¹ Hangima dia gubutshiwa gua Yesu gu Beteleyema mu Yudeya masugu ene Elodi wakhalele fumu, Ngangu mikanda jiajile gu Esete jiahetele gu Yeluzalema nu guzuela egi: ² «Guyi gudi muthu yago wabutshiwa, fumu ya enya Yuda? Tuamonyi themua yenji gu Esete nu tueji mukunda nu gumukombelela.» ³ Hago muatha Elodi wavile ngenyi, wavile woma, nu Yelusalema yagasue nji yavile woma. ⁴ Elodi wabungishile nganga Nzambi jiagasue nu enya gusonega a thundu nu wahudile egi: «Guyi Kilisto adi nayo gubutshiwa?» ⁵ Ene amutayele egi: «Gu Betelehema mu Yudeya, ndaga tala yago yasonegewe gudi muzueledi wa ndaga jia gutuama: ⁶ "Nu aye, Betelehema, udi mu mavu a Yudeya, ushigo yazonda mukatshi dia atuameji a Yudan ndaga mukatshi diaye mba guza mutuameji mba utuameza thundu yami ya Isalele."» ⁷ Hangima, Elodi watamegene mu mafumbe ji nganga mukanda mukunda nu guahula kumbi tshi diago amuenene themua yene. ⁸ Watumine gu Betelehema nu guzuela egi: «Ndienu nu kambienu muabonga mona muene. Gula muamumona, munguwambele mukunda nu ame nji nguye ha gumukombelela.» ⁹ Hangima dia gutegelela muatha, Ene ayile nu themua yago amuenene gu Esete yadiangele ha tuama diawo unu yamagenene holu dia gifundo ginyi giakhalele mona. ¹⁰ Hago amuenene themua, kiese giavula giakhatele. ¹¹ Anginyine mu inzo (monzo) nu amuenene mona wazonda nu ginenji Madiya. Afugamene nu amukombelele. Azolele umonyi wawo nu ahanene mulambu wa wolo, uhafu, nu mananashi. ¹² Nzambi wawambelele mu nzoji hagula egi avutugago gumbo dia Elodi; Ngenyi na avutugile mu njila iko haguya gumbo diawo. ¹³ Hangima dia guya guawo, muanjelo mumoshi ya Fumu wamuenegene gudi Yozefo mu nzoji nu wamuwambelele egi: «Zuga, zangula mona nu ginenji, nu lenga gu Ejipiti. Khala guene unu mba nguguwambela ndaga Elodi udi mukamba mona mukunda nu gumushiya.» ¹⁴ Phipha imoshi yene yago inyi, Yozefo wazugile nu wazanguile mona nu ginenji nu ayile gu Ejipiti. ¹⁵ Akhalele guene unu Elodi afuile. Yeyi yataganene mukunda nu yago Fumu wazuelele mu azueledi a ndaga jia gutuama egi: «Honze ya Ejipiti ngatamegene munami.» ¹⁶ Hangima, hago Elodi wajiyile egi nganga mukunda jiamuvilego, wavile khabu jiavula. Watumine ha gushiya ana a amala agasue hadi mu khuwo ya mvula jiyadi nu gushina ago akhalele mu Betelehema nu mu khanda yene yagasue, haguhata kumbi diago adivile nu nganga mukanda. ¹⁷ Ngenyi yataganene ndaga yazuelewe gudi Yelemia muzueledi wa ndaga hia ndaga jia gutuama egi: ¹⁸ «Avile dizui dimoshi gu Lama, idilo nu gikenene giavula, Lashela wadidile mukunda nu anenji, nu muene watshiginyine ha gukhala mu mafua mukunda ene akhalelego luko» ¹⁹ Hago Elodi wafile, tala, muanjelo mumoshi ya Fumu wamuenegene gudi Yozefo mu nzoji gu Ejipiti nu wamuwambelele egi: ²⁰ «Zuga nu zangula mona nu ginenji nu nda gu mavu dia Isalele ndaga ago akhalele mutshigina gushiya mona afigale.» ²¹ Yozefo wazugile, wazanguile mona nu ginenji nu ayile gu mavu dia Izalele. ²² Uvi hago avile egi Akelawusu wakhalele muhiminyina holu dia Yudeya ha gifundo gia Elodi, wavile woma ha guya. Hangima dia gumuwambela mu nzoji gudi Nzambi wayile gu Galileya ²³ nu wayile nu wajingile mu dimbo dimutamegewa egi Nazaleta. Ndaga yeyi yatagenesele yago yazuelewe gudi azueledi a ndaga jia gutuama, ngenyi mba utamegewa egi Muenya gu Nazaleta.