¹ Pa nthawi imweyo Yesu adayenda nsiku ya Sabata pakati paminda ya tiligu. Wakupfunzira wache akhana njala apo adayamba kutsudubula ngalale achidya. ² Soma pomwe Afarisi adawona bzobzire, adamuuza Yesu, "Onani, wakupfunzira wanu akuchita bzomwe mpsakutayana na mtemo kuchita nsiku ya Sabata."

³ Soma Yesu adalewa kuna iwo," Kodi mulibe kulewenga bzomwe Davide adachita pomwe akhana njala, na amuna omwe akhanao? ⁴ Adayenda mu nyumba ya Mulungu apo adadya mikate ya chioneso, yomwe ikhali yakuletsiwa kuna iye kudya ayayi pomwe omwe akhanawo, soma pa mtemo wace akhabvumiziwa kudya akhali wansembe okha basi. ⁵ Kodi imwe mulibe kulewenga mtemo wa utongi omwe unkuti pa Sabata wansembe mtchalitchi ambaipisa nsiku ya Sabata soma ambakhala se pikado? ⁶ Soma nilewa kuna imwe kuti m'bodzi nyakuposa kachisiyo ali pampano. ⁷ Mucikhala mukhadziwa kuti bzobzi bzikulewa chani, 'Ine nimfuna chifundo se kuti nsembe neye,' imwepo mungadatsimula lini anyakusaya kuphonya. ⁸ Nakuti Mwana wa Munthu ni Mbuya wa Sabata," ⁹ Apo yesu adachoka pamwepo, achikapita mu sunagogue mwao. ¹⁰ Onani, pakhana munthu omwe akhana boko la ku mpsimpsinika. Afarisi adabvunza yesu, achiti, "Mpalamulo lace kulimbisa nsiku ya Sabata?" pala kuti amulewe iye kuti ngwakuphonya.

¹¹ Yesu adalewa kuna iwo, "Munthu mbani kuna imwe, omwe, achikhala naye bira m'bodzi, apo achigwera mdindi nsiku ya Sabata, angaleke kumuphata achimucosa kunja? ¹² Tsono kupita kwanyi kwa nsimba, komwe, kuna bila! Natenepoyo mpalamulo lace kucita bwabwino pa Sabata." ¹³ Apo Yesu adalewa kuna munthuyo, "Futhula boko lako" Iye adalifuthula, napo lidabwerera mwache, ninga linango lire. ¹⁴ Soma Afarisi adabula achikhala gwere kumpangana iye. Iwo akhanyang'ana mule mwakuti am'phere iye.

¹⁵ Yesu, pakubvimira bzobzi, adachoka pompale. Wanthu azinji adamutewera iye, achiwalimbisa wensene. ¹⁶ Iye adawatsinda iwo kuti nampodi winango adziwe bza iye, ¹⁷ kuti bzikwanirisiwe, ndibzo bziidalewiwa na Yesaya mneneri, kuti, ¹⁸ "Nyang'anani, kapolo wangu omwe ndidamusankhula; nyakukondewayo, mwa iye mzimu wangu unidekedwa naye. Nimdzaikha Mzimu wangu pana iye, apo iye amdzalalikira chilungamo kuna Wachikunja. ²¹ apo mudzina lache Wachikunja amdzakhala na chikhulupiriro."

²² Pamwepo adabwera naye kuna yesu munthu zimola akhali pomwe bewewe akhana pomwe bziwanda. Iye adamulimbisa, ate achiyamba kusewera achiona pomwe. ²³ Apo thimu lense la wanthu lidadabwa lichilewa, "Kodi munthu umweyu angakhale mwana wa Davide ule na?"

²⁴ Soma Afarisi pakubva bzakudabwisa ibzi adati. "Munthu umweyu ambachosa lini bziwanda soma ni mphamvu ya Belezebule, mkulu wa bziwanda."

