¹ Hago Yesu hadile wamanesa ha guhana mikhuala gudi alandudi enji kumi nu muyadi, wayile khanda iko, mukunda nu gulongesa mu membo ako. ² Yone mubatiji, hadile wavua mu bologo dienji athu muzuela midimo ya Kilisto, watumine alandudi enji ha gumuhula egi: ³ Aye udi yago udi nayo guza, nga tudi nayo gunengena muthu muko? ⁴ Yesu watayele egi: Ndienu muwambele Yone yago mudi muvua nu yago mudi mumona: ⁵ ifuameso adi mumona, ikata idi muwenda, enya hute adi agusagewa, khukhu jidi muvua, mvumbi jidi muzuga gu gufua, nu mbimbi yabonga idi mulongesewa gudi jiphutu. ⁶ Gusuanguluga gudi muthu yago mba gukhadigo gikhakhuishilo! ⁷ Hago akhalele muvutuga, Yesu wasendesele guzuela gudi thundu, mukunda nu Yone egi: Itshi muayile mutala mu gibalala? gamutshi gadi munyigishiwa gudi muhehe (funji)? ⁸ Uvi, itshi muayile mutala? muthu mumoshi wasudigile milele ya ndando? Tadienu, ago adi musudiga milele ya ndando adi mu jinzo jia mafumu. ⁹ Itshi muayile diago mutala? muthu udi muzuela ndaga jia gumatuama? Ayi, ngudi muzuela, nu udi yagubalega muzueledi wa ndaga jia gumatuama. ¹⁰ Ndaga idi mukunda nu muene idi yagusonegewa egi: Tala, ngatuma nenga (ngenji) gutuama dia phala, mukunda nu gulonda njila yaye gutuama. ¹¹ Ngudi gumiwambela mu giamatshidia, mukatshi dia athu ago avalewe abutshiwe gudi akhetu, gushigo nga mumoshi udi wabalega Yone - Mubatiji gu gukoma. Ndaga, muthu wabalega guzonda mu ufumu wa mudilu udi yagumubalega gukoma. ¹² Sendese kumbi dia Yone -Mubatiji unu henyaha, ufumu wa mudilu udi nu guluishiwa guavula nu enya mangala-ngala adi gu' uzangula. ¹³ Azuedi a ndaga jia gutuama agasue tshima nu mikhuala ya Mose akhalele muzuela ndaga ya ufumu wa mudilu unu mu kumbi dia Yone-Mubatiji; ¹⁴ Nu, gula mudi mutshigina gumukotelesa, muene Eliya yago udi nayo guza. ¹⁵ Yago udi matshi mukunda nu guvua ave. ¹⁶ Gudi nanyi ngajiya gufezegesa gindongo' egi? Gidi gifua ana adi hashi mu mafundo a athu avula, nu adi muwambela ana ako, ¹⁷ egi: Tuamishigila mbinga, uvi enue nu gukina ulumbu ndo; Tua haga ngimbo jia mafua nu muavilego gikenene. ¹⁸ Uvi Yone wajile, gakhalelego mudia nga gunua, nu ene azuelele egi: Udi nu diabulu. ¹⁹ Muna muthu waza, udi mudia nu gunua, nu adi muzuela egi: udi muenya gudia nu gunua, futa dia apibilikanu nu enya makalagelo abola. Uvi ungambi wakhalele wagumuegesewa mu midimo yenji. ²⁰ Hene, wasendesele guwamba membo ajima, ago akhalele mutshitshiwa ndaga jia gushimana, ndaga ya abalumuinego mitshima yawo. ²¹ Mukumbu gudi aye, Kolazina! mukumbu gudi aye Betesayida! Ndaga ya, gula nga ndaga jia gushimana jiago jia tshitshiwe mukatshi diaye nga jia tshitshiwe mukatshi dia Tila nu Sidona, nga abalumuine gale mitshima yawo mualeha, nu nga asudigile gale phidi. ²² Hene ngudi gumiwambela egi: Mu lusugu lua gusophesewa, Tila nu Sidona mba asophesewa haleba uvi enue ndo. ²³ Nu aye, Gapelanawuma, mba ukhala sha ya gukanduishiwa unu gosa mudilu? Ndo sha. Mba ubulumuishiwa unu gu galunga; ndaga ya, gula ndaga jia gushimana jia tshitshiwe mukatshi diaye nga jia tshitshiwe gu Sodoma, nga Sodoma yowu luko unu mangino. ²⁴ Hene ngudi gumiwambela egi: Mu lusugu lua gusophesewa, dimbo dia Sodoma mba disophesewa haleba uvi aye ndo. ²⁵ Mu kumbi dinyi, Yesu wazanguile mbimbi, nu wazuelele egi: Ngudi gu gutumbuisa, Sh'ami, Fumu ya dilu nu mavu, mukunda wasuegele ndaga' eji gudi jingambi nu enya gutema, uvi wajijiyishile gudi ana agonda. ²⁶ Ayi, tata, ngudi gu gutumbuisa mukunda wa iitshiginyine ngenyi. ²⁷ Ima yagasue ya nguhuwe gudi Sh'ami, nu gushigo nu muthu udi mujiya Mona, khuta Sh'ami; gushigo nji ndo nu muthu udi mujiya Tata, khuta Munenji nu muthu yagasue Mona gadi mutshigina gujiyisa. ²⁸ Zenu gudi ame, khungi yenu yagasue mudi ya guhuila nu ginemo, nu ngudi gumihana guhuima. ²⁹ Zangudienu ginemo giami holu dienu nu tayenu mikhuala yami, ndaga ya ngudi nga tuluga nu mutshima wahuima; Nu mba mudi muheta guhuima mukunda nu monyo wenu. ³⁰ Ndaga ya ginemo giami gidi gia tuluga nu gia leba.