¹ Pambuyo pache Yesu adatsogoziwa na Mzimu kuyenda kuchipululu kukayeziwa na satana. ² Adasala kudya masiku makumi manayi usiku na masikati, iye akhabva njala. ³ Nyakumuyezerayo adabwera mkumuuza iye kuti, "Penu ndiwedi mwana wa Mulungu uza minyalayi kuti isanduke mkate."

⁴ Soma Yesu adatawira achiti kuna iye, "Kudanembidwa, 'Munthu ambakhala lini na moyo thangwe la mkate okha, soma thangwera fala lirilense lakuchokera pakamwa pa Mulungu.'"

⁵ Pambuyo pache Satana adamutengera munzinda wakuchena mkukamuyimisa pakatolotolo pa tchalitchi, ⁶ apo adati kuna iye, "Penu ndiwe mwana wa mulungu bzithuse wekha pansi, nakuti, kudanembiwa, 'amdzauza anjelo wache kuti akukonkhobze, apo anzakunyamula mdzaulu m'manja mwawo, pala kuti nzayo zako nampodi zidzadzongeke na minyala.'"

⁷ Yesu adalewa kuna iye, "Kudanembiwa pomwe, 'Nampodi kumuyezera bza utowa Mbuya Mulungu wako.'"

⁸ Thimize, satana adamutengera pomwe pa phiri litali mkumuwonesa mafumu yense yadziko lapansi na ulemelero bwawo. ⁹ Adalewa kuna iye, "Nimkupa bzensenebzi, ungandigodamira na kundi pemba."

¹⁰ Kinangoka Yesu adalewa kuna iye, "Bula pano, Satana! Nakuti kudanembiwa, 'Umdzapemba Mbuya Mulumgu wako, nakumupemba iye yekha.'"

¹¹ Pambuyo pache satana adachoka, achiyenda, apo anjelo adabwera kudzamutumikira iye.

¹² Tsapano pomwe Yesu adabva kuti Yohani alikukayidi, iye adabwerera ku Galileya. ¹³ Iye adachoka ku Nazaleti mkuyenda kukakhala ku Caperenawo, mphepete mwa Nyanza ya Galileya ku mbuto za Zebuloni na Nafutali. ¹⁴ Ibzi bzidachitika kuti akwanirise bzomwe bzidalewiwa na Yesaya mneneri, ¹⁵ "Dziko la Zebuloni na dziko la Nafutali, njira yakunyanza, ng'ambu ya Yolodani, Galileya wa wanthu wachikunja! ¹⁷ Kuchokera nthawi yoyo Yesu adayamba kupfunzisa achiti, "Lapani, pakuti ufumu bwa kudzaulu bwafendela." ¹⁸ Pomwe akhafamba mphepete mwa Nyanza ya Galileya, adawona wanthu awiri ubale bwao, Simoni wakuchemeriwa Petulo, na m'bale wache Andireya, akhathusa bwazi munyanza, thangwe akhali akhombwe wa nsomba. ¹⁹ Yesu adalewa kuna iwo, "Bwerani, munditewele ine, ninzakusandusani kukhala asodzi wa wanthu." ²⁰ Kamfulumize adasiya bwazi bwawo mkumtewera iye. ²¹ Pomwe Yesu akhayenda patsogolo kuchoka popo adawona pomwe amuna awiri ubale bwao, Yakobo mwana wa Zebedayo na m'bale wache Yohani. Iwo akhali m'wadiya pabodzi na babawo Zebedayo kuteya ma bwazi yawo. Iye adawachemera iwo, ²² Kamfulumize adasiya ngalawayo na babawoyo mkumutewera iye.

²³ Yesu adafamba kuzungulira mu Galileya mwense, kumbapfunzisa m'ma sunagogue, kulalikira mafala yabwino ya ufumu na kumbalimbisa matenda yaliyense na ma dwale yense pakati pa wanthu. ²⁴ Mbiri ya iye idabvekera ku Siriya kwense, apo wanthu adamubwelesera iye wense omwe akhadwala matenda na bzakuwawa, iwo omwe akhadaphatiwa na bziwanda, wa mpfayi na anyakupunduka. Yesu adawalimbisa iwo. ²⁵ Chithimu chawanthu chidamutewera kuchokera ku Galileya, Dekapoli, Yerusalemu, na Yudeya, na ng'ambu ya Yolodani.