¹ Pa nthawe yomweyo, Herodi Mfumu adabva bza mbiri ya Yesu. ² Iye adalewa kuna anyabasa wache. "Umweyu ni Yohani m'batizi; iye wamuka kuna wakufa. Nithangwe lache mphamvu zikuphata basa mwa imweyu."

³ Nakuti Herodi akhada m'manga Yohani, adamuphata iye, achumukoya iye mu kadeya thangwe la Herodiya, mkazi wa m'dzinza wache Filipi. ⁴ Tsono Yohani adalewa kuna iye, "Bzakuthemera lini kuna iwe kuti engamutenge iye ninga mkazako." ⁵ Herodi akadamupha iye, soma iye adagopa wanthu, thangwe iwo akhamuyesa ninga m'neneri.

⁶ Soma pakufika nsiku yakubaliwa kwa Herodi, mwana wachikazi wa Herodiya adabvina pa mpikiti pawo achikomedwa naye Herodi. ⁷ Mwakulumbira, iye adamulonjeza achilumbilra kuti animpasa iye cilichense chomwe iye angakumbire. ⁸ Pomwe iye adapanganiziwa na mayi wache, iye adalewa, "Mundipase ine popano, mpalato, msolo wa Yohani m'batizi. ⁹ "Mfumuyo idaphatiwa nsisi na kukumbira kwacheko, soma thangwe la kulumbira kwache na thangwe la wanthu wense omwe akhanawo pa bzakudyapo, iye adalamula kui bzichitike tenepoyo. ¹⁰ Iye adawatuma achikagwata msolo wa Yohani mkadeya. ¹¹ Kinangoko adaunyamula msolo wache m'palato achimupasa tsikanayo iye adautenga achiupereka kuna mayi wache. ¹² Kinangoko wakupfunza wache adabwera, achidzatenga mtembo wache achikaufuchila m'thenje. Bzitamala bzobzi, iwo adayenda achikamuuza yesu.

¹³ Tsapano pomwe Yesu adabva bzobzi, iye adachoka kumweko mumwadiya achiyenda kumbuto yachipululu. Pomwe thimu lidabva bza ibzi, iwo adamutewera iye pakatali kuchokera mumzinda. ¹⁴ Pomwe Yesu adabwera kuna iwo adaona thimu likulu. Iye adadzaliwa chifundo na iwo adawachiza nthenda zawo. ¹⁵ Pomwe kunja kudadoka, anyakupfunza adabwera kuna iye achirewa, "Kuno mkumbuto yachipululu, nthawe yayenda kale. Limwazeni thimuli, kuti ayende m'mamiyi kuti akague bzakudya bzawo."

¹⁶ Soma Yesu adalewa kuna iwo, "Bzimfunikana lini kuti iwo ayende. Imwepo muni wapasa bzinthu kuti adye."

¹⁷ Iwo adalewa kuna iye, "Ife tinanayo pano ni mikate michanu na nsomba ziwiri basi."

¹⁸ Yesu adalewa, "Ibwereseni kuna ine." ¹⁹ Kinangoka Yesu adalilamula thimulo kuti likakhale pansi pamauswa. Iye adatenga mikate michanu na nsomba ziwiri. Adanyang'ana kudzaulu, iye adanamata achibedula mikate achiyi pereka iyo kuna wapfunza, anyakupfunza achiipereka kuthimu. ²⁰ Iwo wense adadya achikwana nayo. Kinangoko iwo adalokota bzakudya__bzomwe bzidasala madengu khumi na mawiri yakudzaza. ²¹ Wense omwe adadya akhali ninga amuna bzulu bzichanu, kupambula akazi na wana.

²² Kankulumize iye adawauza wapfunza kuti akapite m'mwadiya atsogole ng'ambu inango, pomwe iye akhauza thimu lire kuti liyende. ²³ Pomwe iye adamaliza kulimwaza thimu lire, iye adayenda kukakwira m'phiri yekha kukapemphera. Pomwe kunja kudadoka, iye akhali yekha. ²⁴ Soma mwadiya akhali patali pakati pa nyanza, akhazunzika na mafunde, thangwe mphepo ikhavunga mwakugumana nayo. ²⁵ Chaku machibese munthawe ya chinayi usiku Yesu adayenda kuna iwo, akufamba pa nyanza. ²⁶ Pomwe anyakupfunza adamuwona iye akufamba pa nyanza, iwo ada njenjemera achilewa, "Umweule ni mzukwa," iwo adakuwa namantha.

²⁷ Soma yesu adalewa na iwo alikutali achilewa, "Limbani mtima! Ndine! Nampodi kuchita mantha."

²⁸ Petulo adamutawira iye achilewa, "Mbuya, penu ndimwepo, ndiuzeni ine ndibwerembo kuna imwepo pamadzipa."

²⁹ Yesu adalewa, "Bwera." Tsono Petulo adabula kuchoka m'mwadiya mule achifamba pamadzi kuyenda kuna Yesu. ³⁰ Soma powe petulo adaona mphepo ikunyanya kuwanda, iye adayamba kuchita mantha. Iye adayamba kumira, iye adakuwa achilewa, "Mbuya, ndipulumuseni ine!"

³¹ Yesu kamkulumize adafuthula boko lache, achimuphata Petulo, achilewa kuna iye, "Ndiwe wachikhulupilo chakuchepa, thangwe lanyi wakaiyikira?"

³² Kinangoka Yesu na Petulo adakapita mwadiya, mphepo idaleka kuvunga. ³³ Kinangoka anyakupfunza omwe akhali mumwadiya wale adamugodamira achimulemekeza Yesu eachilewa, "Chadidi ndimwedi Mwana wa Mulungu."

³⁴ Pomwe iwo adayambuka, adayenda kumtunda ku Genesareti. ³⁵ Pomwe wanthu waku mbuto imweyo adazindikira Yesu, iwo adamwaza mithenga palipense kuzungulira mbuto imweyo, iwo adabwera nawo kuna iye aliyense omwe akhaduwala. ³⁶ Iwo adamukumbila iye kuti iwo atondo kuphata chakubvala chache, ndipo wense omwe adakwanisa kuphata adachiziwa.