¹ Yajile kumbi diago Yesu hamanesele guzuela guenji, wawambelele alandudi enji: ² « Muajiya egi phake idi mu masugu ayadi, nu muna muthu mbauhanewa mukunda nu guhagewa ha mutshi wagudikiksa.» ³ Luenyelu mafumu akoma a holu dia ako nu manene a iphuta adibungishile mu luphango lua Gaïfa, fumu udi nu uhinyinyi holu dia ako. ⁴ Ayile dihingo dia gukuatewa gua Yesu mu gisuegi nu gumushiya. ⁵ Ndaga ya akhalele muzuela: « Ishigo nayo ya gukhala mu lusugu lua wano ha gulenga guzuga gua gudikhaphumuna mukatshi dia athu. » ⁶ Yesu wakhalele gu Betaniya monzo ya Simona muenya hute, ⁷ gifua muakhalele ene gu mesa, mukhetu mumoshi majile gudi muene nu mulondo wa albatele wa zala nu manashi a ndando (mubando) yakoma: nu wamu bunduile holu dia muto. ⁸ Nu uvi, hago alandudi enji amonene ngenyi, avile khabu jiavula nu azuelele egi: «Itshi idi yabonga ha gutotesa guogu? ⁹ mananashi wawa akhalele nawo gukhala agudigiwa mu ndando (mubando) wakola nu guhana gudi jiphutu.» ¹⁰ Uvi Yesu, wajiyile, nu wa awambele egi: «Mukunda nu itshi mudi musagesa mukhetu yogu? Watshitshi gima gia bonga muklunda nu ame. ¹¹ Mba mukhala masugu agasue nu jiphutu, uvi mba mukhadi masugu agisue nu ame. ¹² Ha angumuangela ame mananashi mu muila wami, wa itshitshi mukunda nu gufundiwa guami. ¹³ Giamatshidia, ngudi gumi wambela, gukhanda jiagasue mu mavu guago mba gulungewa luma lua bonga, mba azuela mukunda nu yatshitshile mukhetu yogu ha gumuwunguluga. » ¹⁴ Mungoshi ya mukatshi dia akumi nu muyadi, mu jina dia Yudasaliote, wayile gudi izueledi ya holu dia ako ¹⁵ nu azuelele: « Egi itshi muajiya gunguhua ha gula ngumihue nenji?» Azolele falanga jia utadi makumi atatu mukunda nu muene. ¹⁶ Sendese hugo diene dinyi, akhalele mukamba kumbi dia bonga mukunda nu gumihua nenji. ¹⁷ Lusugu lua gudiangela lua mapha ashigo nu gihemba, alandudi awambelele Yesu egi: «Gui watshigina egi tugulondele ima ya gudia mukunda nu Pake?» ¹⁸ Watayele egi: « Ndene mu dimbo dia masamba gu inzo ya muthu mumoshi nu muwambedienu: "Mulongeshi udi muzuela: « diami didi hehi. Ngetshigina gukhala nu gudia guami gua Pake gumbo dienu nu alandudi ami.»"» ¹⁹ Alandudi atshile gifua muazielele muene nu alondele ima ya gudia ya Pake. ²⁰ Hajile kumbi dia ngueze, akhalele nu alandudi enji kumi nu muyadi. ²¹ Hago akhakalele mudia, wa wambele: «Ya diago ngudi gumi wambela, mumoshi mukatshi dienu, mba ungu diga.» ²² Abuile mu gikenene giakola nu mumoshi nu mumoshi mukatshi diawo, asendesele gumuhula: « Idi ame, Fumu?» ²³ Watayele: « Yago wanda mba koko dienji nu ame mu longa dimoshi, muene mba ungudiga. ²⁴ Muna muthu mba uya gifua yasonegewe mu mukunda nu muene. Uvi gikenene (khenda) mukunda nu muene yago, muna muthu mba ukhala yagudigiwa! Yabalega gubonga nga muthu owu wabutshiyego.» ²⁵ Yudasa, yago watshinyine gumudiga wamuwambelele: «Idi ame, Fumu? » Wamutayele: «Wa izuela aye hakhaye.» ²⁶ Gifua akhalele ene mudia, Yesu wazanguile dipha, wadihanene mu guzela muila, nu wadibatshuile mu itshinyi. Wahanene gudi alandudi enji nu guzuela egi: « Zangudienu nu dienu. Wowu udi muila wami.» ²⁷ Wazanguile tshopo, walombele khenda. Wahuile nayo nu guzuela egi: zangudienu nu nuenu, mukuta wenu agasue; ²⁸ ndaga awa adi