueledi wa ndaga jia gutuama Yonasi. ⁴⁰ Ndaga ya, luholo Yonasi atshitshile masugu atatu nu phipha jitatu mu vumo dia ishui yakoma, luholo lumoshi luene Muna muthu mba gakhala masugu atatu nu phipha jitatu mukatshi dia mavu. ⁴¹ Enya gu Niniva mba azuga, mu lusugu lua gusophesewa, nu gindongo'egi nu mba agifisa milonga, mukunda abalumuine mitshima yawo mu gulongesa gua Yonasi; nu tala, haha gudi nu muthu yagubalega Yonasi. ⁴² Fumu ya mukhetu ya midi mba uzuga, gu lusugu lua gusophesewa, nu gindongo'egi nu mba ugifisa milonga, mukunda muene wajile gu gisugishilo gia mavu mukunda nu guvua ungambi wa Salomoni, nu tala, haha gudi nu muthu yagubalega Salomoni. ⁴³ Kumbi givule giabola gidi muzoga gudi muthu, gidi muya mu mabugu agimigina, mukamba guhuluguga, nu gashigo gugiheta. ⁴⁴ Hene gidi muzuela'egi: ngudi muvutuga mu inzo yami gu ngazogi; nu, hago gidi muheta, gidi gisanga giagituhu, giagukomba nu giagulonda. ⁴⁵ Gidi muya, nu gidi muzangula ivule iko sambadi yagumubalega gubola; idi mungina monzo, idi mukhala muene, nu luholo luhe-luhe a muthu muene ludi mukhala luabalega luholo lukulu gubola. Mba ikhala nji luholo lumoshi mukunda nu gindongo giegi giabola. ⁴⁶ Yesu wakhalele luko muzuela gudi thundu, tala, ginenji nu aphanj'enji amala, akhalele honze, mukamba ha guzuela nenji. ⁴⁷ Muthu mungoshi wamuwambelele egi: Tala, ginaye nu aphanj'aye amala adi honze, nu adi mukamba ha guzuela nu aye. ⁴⁸ Uvi Yesu wamutayele egi: Nanyi udi ginami, nu akhuatshi adi aphanj'ami amala? ⁴⁹ Hangima, wasunuine koko gudi alandudi enji, wazuelele egi: Tala ginami nu aphanji'ami amala. ⁵⁰ Ndaga ya, muthu yagasue udi mutshita gutshigina gua Shami udi mudilu, muthu mununu udi phanji'ami ya yala, nu yamukhetu, nu ginami.