¹ Yesu adapita mmwadiya, nkuyambuka, achipita mu mzinda wache. ² Onani, adabweresa kuna iye mwamuna wakupunduka atamugonesa pa makha ya mphasa. Nakuona chikhulupiriro chawo, Yesu adati kuna nyakupundukayo, "Mwana iwe, limba mtima. Bzakuipa bzako bzalekereriwa."

³ Onani, anembi winango adasewera okha okha, "Munthu umweyu akuchita makiriyado." ⁴ Yesu adabvima bzakukumbuka bzao achiti, "Sabwanyi munkukumbuka bzakuipa mmitima mwanu? ⁵ Nakuti kodi chapafupi mchiyani, kulewa, 'Bzakuipa bzako bzalekereriwa,' ayayi kulewa, 'Muka ufambe'? ⁶ Soma ndicho mudziwe mchakuti Mwana wa Munthu ana mphamvu padziko lapansi pano yakulekerera bzakuipa, ... "Adati kuna nyakupunduka ule, "Muka, takula mphasa yako, uyende kumui kwako." ⁷ Apo munthu ule adanyamuka achiyenda kumui kwache. ⁸ Pomwe thimu la wanthu lidaona bzobzi, lidachita mantha lichitenda Mulungu, omwe adapereka mphamvu imwei kuna wanthu. ⁹ Pomwe Yesu adapitirira kucoka pamwepo, adaona munthu dzina lache Mateu atakhala pa kanyumba ka munthu nyakukhomesa mitsonkho. Adati kuna iye, "Nditewere ine." Adamuka achimutewera iye.

¹⁰ Pomwe yesu adakhala pansi kudya mnyumba, onani, wakukhomesa mitsonkho na anyakuphonya azinji adabwerambo nkumbadzadya na Yesu na anyakupfunzira wache. ¹¹ Pomwe Afarisi adaona bzobzi, adati kuna wakupfunzira wache, "Sabwanyi mpfunzisi wanuyu ankudya na anyakukhomesa mitsonkho na anyakuphonya?"

¹² Pomwe Yesu adabva bzobzi, adati, "Wanthu wakulimba ambafuna lini nyabezi, soma okhawo ndiwo ankutsautsika. ¹³ Ndokoni mukapfunzire bzobzi kuti bzinkulewanyi: 'Nimbafuna chifundo sikuti nsembe.' Thangwe ndiribe kubwera kudzachemera wakulungama kuti alape, soma wakuphonya."

¹⁴ Tsapano wakupfunzira wa Yohani adabwera kuna iye achiti, "Thangwelanyi ife na Afarisi timbasala kudya nthawe zizinji, soma wakupfunzira wanu ambasala lini?"

¹⁵ Yesu adati kuna iwo, "Wanthu wa pa ma loozo angalire pomwe mulooli akadali popo na iwo? Soma nsiku zinkubwera ndizo mulooliyo amdzatengiwa kuna iwo, apo tsapano amdzasala kudya. ¹⁶ Palibe ambasonerera chigamba chipsa pa chakubvala chakusakala, thangwe chigambacho chimdzalekera ku cakubvala chakalecho, apo kung'ambika kukulu kumdzachitika. ¹⁷ Neye wanthu ambatsanulira lini vinyo wakusasa mu mitsuko ipsa. Achitenepo, mitsukoyo imdzaphoka, vinyo wense achitaika, apo mitsukoyo ichipseka. Soma, ambaikha vinyo mupsa mmitsuko ipsa, apo bwensene bzimdzakoyeka."

¹⁸ Pomwe Yesu ali mkati kusewera bzobzi kuna iwo, onani, mkulu winango waboma adabwera achidzagodama kuna iye, Achiti, "Mwanangu mkazi wasaika tsampanopali, soma bwerani mudzamubzatikembo manja, apo anilimba." ¹⁹ Apo Yesu adalamukadi achimutewera, na wakupfunzira wache pabodzi.

²⁰ Onani, mkazi winango ndiye akhatsautsika na matenda ya kuchoka mulopa ate magole khumi na mawiri adabwera nkuwenda mmuyo mwa Yesu achikhuya pa ponta pa chakubvala chace. ²¹ Thangwe adati mumtima mwace, "Ndichitondo kukwanisa kukhuya bzakubvala bzache bzire, nilimbiratu."

²² Soma Yesu adachungunuka achimuona iye, achiti, Mkaziwe, limba mtima; chikhulupiriro chako chakulimbisa." Apo mkaziyo adalimbadi nthawe imweyo letu. ²³ Pomwe Yesu adabwera mnyumba mwa munthu ule, adaona wakuimba bzitolilo na thimu lawanthu wakulila, ²⁴ Adati, "Ndoko uko, thangwe mwanayo alibe kusaika, soma watondo kugona." Soma wanthu adamuseka mwakumunyongodola. ²⁵ Pomwe thimu lire lidabulisiwa panja, adapita momo achimuphata boko lache, apo mtsikanayo adalamuka. ²⁶ Nkhani imwei idabveka kudziko kwenseneko.

²⁷ Pomwe Yesu adapitirira kuchoka popo, azimola awiri adamutewera. Akhakuwa kumbati, "Tichitirenimbo chifundo, Mwana wa Davide!"

²⁸ Pomwe Yesu adapita mnyumbamo, azimola wale adabwera kuna iye. Yesu adati kuna iwo, "Mukukhulupirira kuti ningachite bzobzi?" Adati kuna iye, "Inde, Mbuya."

²⁹ Kinangoka Yesu adaphata maso yawo achiti, "Lekani bzichitike kuna imwe malingana na chikhulupiriro chanu," ³⁰ apo maso yawo yadapenya. Tsapano yesu adawatsinda bzachadidi bzire achiti, "Chitani bzakuti munthu wina nampodi adziwe bzobzi," ³¹ Soma amuna awiriwo adayenda achimbasimba bzobzi kuna aliyense kwenseneko.

³² Pomwe amuna awiriwo akhayenda, onani, bewewe wakuphatiwa pomwe na chiwanda adamubweresa kuna Yesu. ³³ Pomwe chiwandacho chidabulisiwa, beweweyo adasewera. Wanthu azinji popo adadabwa achiti, "Ibzi bzikanati kuoneka kale muno mu Isaraeli!"

³⁴ Soma Afarisi popo akhalewa kuti, "Akuchosa bziwandabzi, na mphamvu ya mkulu wa bziwanda."

³⁵ Yesu adamala kuzunga mmizinda na mmiyi yensene. Adapitiriza kupfunzisa mma sunagoge yao, kulalika mafala ya ufumu na kulimbisa matenda ya mitundu yense na madwale mazinji. ³⁶ Pomwe adaona thimu lawanthu, adachita nawo nsisi, thangwe akhadabonera achifika pa kuphwiriziwa. Akhali ninga mabira ya kusaya nyakabusa. ³⁷ Adati kuna wakupfunzira wache, "Bzakukolola bzawandisa, soma anyabasa achepa. ³⁸ Mthangwe lache kamkulumize pempherani kuna Mbuya wa bzakukololayo, pala kuti atumize anyabasa muna bzakukololamo."