¹ Mukanda wa senga ya Yesu - Kilisto, muna Davidi, nu muna Abalahama. ² Abalahama wabutshile Izaka, nu Isaka wabutshile Yakobo, nu Yakobo wabutshile Yuda nu aphanji'enji. ³ Yuda wabutshile Falese nu Zala, nu ginawo wakhalele Tamala. Falese wabutshile Eseloma. Eseloma wabutshile Alame. ⁴ Alame wabutshile Aminadaba. Aminadaba wabutshile Nasona. Nasona wabutshile Salomo. ⁵ Salomo nu Lababe abutshuile Bowaze. Bowaze wabutshile Obede. Gina Obede wakhalele Luta. Obede wabutshile Yese. ⁶ Yese wabutshile muatha Davidi, nu Davidi wabutshile Salomoni nu mukhetu wa Uliye. ⁷ Salomoni wabutshile Lobowami. Lobowami wabutshile Abia, Abia wabutshile Aza, ⁸ Aza wabutshile Yozafati, Yozafati wabutshile Yolami. Yolami wakhalele gijina gia Oziasi. ⁹ Oziasi wabutshile Yowatami. Yowatami wabutshile Ashaze, Ashaze wabutshile Ezeshiase, ¹⁰ Ezeshiase wabutshile Manase, Manase wabutshile Amo, nu Amo wabutshile Yosiase. ¹¹ Yosiase wabutshile Yekoniase nu aphanji'enji a mala, mu kumbi diagubatewa mu mahiga gu Babilona. ¹² Hangima dia gubatewa mu mahiga gu Babilona, Yekoniase wabutshile Salatiele, Salatiele gishina gia Zolobabele, ¹³ Zolobabele wabutshile Abiyude, Abiyude wabutshile Eliakima, nu Eliakima wabutshile Azola, ¹⁴ Azola wabutshile Sadoka, Sadoka wabutshile Akime, nu Akime wabutshile Eliyude. ¹⁵ Eliyude wabutshile Eleyazala. Eliyazala wabutshile Matana, Matana wabutshile Yakobo. ¹⁶ Yakobo wabutshile Yosefo mulumi'a Madiya wabutshile Yesu. Yesu udi yago umutamegewa egi Kilisto. ¹⁷ Indongo yagasue sendese Abalahama unu Davidi yakhalele mu mutango wa kumi nu iwana, Sendese Davidi unu gubatewa mu mahiga gu Babilona indongo kumi nu iwana, nu sendese gubatewa mu mahiga gu Babilona unu Kilisto indongo kumi nu iwana. ¹⁸ Gubutshiwa gua Yesu -Kilisto guajile mu luholo luenyelu: Madiya wa ginenji wakhalele mulongesewa gu mahata gudi Yozefo, uvi gutuama dia gukhala mu mahata, Madiya wamitile vumo mu ngolo jia Nyuma -Yabonga. ¹⁹ Mulumi'enji Yozefo wakhalele muthu mumoshi yatagana, uvi gatshiginyinego ha gumuhana musonyi mukatshi dia thundu. Hene, watangijile ha gushiya mahata mu mafumbe nu Madiya. ²⁰ Hago muene hakhalele mutangiza ndaga yene, muanjelo wa Fumu wamuwambelele mu nzoji egi: «Yosefo, muna Davidi, uvigo woma ha guzangula Madiya mu mahata, ndaga yago gadi nenji mu vumo udi yagumitiwa mu ngolo jia Nyuma - Yabonga. ²¹ Mba ubuta mona yala, nu mba mu mutamega Yesu, ndaga mba uhuluisa gikanda gienji gu gubola guawo.» ²² Yeyi yagasue yahetele mukunda nu gutagenesa yago Fumu wazuelele mu muzueledi wa ndaga jia gutuama, egi: ²³ «Tala, mona mukhetu yago khenji ajiyile yala ndo mba umita vumo nu mba ubuta mona yala. Mba amutamega egi Emmanuele (idi muzuela egi " Nzambi udi nu esue.")» ²⁴ Yozefo wazugile gu tulo tuenji nu watshitshile yago muanjelo wa Fumu wa mutumine ha gutshita. Wamuzanguile mu mahata. ²⁵ Uvi muene amubandeselego unu muene abutshile mona yala. Nu wamuhanene jina dia Yesu.