¹ Yesu adachemera wakupfunzira wache wensene khumi na awiri wale achiwapa mphamvu pa bziwanda, kubzibulisa, na kulimbisa matenda ya mtundu uliwense na kudwala kwamoda wense. ² Tsapano madzina ya wakupfunzira wale yakhali aya. Wakutoma, Simoni (ndiye akhamuti pomwe Petulo), na Andreya mano wache, Yakobo mwana wa Zabedayo, Na Yohani mano wache,' ³ Filipi, na Batumeyo; Yakobo mwana wa Afiyasi, na Tadeyo; ⁴ Simoni Mkanani, na Yudasi Isikariyoti, wakudzampereka Yesu.

⁵ Awa ndiwo khumi na awiri ndiwo Yesu adawatumiza. Adawapanganiza kuti, "Nampodi kuyenda kulikwense ndiko kumbakhala wa chikunja, apo nampodi pomwe kukapita mu mzinda wa a Samariya. ⁶ So ndokoni kuna mabira yakutayika ya ku Isarayeri; ⁷ apo pakuyenda, kalalikeni kuti, 'Ufumu bwa kudzaulu buli pafupi.' ⁸ Kalimbiseni atenda, kalamuseni wakusaika, kalimbiseni wa mapere, apo pomwe kabuliseni bziwanda. Mwatambira fovolo, kapeni fovolo. ⁹ Nampodi kutakula oro, siliva, ayayi kopa mu mchuno mwanu. ¹⁰ Nampodi kutakula chola cha pa ulendo pa ulendo bwanu, ayayi nsapato inango, ayayi shango, ayayi mpsimbo, thangwe nyabasa ambathemera na chakudya chace. ¹¹ Mzinda ayayi muyi uliwense munkapitayo, kaoneni wakuthemera mbani mwemo, apo kakhaleni momo ate kudzabula. ¹² Pakupita mnyumbamo, ipaseni moni. ¹³ Penu nyumbayo njakuthemera, mtendere wanu ukakhale pa iyo. Soma penu njakuthemera lini, mtendere wanu ukabwerere kuna imwe. ¹⁴ Kuna iwo ndiwo ankakutambirani lini ayayi kukubverani mafala yanu, pakubula mnyumba yoyo ayayi mzinda umweyo, kakunkhumuleni pfumbi lanu ku nzayo zanu. ¹⁵ Chadidi ndikulewa kuna imwe, zjai bzimdzapusa kudzalekerera chakuipa kuna Sodomu na Gomorra pa nsiku ya kumaliza kusiyana na mzinda umweyo.

¹⁶ "Nyang'anani, ndikukutumani ninga mabira pakati pa mphumphi, na tenepo khalani wa kuchenjera ninga nyoka na wakusaya kuphonya ninga nkhangaiwa. ¹⁷ Khalani tcheru na wanthu! Amdzakutengerani ku mbuto za kutongera milandu, apo achidzakutchangani mma sunagogue mwao. ¹⁸ Kinangoka amdzakupfuwirani kuna atongi na mafumu thangwera ine, pakukhala umboni kuna iwo na wakunja. ¹⁹ Angadzakuperekani, lekani kudzakhala na thupo kuti mumdzasewera tani, thangwe bzomwe mudzalewelewe mumdzapasiwa letu nthawe imweyo. ²⁰ Thangwe ndimwepo lini omwe mumdzakalewalewa, soma ni Mzimu wa Babanu ndiwo umdzasewera mwa imwepo. ²¹ Mano na mano kumdzakhala kuperekana kukaphiwa, na baba kuna mwanace. Wana amdzapandukira abereki wao achiwaphesa. ²² Mumdzazondiwa na aliyense thangwera dzina langu. Soma ndiye amdzapirira ate kumamaliziro, umweyo amdzapulumuka. ²³ Angadzakuboneresani mu mzinda, dzathawireni ku mzinda winango, nakuti chadidi ndikulewa kuna imwe, mungadamaliza lini kufamba mu mzinda wa Isaraeri Mwana wa Munthu akanati kubwera.

²⁴ Wakupfunzira amposa lini mpfunzisi wace, ayayi nyabasa kuposa mbuyace. ²⁵ So bzingakwanisike kuti nyakupfunzira akhale ninga mpfunzisi wace, na nyabasa ninga mbuyace. Ningati mbuya wa pa muyi pawo akumuchemera kuti Berezebule, kuna tani kuipa kwa madzina ndiyo amdzachemera wanthu wa pa muyi pace! ²⁶ Mthangwe lace nampodi kuwagopa, nakuti palibe chinthu cakubisala ndico cimdzazimbulika lini, na cinthu ca kumpsinkhika ndico cimdzadziwika lini. ²⁷ Ndico ninkuuzani mu mdima, mukacilewe pa decha, na comwe mumchibva nung'u nung'u mmakutu mwanu, mukachikuwe pa nsodzi pa nyumba. ²⁸ Nampodi kugopa wale ndiwo ankwanisa kupha thupi lokha soma nkutazira kupha kubodzi na mzimu, so gopani ule ndiye amkwanisa kudzonga thupi na mzimu kubodzi ku jahena. ²⁹ Nserenga ziwiri zimbagulisiwa lini kakobiri ka mkitikiti? Pamene palibe neye nserenga ibodzi ndiyo ingambuthe pansi Babanu seye nkuidziwa. ³⁰ Soma neye tsisi la munsolo mwanu lokha ambalidziwa basi kuwanda kwace. ³¹ Nampodi kugopa. Ndimwe wakufunikira maninge kusiyana na nserenga zizinjizo. ³² Mthangweracembo aliyense ndiye amdzanditambira padeca pana wanthu, nimdzamutambirambo pa maso pa Babangu ndiye ali kudzaulu. ³³ Soma ndiye am'dilamba pana wanthu, nimdzamulambambo pamaso pa Babangu ndiye ali ku dzaulu.

³⁴ Nampodi kukumbuka kuti ndidabwera kudzathusa mtendere pa dziko la pansi, soma lupanga. ³⁵ Thangwe ndidabwera kudzasiyanisa mwana mamuna na babace, na mwana mkazi na mamace, na muloola na mabzala wace wa chikazi. ³⁶ Anyakumuwenga munthu amdzakhala wa pa muyi pache chaiwo. ³⁷ Iye wakukonda babace ayayi mamace kuposa ine umweyo akuthemera lini ine; iye wakukonda mwanace wachimuna ayayi wachikazi kuposa ine ankuthemera lini ine. ³⁸ Iye omwe amtakula lini mtanda wace nkunditewera akuthemera lini ine umweyo. ³⁹ Iye wakupsaga moyo wache amdzautaya. Soma iye wakutaya moyo wache thangwera dzina langu amdzaugumana.

⁴⁰ Iye wakutambira iwe watambira ine, apo iye wakutambira ine watambira iye ndiye adandituma. ⁴¹ Iye wakutambira mneneri mudzina la mneneri amdzatambira mpfupo ya mneneri, apo iye wakutambira munthu wakulungama mu dzina la munthu wakulungama amdzatambirambo mpfupo ya munthu wa kulungama. ⁴² Aliyense wakupereka kuna ang'ono ang'ono awa neye mkombo wa madzi yakujejera okha mu dzina la mneneri, chadidi ndikulewa kuna imwe, bzingadzakwanisike lini kuluza mpfupo yace."