¹ Pa nsiku imweyo Yesu adayenda kunja kwa nyumba achikakhala m'gombe mwa nyanza. ² Thimu lizinji kwene kwene la wanthu lidagwezekana kumuzungulila iye, apo adapita m'wadiya achikhala mwemo apo thimu lensene lire lidakhala pansi m'gombe mule. ³ Ndiye Yesu adawauza bzinthu bzizinji mbwifanizo. Adati, "Onani, mulimi adayenda kukafesa mbeu, ⁴ Pomwe akhafesa, mbewu zinango zidagwera m'bali mwa njira, apo mbalame zidabwerra kudzazijonkhona. ⁵ Zinango zidagwera pa minyala, pomwe pakhalibe mataka mazinji. Kamfulumize zidamera thangwe pakhalibe mataka mazinji. ⁶ Soma ndipo dzuwa lidachoka, zidabvuka thangwe zikhalibe mizi, apo zidafota. ⁷ Njere zinango zidagwera pa uzuzu bwa minga. Mingazo zidakula zichikoloweka mbeu zire. ⁸ Njere zinango zidagwera pa mataka ya ndovolo zichibala bzipatso, zinango njere dzana libodzi kupitirira, zinango makumi matanthatu, zinango makumi matatu. ⁹ Iye ndiye ana makutu abve."

¹⁰ Wakupfunzira adabwera kuna Yesu achiti, "Sabwanyi mumbasewera kuna thimu lawanthu mbzifanizo?"

¹¹ Yesu adawatawira kuti, "Mwapasiwa mwai wa kubvesesa bzakubisika bza bzakudabwisa bza ufumu bwa kudzaulu, soma kuna iwo alibe kupasiwa. ¹² Nakuti ule ndiye anabzo amdzapasiwa bzizinji, achidzakhala nabzo mtaye mtaye, Somandiye alibe, neye ndibzo anabzobzo bzimdzatengiwa kuna iye. ¹³ Nithangwe lace nimbasewerra mwakuphiphirisa kuna iwo: Pala kuti neye akuona, nampodi aone; napo neye akubva, nampodi abve, ayayi kubvesesa. ¹⁴ Kuna iwo kubvimira kwa Yesaya kwakwanisiwa, kule ndiko kumbati, 'Pakutetekera, mumdzabva, soma mumdzabvesesa lini; kuona, mumdzaona, soma mumdzadziwa lini. ¹⁶ Soma yakudala maso yanu, thangwe yambaona; na makutu yanu thangwe, yambabva. ¹⁷ Inde chadidi nilewa kuna imwe kuti aneneri azinji na wanthu wakulungama adakhumba kuona bzinthu bzomwe mukuonabzi, apo alibe kubziona. Adakhumba kubva bzinthu ndibzo mukubvabzi apo alibe kubzibva. ¹⁸ Tetekerani tsono chifanizo cha mulimi ndiye adakafesa njere zace. ¹⁹ Pomwe wina anibva mafala ya ufumu soma neye kuyabvesesa, wakuipayo ambabwera kudzapsokonyola chomwe cha fesewa mumtima mwace. Iyi ni njere ndiyo idagwera m'phepete mwa mseu. ²⁰ Yomwe idafesiwa pathantwe ire ni munthu ndiye ambabva mafala apo nthawe ya kuchepa ambayatambira mwa kudekedwa, ²¹ chensecho yalibe mizi muna iye apo ambapirira mka nthawe kakuchepa. Masada ayayi mzunzo ungabwera thangwera mafalayo, kamkulumize ambagwa. ²² Ndiyo idafesiwa pa, minga, uyu ni munthu ndiye ambabva mafala, soma bzakuchitika bza m'dziko lapansi na chinyengo cha vida chidathawisa mafala yache, opo ambabala lini bzipatso. ²³ Njere ndiyo idagwera pa mataka ya ndovolo, uyu ni munthu ndiye ambabva mafala achiyaphatisa basa. Ambabala bzipatso bzichikololewa, apo chigoba chibodzi chichichosa njere makumi khumi, chigoba chinango makumi matanthatu, apo chigoba chinango kukwana makumi matatu kuposa zomwe adabzala zire."

²⁴ Yesu adawauza pomwe chakuyezezera chinango. Adati, "Ufumu bwa kudzaulu buli ninga munthu ndiye wabzala mbeu mmunda, mwache. ²⁵ Soma pomwe wanthu adagona, nyakumuwenga adabwera achiwazambo upsa bwa nyamsongole mmapando mwa tirigumo achiyenda. ²⁶ Pomwe misonjo idamera nkukula nkubala bzipatso, upsa bule budaonekerambo. ²⁷ Anyabasa wa mwenekachiro munda adabwera achiti kuna iye, 'Mbuya, mulibe kubzala mbeu zabwino mmunda mwanu mule? Bzachita tani tsapano kuoneka nyamsongole?'

²⁸ Adati kuna iwo, "Mnyakundiwenga wachita bzimwebzoyo.' "Anyabasa wale adati kuna iye, 'Tsono mumfuna tiyende tikabuzule?'

²⁹ "Mwenekachiro munda adati, 'Nada. Thangwe pakukazula nyamsongoleyo, mungakazule kubodzi na tiriguyo. ³⁰ Bwilekeni bzikulire pabodzi mpakana pa kudzakolola. Pa kudzakololapo nimdzauza anyakukulolawo, "Chakutoma zulani upsa bwensene mubumange mphuthu mukatenthe, soma tiriguyo konkhobzani muikhe mgwangwa mwangu.'"'