mahatshi ami, agudivua mu ufuta uhe - uhe abundudiwe mukunda nu athu avula, ha guavila jikhenda mun gubola guawo. ²⁹ Uvi ngudi gumiwambela, mba ngunuigo nji mabundu a vino diedi, unu lusugu mba nguzula mu hugo dihe - dihe mu ufumu wa tata.» ³⁰ Gu ngima dia guymba jingimbo, ayile gu mulundu wa olive. ³¹ Henyaha Yesu wazuelele egi: « Mudi mungubemba mukuta wenu wagasue mungueze yeyi: ndaga idi yagusonegewa: "Mba nguwasa mubambi nu imeme ya mu thundu mba imuangana". ³² Uvi gu ngima dia guzuga guami gu gufua, mba nguya gutuama dienu gu galileya.» ³³ Uvi Petelo wamuwambelele egi: «Nga agasue mba agubemba, ame mba ngugubembigo nga azonda.» ³⁴ Yesu wamuwambelele egi: «Idi ya diago ngudi guguwambela, phipha yenyeyi gu tuama dia kolombolo gudila udi mukhala wangutunyigale mahugo atatu.» ³⁵ Nu Petelo wamuwambelele egi: «Nga ngajiya gufua nu aye, mba ngugutunyigo.» Nu alandudi agasue atayele luholo lumoshi luene. ³⁶ Henyaha Yesu wayile nawo gu khanda ya khalele mutamegewa egi Getesemane nu wawambelele alandudi enji: « Khadienu hashi haha, ame ngaya gu bugu diko mukunda nu gukombelela.» ³⁷ Wazanguile Petelo nu ana muyadi a Zebede, nu wasendesele guvua gikenene nu dilamba diakola. ³⁸ Wawambelele egi: « Mutshima wami udi nu gikenene giavula, unu gu gufua guami. Sadienu haha nu mubandigo tulo khungi nu ame.» ³⁹ Wayile ndambu haleha, wabuile guphala yenji ha gukombelela nu guzuela egi: Tata, gula idi yabonga wajiya gungu katshila tsiopo didi. Mahugo agesue, ishigo yene ingatshigina, uvi muho uhu udi gutshigina guaye. ⁴⁰ Wajile luko gudi alandudi enji nu wa asangele agubanda. Na, wa awambele Petelo: «Mukunda nu itshi? muajiyilego gutuna gubanda tulo nu ame mu kumbi dimoshi? ⁴¹ Mubandigo tulo nu mukombelele mukunda nu gulolewa. Mutshima udi watagana, uvi muila udi waleba.» ⁴² Wayile luko ndambu haleha hugo dia ngiadi nu gukombelela egi: «Tata, gula ishigo ha gula egi tshiopo diajiya gukatshuya gudi ame ha gula egi ngunuigo, itshitshiwe mu gutshigina guaye.» ⁴³ Wajile luko, wa asangele agubanda tulo, ndaga ya meso awo akhalele aguhuila. ⁴⁴ Henyaha wa abembele luko, wayile ndambu haleha, wakombelele luko hugo dia thatu nu guzuela mbimbi jimoshi. ⁴⁵ Gungima, Yesu wavutugile gudi alongi enji nu wawambelele egi: «Mudi mubamba nu mudi muhulunguga luko, tadienu kumbi didi diagutagana dia muna muthu guhanawa ha mago a athu abola. ⁴⁶ Zugienu, tshuenu (tuye). Tadienu yago udi gungudiga udi gale hehi.» ⁴⁷ Hakhalele muene muzuela luko, Yudesa, mungoshi ya kumi nu muyadi wajile. Thundu imoshi yakoma ajile gudi Azueledi a holu dia ako nu manene a iphuta ajile nu muene (n'enji). Ajile nu jiphogo nu itshinyi ya mitshi. ⁴⁸ Muthu yago wakhalele nayo yagudiga Yesu, watshitshile gijiyilo mu zuela egi: << Nga nanyi yago ngandakondegeza, muene unu, mukuatshienu (mu mukuate). ⁴⁹ «Mu hugo dimoshi diene, wajile gudi Yesu nu guzuela agi «Wabanda Mulongeshi!» nu wamusunyine ivungu. ⁵⁰ Yesu wamuwambelele egi: «Futa diami tshita, iwaji mutshita.» Na ajile, ambile mago ha muila wa Yesu (amukuatele). ⁵¹ Tala, mungoshinmukatshi ya ago akhalele nu Yesu, wasunuine koko guenji wazolele iphogo, wawasele muenya mudimo wa nene diakoma dia Gikombelelo nu wabatshile kutshi