²⁵ Soma Yesu adabvimira bzakukumbuka bzawo, achiti kuna iwo, "Ufumu bulibwense bwakugawanika bumdzachedwa lini kupasuka, namzinda ayai muyi wakugawanika umdzafudzika. ²⁶ Penu Satana ambachosa Satana, iye ndiye kuti wagawanika kale yekha. Ndiye kuti ufumu bobo bumdzakhala tani? ²⁷ Apo penu ine nimbachosa bziwanda na mphamvu ya Berezebule, tsono wana wanu ambachosa na mphamvu yayani? Na thangwe ili amdzakhala wakutonga imwe. ²⁸ Soma penu nimbachosa bziwanda na Mzimu wa Mulungu, ndiye kuti ufumu bwa Mulungu bwafika kuna imwe. ²⁹ Bzingakwanisike tani munthu kukapita mnyumba mwa munthu wa mphamvu kukamubera bzinthu bzensene se kutoma kukamupima? Salipo iye nkudzabwera bwino kudzaba bzinthubzo mnyumba mule. ³⁰ Iye omwe analini ine ni muwengi wangu apo pomwe ndiye ambatsonkhana lini pabodzi na ine ambabalalikana. ³¹ Mthangwe lace ndikulewa kuna imwe, bzakuphonya na makiriyado yensene bzimdzalekeleriwa kuna imwe soma wakuchitira makiriyado Mzimu wakuchena amdzalekereriwa lini. ³² Iye wakusewera makiriyado yaliyense kuna Mwana wa Munthu amdzalekeleriwa chakuipa cace. Soma iye wakuchitira makiriyado Mzimu Wakuchena amdzalekereriwa lini chakuipa chache, neye mudziko lapansi lero lino neye mtsogolo. ³³ Chitani bzakuti muti udeke bzibalo bzache pomwe bzideke, chitani kuti muti uyipe bzibalo bzache bwiyipe pomwe, thangwe muti umbadziwika na bzakubala bzache. ³⁴ Imwe wana wa nyoka, nakuti ndimwe wakuphonya, mungalewe tani bzinthu bzabwino? Thangwe mulomo umbasewera bzomwe bzadzala mumtima. ³⁵ Munthu wabwino wakuchokera mu vida ya mtima wache wabwino ambachosambo bzabwino, napo munthu wakuipa wa kuchokera mu vida yakuipa ya mtima wache ambachosambo bzakuipa. ³⁶ Ndikukuuzani kuti pa nsiku ya ku dzatongewa wanthu amdzatawira mulandu wa fala lirilense ndilo adalewalewa. ³⁷ Thangwe mumzayezeriwa wakulungama na mafala napo mumdzagaziwa na mafala yanu pomwe."

³⁸ Tsapano anembi na Afarisi winango adamutawira Yesu achiti, "Mpfunzisi, tikufuna bzizindikiro kuchokera kuna imwe."

³⁹ Soma Yesu adawatawira achiti, "M'bwado wa wanthu wakuipa na wa chigololo umbafuna bzizindikiro. Soma palibe chizindikiro ndicho chimdzaperekiwa kupambula cha mneneri Yona. ⁴⁰ Pakuti Yona adakhala mmimba mwa chinsomba chikulu nsiku zitatu na usiku pomwe butatu, ndendende pomwe na Mwana wa Munthu amdzamala nsiku zitatu na usiku butatu pomwe pa mtima wa dziko lapansi. ⁴¹ Tsapano amuna wa ku Nineveh amdzaima pa chitongero pabodzi na wanthu wa mbadwo uno apo amdzautsimula. Thangwe adalapa na ulaliki bwa Yona, napo onani, winango mkulu kuposa Yona ali pano. ⁴² Mfumukazi ya ku m'wera imdzalamuka pa nsiku ya chitongero na wanthu wa mbwado uno napo imdzagaza bzobzi. Imdzabwera kuchokera kumalekezero ya dziko lapansi kudzabva nzeru za Sololmoni, apo onani winango mkulu wakuposa Solomoni ali pampano. ⁴³ Pomwe mzimu wakuipa wachoka mwa munthu umbapitirira mbuto zakusaya madzi kukanyang'ana mbuto kuti ukapume soma umbaisaya. ⁴⁴ Apo umbati, 'Zjai nim'bwerera ku nyumba yangu ndiko ndidachokera,' Ungabwerera, umbakagumana nyumbayo idapsaira bwino apo iri mu mchikonzero chabwino. ⁴⁵ Ndiye umbabwerera kukatengana na inzache minomwe yakuipa kuposa iwo, apo imbakabwera kudzakhala pomwe mwa munthu ule. Tsapano khalidwe lakumaliza la munthu ule limbadzalemweratu kunyanya kuposa pakutoma pale. Bzimdzaterepoyombo na mbadwo wakuipa uno."

⁴⁶ Pomwe Yesu akhali mkati kulewalewa kuna mathimu ya wanthu yale, onani, mayi wache na abale wache adaima panja, kufuna kuti alewelewe naye. ⁴⁷ Winango adati kuna iye, "Nyang'anani, mai wanu na abale wanu aima panjapa, akufuna kusewera namwe."

⁴⁸ Soma Yesu adamutawira achiti kuna adamuuzayo, "Mayi wangu mbani na abale wangu mbani?" ⁴⁹ Kinangoka adafuthula boko lache kuna anyakupfunzira wache achiti, "Onani, mayi wangu na abale wangu mbawa! ⁵⁰ Thangwe munthu aliyense omwe ambachita bzakufuna bza Baba wangu ndiye ali kudzaulu, umweyo ndiye mano wangu, mfumakazi, na mayi wangu."