¹ Chenjerani kuti nampodi kumbachita chilungamo pala kuti mubzionesere kuna wanthu, penu mtenepo mumdzatambira lini mpfupo kucoka kuna Baba wa kudzaulu. ² Tsapano mungapa wina chinthu, nampodi kumbachita kuimba lipenga ninga ndibzo wachinyengo ambachita mma sunagogue na mmizinda, pala kuti wanthu awatende. Chadidi ndikulewa kuna imwe, amwewo atambiriratu, mpfupo yao yensene. ³ Soma mungapereka chinthu, nampodi kubvuma kuti boko lanu lamadzere lidziwe bzomwe boko la madidi likuchita ⁴ pala kuti chakupereka chanucho chikhale mwa kavindivindi. Kuti Babanu omwe ambaona mwa mchibisira akupeni mpfupo.

⁵ Pakupemphera, nampodi kukhala ninga wachinyengo, thangwe ambakonda kuima nkumba pemphera mma sunagogue na mmaponta mwa mizinda pala kuti abzionesere kuna wanthu. Chadidi ndikulewa kuna imwe, atambira kale mpfupo yao. ⁶ Soma imwe, pakupemphera, pitani mka subi ka mkati. Fungani msuwo apo pempherani kuna Baba wanu, omwe ali mwa kubisa. Tsapano Babanu ndiye ali mwa kubisayo amdzakupani mpfupo. ⁷ Pakupemphera, nampodi kumbabwerezera bwerezera bza pezi ninga ndibzo wakusaya kudziwa Mulungu ambachita, thangwe ambakumbuka kuti amdzawabvera thangera kuwanza mafalako. ⁸ Mthangwe lache, nampodi kukhala ninga iwo, nakuti Babanu ambadziwa kale bzomwe munkufuna mukanati kumukumbira. ⁹ Natenepo pempherani tenepayu: Mulungu wathu wakudzaulu, dzina lanu lichenesiwe. ¹⁴ Thangwe mungawalekerera wanthu mphumbza zao, Babanu wa kudzaulu amdzakulekereranimbo. ¹⁵ Soma penu munilekerera lini mphumbza zao, neye Babanumbo amdzakulekererani lini mphumbza zanu.

¹⁶ Mungambasala kudya, nampodi kumbagwesa nkhope ninga ndimo wa chinyengo ambacitira, nakuti ambachinja nkhope zao pala kuti ambabzionesere kuna wanthu kuti akusaladi kudya. Chadidi ndikulewa kuna imwe, atambira kale mfupo yao yensene. ¹⁷ Soma imwe, pakusala kudya, dzolani mumsolo mwanu na kusamba nkhope yanu ¹⁸ pala kuti nampodi kuoneka kuna wanthu kuti mukusala kudya, soma Babanu yekha omwe ali mwa kubisala ndiye adziwe; apo Babanu wakuona mwakabisira ndiye ati adzakupeni mpfupo.

¹⁹ Nampodi kubzigwezekera vida ya pa dziko lapansi, pomwe ingakhoze kudzongeka na mabethe na furuju, na pomwe mbava zingatchole zichiiiba. ²⁰ Soma, bzisungireni vida yanu kudzaulu, ndiko neye mabethe ayayi furuju ingadzonge lini, na ndiko neye mbava ingatchole lini achaiiba. ²¹ Nakuti ndipo pana vida yanu, mtima wanumbo umbakhala popo. ²² Diso ni nyale ya thupi. Mthangwe lache, penu diso lanu ndabwino, thupi lensene limbadzala na kutoya. ²³ Soma penu diso lanu ndakuipa, thupi lanu lensene limbadzala na kupsipa. Mthangwe lache, penu kutoya ndiko kuli mthupi lanulo ni mdima, ndiye kuti mdima umweyo ngukulu tani! ²⁴ Palibe ndiye angatumikire ambuya awiri, thangwe ayayi amdzawenga m'bodzi achikonda winangoyo, apo ayayi amdzakhazikika kuna m'bodziyo achinyoza winangoyo. Ungatumikire lini Mulungu na vida. ²⁵ Tsono ndikulewa kuna imwe, nampodi kuchita thupo na moyo wanu, kuti mumdzadya cani ayayi mumdzamwa cani; ayayi bza thupi lanu, kuti mumdzabvala cani. Nakuti mesa moyo umbaposa chakudya apo thupi lichiposa bzakubvala? ²⁶ Nyang'anani mbalame za mdzaulu. Zimbabzala lini ayayi kukolola ayayi kugwezeka mgwangwa, soma Babanu wa kudzaulu ambazidyesa. Ndimwe lini wakufunika maninge kuposa mbalame? ²⁷ Mbani m'bodzi wa imwepa na kuchita thupo angakwanise kuthimizira kutalika kwa moyo wache ninga boko libodzi lokha? ²⁸ Thangweranyi mumchita thupo na kubvala? Ganizirani bza mafolori ya mthengo, ndimo yambakulira. Yambaphata lini basa, apo neye yambasona lini bzakubvala. ²⁹ Ndiye ndikulewa kuna imwe, neye mfumu Solomoni chaiyoyo mu ulemerero bwace ilibe kubvala neye chakubvala chibodzi chakudeka ninga libodzi mwa mafololiya. ³⁰ Ninga Mulungu ambabvazika upsa bwa mthengo, bomwe bumbakhala lero mangwana buchithusiwa pamoto, ndiye kuna tani imwepo kukubvazikani kwache, imwe wa chikhulupiriro chakuchepa? ³¹ Mthangwerace nampodi thupo kulewa kuti, 'Timdzadya cani?' ayayi 'Timdzamwa chani?' ayayi 'Timdzabvala bzakubvala bzanyi?' ³² Thangwe wachikunja ambapsaga bzinthu bzobzi, apo Babanu wa kudzaulu ambadziwa kuti mumbawafuna. ³³ Soma chakutoma psagani ufumu bwache na chilungamo chache, apo mumdzapasiwa bzensebzi. ³⁴ Mthangwe lache, nampodi kuchita thupo na mangwana, thangwe mangwanayo yamdzakhalambo na thupo lache. Nsiku iriyense ina bzakuipa bwache bzakukwana.