gumoshi. ⁵² Henyaha Yesu wamuwambelele egi: «Vutula phogo yaye ha fundo dienji, ndaga ya yagasue udi mutshitshila phogo, mbautotesewa gu phogo. ⁵³ Udi mutangiza egi ame ngajiyilego gutamega shami wajiya gungutumina milongo kumi nu iyadi ya anjelo? ⁵⁴ Uvi luholo tshi gusonega (gufunda) mbagutagenesewa, ha gula ndaga jieji jiajiya guza?» ⁵⁵ Mu hugo diene dinyi dimoshi, Yesu wawambelele ithundu << Muaji nu mihango nu jiphogo mukunda nu gungukuata gifua nzangi? Ngakhalele masugu agasue hashi mu Gikombelelo nu gulongesa nu muangukuatelogo. ⁵⁶ Uvi yeyi yagasue yaza mukunda nu gutagenesewa gua yagasue yagundiwe gudi azuedi a ndaga jia gumatuama. Henyaha alongi agasue amubembele nu alengele. ⁵⁷ Ago akuatele Yesu, amutualele gudi Gayifa muzueledi wa holu dia ako guago guakhalele gudibungisa enya iphuta nu manene a Gikombelelo. ⁵⁸ Phetelo wakhalele gualandula gualeha gualeha unu mu gibanzala gia luphango lua nene dia holu dia ako. Wanginyine nu waditumbigile (wakhalele hashi) nu athu ako hagutala yajiya gukuala mubalega. ⁵⁹ Manene a holu dia ako nu agasue anahana malongo akombele guzuela ndaga jia mambo mukunda nuYesu ashiyiwe, ⁶⁰ Amuenenego nga ndaga imoshi, nga ndaga jiavula jia mambo jiamuenegene. Gu ngima muyadi ajile ⁶¹ nu azuelele egi «Muthu ou wazuelele egi " Ngudi ya gutagana ha gumuanga inzo ya Nzambi (gikombelelo) nu guyimagesa luko mu masugu atatu."» ⁶² Muzuedi wa holu dia ako wazugile nu wamuwambelele egi « ushigo muvutula go?» Itshi idi ndaga jidi muzuela athu wawa mukunda nu aye? ⁶³ Uvi Yesu wahuenene tedie. Muzuedi wa holu dia ako wamuwambelele egi: « Ngudi muguhula mukunda nu Nzambi ya monyo ha gutuwambela gula udi Kilisto muna Nzambi?» ⁶⁴ Yesu watayele egi « Wazuela aye hakhaye. Uvi ngudi muguwambela, mbaumona muna muthu hashi gu koko gua madia gua ngolo nu gudi muza holu dia matuta mudilu.» ⁶⁵ Henyaha muzuedi wa holu dia ako wakaluile mulele wenji nu guzuela egi: Wabetumuna! mukunda nu itshi tuajiya gukamba luko ndaga jiko jiaguzuela? Tadienu, muamona luholo lua gubetumuna guenji. ⁶⁶ Itshi mudi mutangiza?» Atayele agasue: watagana ha guya gu gufua.» ⁶⁷ Amufuitshile mute holu dia phala, amuwasele mbanda ⁶⁸ nu guzuela: Tuwambele ndaga jia gumatuama, Kilisto. Nanyi waguwasa?» ⁶⁹ Phetelo wakhalele hashi honze mu gibanzala, mutshitshi wa mudimo ya mukhetu wajile gudi muene nu guzuela egi: « Wakhalele nu Yesu muenya gu Galileya.» ⁷⁰ Uvi wumutunyine gutuama dia athu agasue nu wazuelele egi: « Ngushigo mujiya itshi udi muzuela.» ⁷¹ Hayile ene gu mufulo wa mazogelo, mutshitshi wa mudimo wa mukhetu wamumuenene nu nu wawambelele ago akhalele n'enji egi: « Muthu ou wakhalele nji nu Yesu muenya gu Nazaleta.» ⁷² Wamutunyine gu meso a agasue muy hugo dihe-dihe nu gudiloga: « Ngushigo mujiya muthu ou.» ⁷³ Gu ngima dia kumbi diazonda, ago akhalele hene ajile nu azuelele gua Phetelo: « Yadiago, udi ya mukatshi diawo; ndaga ya mbimbi yaye idi gugufunda.» ⁷⁴ Na wasendesele gudizuelela nu gudiloga: « ngushigo mujiya muthu ou.» Mu hugo diene dimoshi, kolombolo diadidile. ⁷⁵ Phetelo wawungulugile mbimbi jiamuwambelele Yesu egi: «Gutuama dia kolombolo khenji didila gale go, aye mbongutuna mahugo atatu.» Na wazogele nu gudila muavula.