¹ Msiku zimwezo Yohani m'batizi adabwera mkumbalalikira mchipululu mwa Yudeya kuti, ² "Lapani, thangwe ufumu bwa kudzaulu bwafendera." ³ Ibzi bzomwe mneneli Yesaya akhafotokoza, kulewa kuti, "Mafala yawinango kukuwa m'chipululu, 'Konzani njira ya Mbuya, thamulani njira zache.'"

⁴ Tsono Yohani akhabvala bzakubvala bzakukonziwa na ukuse bwa ngamira na mcheka wakhanda m'chuno mwache. Bzakudya bzache bzikhali uchi na bziwala. ⁵ Tsapano Yerusalemu, Yudeya wense, na mbali yensene ya mkulo wa Yolodani akhayenda kuna iye. ⁶ Iwo akhabatiziwa na iye mu mkulo wa Yolodani, akatawiriza nakulapa bzakuphonya bzao. ⁷ Soma pomwe adawona Afarisi na Asaduki azinji kubwera kuna iye kudzabatiziwa, adalewa kuna iwo, wana wa nyoka imwe, mbani wakuchenjezani kuthawa ukali bomwe bukubwela? ⁸ Balani chipatso chakutembenuka mtima. ⁹ Nampodi kumwa nakulewa mwekha, 'Tinaye Abrahamu pala babathu.' Thangwe nilewa na imwe kuti Mulungu angakwanise kulamusa wana pala Abrahamu ayayi kuwasandusa kuchoka ku minyalayi. ¹⁰ Mbadzo njakukonzakonza kugwatira mizi ya miti. Tsono muti uliwense omwe um'bala lini bzipatso bzabwino umdzagwatiwa uchithusiwa pa moto. ¹¹ Ine ndikukubatizani na madzi pala mutembenuke mtima. Soma iye akubwera pambuyo pangu ngwakuposa ine, apo ndikuthemera lini kunyamula shango zache. Soma iye amdzakubatizani imwe na Mzimu Wakuchena na moto. ¹² M'manja mwamwe muna chiselo amdzapepeta bwinobwino achidzakonza pambuto nakudzagwezeka tirigu mu nyumba ya kukoyera. Apo amdzatentha gaga wensene na moto wakusaya kuthima."

¹³ Tsono Yesu adabwera kumkulo wa Yolodani kuchokera ku Galileya kuti adzabatiziwe na Yohani. ¹⁴ Soma Yohani adayezeza kumulamba, kuti, "Ndikuthemera ndine kubatiziwa na imwe, apo zjai mukubwera kuna ine?" ¹⁵ Yesu adamutawira kuti, "Bvuma tsapano, nakuti m'bzakuthemera kuti tikwanilise chilungamo chense." Apo Yohani adamubvuma. ¹⁶ Atabatiziwa, Yesu adabula kamkulumize m'madzi mule, apo onani, kudzaulu kudafungukira iye. Adawona Mzimu wa Mulungu ukubuluka ninga nkhangayiwa mkudzambutha pa iye. ¹⁷ Onani, kudabveka mafala kuchoka kudzaulu kulewa kuti, "Uyu ni Mwanangu wakukondeka. Nimbadekedwa naye maninge."