³¹ Kinangoka Yesu adawauza pomwe chifaniziro chinango. Adati, "Ufumu bwa kudzaulu buli ninga kanjere ka muti wa mpiru komwe munthu adakatenga nkukafesa, mmunda mwace. ³² Njere imweyi njing'ono maninge kuposa njere zensene. Soma ingakula, imbaposa mbeu za mmunda. Imbasanduka muti, kuti ate mbalame za mdzaulu zimbabwera kudzamanga bzitsa mmitawi yache." ³³ Yesu adawauza pomwe chifaniziro chinango. "Ufumu bwa kudzaulu buli ninga chakufufumisa mkate chomwe mkazi adatenga achisanganiza na magaba matatu ya ufa bwa tirigu ate bzakumunyabzo bzidafufuma," ³⁴ Bwensebzi yesu akhabziphiphirisa mu bza kuyezezera; apo akhalewalewa lini kuna iwo se bza kuyezezera. ³⁵ Uku kukhali pala kuti bzire bzomwe adalewa aneneri bzikwanirisiwe, pomwe adati, "Nimdzafungula pakamwa pangu mu bzakuyezezera. Nimdzalewa bzinthu ndibzo bzikhadafuchirika pansi pa dziko."

³⁶ Kinangoka Yesu adachoka pa thimu la wanthu pale achikapita mnyumba. Wakupfunzira wache adabwera kuna iye achiti, "Tifokotozereni bwino chifanizo cha uswa bwa nyamsongole mmunda."

³⁷ Yesu adatawira achiti, "Iye omwe akhabzala njere zabwino ule ni Mwana wa Munthu. ³⁸ Mundayo ni dziko lapansi; apo njere zabwinozo, awa ni wana wa mu ufumu. Uswabo ni wana wa satana. ³⁹ Apo nyakundiwenga adakawazayo ni satana. Kukololako ni chimaliziro cha dzik, apo anyakututawo ni anjero. ⁴⁰ Mthangwe lache, uswa bule budagwezekiwa achibugasa moto, mtenepoyo letu ndimo bzimdzachitikira pa nsiku ya chimaliziro. ⁴¹ Mwana wa munthu amdzatuma anjero wache, apo iwo amdzagwezeka pabodzi bzinthu bzense mu ufumu bwace bzense bzakuipa bzakuyambisa machimo na wense wakusaya kuweruzika. ⁴² Amdzawathusa mu ng'anjo ya moto, ndiko amdzalira achikukuta mano. ⁴³ Kinangoka wanthu wakulungama amdzatoya ninga dzuwa mu ufumu bwa Babawo. Iye omwe ana makutu, abve.

⁴⁴ Ufumu bwa kudzaulu buli ninga vida yakubisika mmunda. Munthu adaigumana achiibisa. Mwakudekedwa achiyenda kukagulisa bzensene ndibzo akhanabzo, nkukagula mundayo. ⁴⁵ Pomwe, ufumu bwa kudzaulu buli ninga munthu wa malonda wakunyang'ana ngalale yakuumira. ⁴⁶ Pomwe adaigumana ngalale ibodzi ya kuumira maningeyo, adaenda kukagulisa bzensene ndibzo akhanabzo nkukaigula.

⁴⁷ Pomwe ufumu bwa kudzaulu buli ninga khoka ndilo lidathusiwa mnyanza, lichikusa mtundu wensene wa nsomba. ⁴⁸ Pomwe litadzala, akhombwe wale adalinula khoka lawo kunja kwa gombe. Apo adakhala pansi achigwezeka zabwino kuziikha mu bzombo, soma zakuipa achizitaya. ⁴⁹ Bzimdzatenepoyombo pa nsiku ya kumaliza. Anjero amdzabwera kudzakhetha wakuipa pakati pa wakulungama. ⁵⁰ Amdzawathusa mu ng'anjo ya moto ndiko amdzalira achibubuda mano.

⁵¹ Kodi mwabvesesa bzinthu bzensebzi?" Wakupfunzira wace adati kuna iye, "Inde."

⁵² Apo Yesu adati kuna iwo, "Mthangwe lache mnembi aliyense ndiye wasanduka mneneri ku ufumu bwa kudzaulu ali ninga munthu mwenekachiro nyumba, omwe ankucosa bzakale achiikha bzipsa mu thungwa lace. ⁵³ Ndiye idafika nthawe yakuti Yesu atamaliza bzifanizo bzire, adacoka pa mbutopo.

⁵⁴ Kinangoka Yesu adapita mdziko la kwao achipfunzisa wanthu mu sunagoge mwao. Mapeto yache wanthu wensene adadabwa achiti, "Munthu umweyu nzeru zozi ambazitenga kuponi na msumba za kuchitira bza kudabwisabzi? ⁵⁵ Ngumweyu lini mwana wa mpala matabwa ule? Mayi wache uyu si Mariya? Ngumweyu lini m'bale wao wa wene Yakobo, Yosefe, Simoni na Yudasi? ⁵⁶ Mfumakazi zache zense si zozi tinazo pabodzizi? Bzinthu bzensebzi adabzitenga kuponi? ⁵⁷ Iwo adaipidwa naye. Soma Yesu adawauza kuti, "Mneneri ambalemekeziwa lini kwao ayayi ku banja lace chailo." ⁵⁸ Iye alibe kuchita bzakudabwisa bzizinji thangwera kusaya kukhulupirira kwao.